Pika (NSS) - စက်တင်ဘာ ၂၃

အိန္ဒိယနိုင်ငံ အရှေ့မြောက်ပိုင်းရှိ မဏိပူရပြည်နယ်တွင် မေလ(၃)ရက်က လူမျိုးစုနှစ်ခုကြား တိုက်ပွဲများဖြစ်ပွားပြီးနောက် ဖြတ်တောက်ထားခဲ့သည့် မိုလ်ဘိုင်းအင်တာနက်များကို စက်တင်ဘာလ(၂၃)ရက်တွင် ပြန်လည်အသုံးပြုခွင့်ပေးခဲ့ကြောင်း မဏိပူရပြည်နယ် ဝန်ကြီးချုပ် N Biren Singh က ပြောကြားခဲ့သည်။

ထို့ပြင် အိန္ဒိယ-မြန်မာနယ်စပ် နှစ်ဖက်လုံးတွင် နေထိုင်ကြသော ပြည်သူများကို စာရွက်စာ တမ်းများမပါဘဲ နှစ်ဖက်လုံးရှိနယ်မြေများတွင်(၁၆)ကီလိုမီတာအထိ လွတ်လပ်စွာသွားလာခွင့်ပေးမည့် လှုပ်ရှားမှုကိုလည်း ဖျက်သိမ်းပေးရန် အိန္ဒိယအစိုးရကို ပြည်နယ်ဝန်ကြီးချုပ် N Biren Singh ကတောင်းဆိုခဲ့ကြောင်းသိရသည်။

၎င်းက "အိန္ဒိယအစိုးရဟာ မဏိပူရပြည်နယ်မှာ လူမျိုးရေးအကြမ်းဖက်မှုတွေ စတင်ဖြစ်ပွားခဲ့တဲ့ မေလ(၃)ရက်က စတင်ပြီး သတင်းတုတွေ၊ ဝါဒဖြန့်မှုတွေ ပျံ့နှံလာမှာကို တားဆီးဖို့အတွက် အင်တာနက်တွေကို ဖြတ်တောက်ထားခဲ့ပါတယ်။ ဒါပေမယ့် အခြေအနေတွေ ပြန်လည်တိုးတက်လာတာကြောင့် စက်တင်ဘာလ(၂၃)ရက်ကစတင်ပြီး မဏိပူရပြည်နယ်တစ်ဝှမ်းမှာ အင်တာနက်ကို ပြန်လည်အသုံးပြုခွင့်ပေးတော့မှာပါ"ဟုပြောဆိုခဲ့သည်။

ထို့ပြင် အိန္ဒိယနိုင်ငံတွင်းသို့ တရားမဝင် ဝင်ရောက်လာမှုများကို အစိုးရက ဆက်လက်ကိုင်တွယ်ဖြေရှင်းသွားမည်ဖြစ်ပြီး အိန္ဒိယ-မြန်မာနယ်စပ်ကို ကာရံထားမှုများ လုပ်ဆောင်ရန် လိုအပ်ကြောင်း ၎င်းကထပ်မံပြောဆိုခဲ့သည်။