ဂျန်ဇက် (NSS) - နိုဝင်ဘာ ၃ဝ

ရုရှားအစိုးရဟာ နည်းပညာကုမ္ပဏီတစ်ခုဖြစ်တဲ့ Apple ထုတ် ပစ္စည်းများကို အသုံမပြုဖို့ ရုရှားအစိုးရဝန်ထမ်းများကို ညွှန်ကြားလိုက်ကြောင်း သိရပါတယ်။

ရုရှားနိုင်ငံခြားရေးဝန်ကြီးဌာန တာဝန်ရှိသူများ အပါအဝင် ရုရှားအစိုးရအေဂျင်စီအများစုဟာ iPhones, iPads အပါအဝင် Apple ကုမ္ပဏီက ထုတ်လုပ်တဲ့ကုန်ပစ္စည်းတွေကို အသုံးမပြုဖို့ သတိပေးခံထားရကြောင်း သိရပါတယ်။ အဆိုပါပစ္စည်းတွေကို အသုံးပြုမယ်ဆိုရင် အပြစ်ပေးခံရဖွယ်ရှီတယ်လို့လည်း သတင်းတွေထွက်ပေါ်နေပါတယ်။ 

ရုရှားထောက်လှမ်းရေးအဖွဲ့အစည်းတစ်ခုဖြစ်တဲ့  FSB က အမေရိကန်ထောက်လှမ်းရေးအဖွဲ့ဖြစ်တဲ့ CIA  ဟာ သံတမန်များနဲ့ အခြားသူများရဲ့အချက်အလက်တွေကို ရယူနိုင်ဖို့  Apple devices ကို အသုံးချနေကြောင်း သတင်း ထုတ်ပြန်ထားပါတယ်။ 

အမေရိကန်အစိုးရဟာ ယူကရိန်းစစ်ပွဲနဲ့ပတ်သက်ပြီး ရုရှားနိုင်ငံအပေါ် ပိတ်ဆို့မှုများ ချမှတ်ခဲ့ပြီးနောက် Apple ကုမ္ပဏီဟာ ရုရှားနိုင်ငံက လုပ်ငန်းတွေ ပြန်ရုတ်သိမ်းခဲ့ကြောင်း သိရပါတယ်။ ဒါပေမယ့် Apple ကုမ္ပဏီ ထုတ်ပစ္စည်းတွေကို ပြန်လည်တင်ပို့ဖို့ စီစဉ်နေကြောင်း သတင်းတွေ ထွက်ပေါ်နေပါတယ်။ 

Apple ကုမ္ပဏီက ထုတ်လုပ်တဲ့ပစ္စည်းတွေဟာ ရုရှားနိုင်ငံရှိ mobile brand  တွေထဲမှာ လူကြိုက်အများဆုံး ပစ္စည်းဖြစ်နေပြီး  ဒီနှစ်ပထမ နှစ်ဝက်အတွင်း ရုရှားနိုင်ငံမှာ iPhone ရောင်းချရမှုပမာဏဟာ အမေရိကန်ဒေါ်လာ ၁ ဘီလျံ ကျော်သွားခဲ့ကြောင်း သိရပါတယ်။ 

Apple ကုမ္ပဏီက ထုတ်လုပ်တဲ့ပစ္စည်းတွေဟာ ရုရှားနိုင်ငံမှာ တရုတ်နိုင်ငံထုတ် Xiaomi ၊ တောင်ကိုရီးယားနိုင်ငံထုတ် ဆမ်းဆောင်းထက် ပိုမိုလူကြိုက်များနေကြောင်း သိရပါတယ်။