Pika (NSS) - ဒီဇင်ဘာ ၁၇

ဖေ့စ်ဘုတ်တည်ထောင်သူ ကမ္ဘာကျော်ဘီလျံနာ ဇူကာဘတ်သည် စတုရန်းပေ(၅ဝဝဝ)ရှိသည့် မြေအောက် ဘန်ကာတစ်ခု နှင့် အိမ်နှစ်လုံးကို ဆက်သွယ်ထားသည့် ဥမင်လှိုဏ်ခေါင်းတစ်ခုပါဝင်သော အမေရိကန်ဒေါ်လာ သန်း(၁ဝဝ)တန် အဆောက်အဦးတစ်ခုကို ဟာဝိုင်အီကျွန်းပေါ်ရှိ မိသားစုခြံဝန်းထဲတွင် စတင်တည်ဆောက်နေပြီ ဖြစ်ကြောင်း သိရသည်။

အဆိုပါပရောဂျက်သည် ဟာဝိုင်အီကျွန်းပေါ်ရှိ Kauai တွင် တည်ရှိပြီး အလွန်လျှို့ဝှက်ထားသောကြောင့် လက်သမားများ၊ လျှပ်စစ်သမားများ နှင့် အခြားကန်ထရိုက်တာများသည် ထုတ်ဖော်ပြောဆိုခြင်းမျိုးမရှိသော သဘောတူညီချက်များဖြင့် နှုတ်ပိတ်ခံထားရကြောင်း အမေရိကန်မဂ္ဂဇင်း Wired က ယခုသီတင်းပတ်တွင် ဖော်ပြခဲ့သည်။

၂ဝ၁၄ ခုနှစ် ဩဂုတ်လတွင် ဇူကာဘတ်ဝယ်ယူခဲ့သော အဆိုပါမြေကွက်သည် ဧက(၁၄ဝဝ)ခန့် ကျယ်ဝန်းကြောင်း လည်း သိရသည်။ ဇူကာဘတ် နှင့် ၎င်း၏ ဇနီးဖြစ်သူ Priscilla Chan တို့သည် အဆိုပါခြံဝန်းကို ဝယ်ယူရန်အတွက် အမေရိကန်ဒေါ်လာသန်း(၁၇ဝ) သုံးစွဲခဲ့ကြောင်း ဇူကာဘတ်၏ ပြောရေးဆိုခွင့်ရှိသူတစ်ဦးက Wired မဂ္ဂဇင်းသို့ ပြောကြားခဲ့သည်။

Koolau Ranch ဟု လူသိများသော အဆိုပါခြံဝန်းသည် ၎င်း၏ ကိုယ်ပိုင်စွမ်းအင် နှင့် ရေထောက်ပံ့မှုများကို ထုတ်လုပ်ပေးနိုင်ပြီး အိမ်တွင်းမွေးမြူရေးလုပ်ငန်း နှင့် စိုက်ပျိုးရေးလုပ်ငန်းတို့က စားနပ်ရိက္ခာထောက်ပံ့မှုများကို လုပ်ဆောင်နိုင်ကြောင်း သတင်းများအရ သိရသည်။

အဆိုပါခြံဝန်းထဲတွင် အနည်းဆုံး အိပ်ခန်းပေါင်း(၃ဝ) နှင့် ရေချိုးခန်းပေါင်း(၃ဝ) ဖြင့် ပေါင်းစပ်ထားသည့် အဆောက်အဦး တစ်ဒါဇင်ကျော် ပါဝင်မည်ဖြစ်ကြောင်း  အိမ်ခြံမြေမှတ်တမ်းများ၊ အမည်မသိ ကန်ထရိုက်တာများ နှင့် တွေ့ဆုံမေးမြန်းမှုများကို ကိုးကားပြီး Wired မဂ္ဂဇင်းက ဖော်ပြခဲ့သည်။

ခြံဝန်းအလယ်ရှိ နေအိမ်နှစ်ခုတွင် နေထိုင်ရန်နေရာအတွက် အကျယ်အဝန်း စုစုပေါင်း စတုရန်းပေ (၅၇ဝဝဝ) ရှိမည်ဖြစ်ပြီး disk-shaped treehouses (၁၁)လုံးကို ကြိုးတံတားများဖြင့် ဆက်သွယ်ထားမည်ဖြစ်ကြောင်း သိရသည်။ 

ခြံဝန်းထဲတွင် ဧည့်ရိပ်သာများအပြင် အားကစားခန်းမ၊ ရေကူးကန်များ၊ ရေနွေးငွေ့အခန်းများ၊ ရေပူကန်များ နှင့် တင်းနစ်အားကစားတို့ ပါရှိသည့် အဆောက်အဦးကြီးတစ်ခု ပါဝင်မည်ဖြစ်ကြောင်းလည်း သိရသည်။

အဆိုပါခြံဝန်းပတ်ပတ်လည်တွင် ဒါဇင်နှင့်ချီသော ကင်မရာများကို တပ်ဆင်ထားမည်ဖြစ်ပြီး အဆောက်အဦးတစ်ခု လျှင်ပင် ကင်မရာအလုံးရေ (၂ဝ)ကျော် တပ်ဆင်ထားမည်ဖြစ်ကြောင်း သိရသည်။ အဆိုပါတည်ဆောက်မှုများ အတွက် ကုန်ကျစရိတ်မှာ အမေရိကန်ဒေါ်လာသန်း(၁ဝဝ) ရှိမည်ဟု ခန့်မှန်းထားသော်လည်း လက်တွေ့တွင် ကုန်ကျစရိတ်မှာ ပိုမိုများပြားနိုင်ကြောင်း Wired မဂ္ဂဇင်း က ဖော်ပြခဲ့သည်။