Pika(NSS) - ဇူလိုင် ၂၃

ဘီလာရုစ်နိုင်ငံမှ စိုက်ပျိုးရေးနှင့်ပတ်သက်သည့် စက်ပစ္စည်းယန္တရားများထုတ်လုပ်သော Minsk Tractor Plantကုမ္ပဏီသည် တစ်နာရီလျှင် (၃၂၀)ကီလိုမီတာအထိ ရောက်ရှိနိုင်သည်ဟု ယူဆထားသော ထွန်စက်အစိတ်အပိုင်းများဖြင့် တည်ဆောက်ထားသည့် Formula 1 ပြိုင်ကားကို တီထွင်ကာ ထုတ်ဖော်ပြသခဲ့ကြောင်း သိရသည်။

ရုရှားနိုင်ငံ Yekaterinburg မြို့တွင် မကြာသေးမီက ကျင်းပခဲ့သည့် Innoprom ပြပွဲတွင် ရုရှားနှင့် ဘီလာရုစ်နိုင်ငံမှ ကုမ္ပဏီပေါင်း(၁၅၀)ကျော်သည် ၎င်းတို့၏စိုက်ပျိုးရေး၊ ဆောက်လုပ်ရေးနှင့် သယ်ယူပို့ဆောင်ရေးဆိုင်ရာ စက်ပစ္စည်းယန္တာရားများကို ပြသခဲ့ကြောင်း သိရသည်။

အဆိုပါပြပွဲတွင် ဘီလာရုစ်နိုင်ငံ Minsk Tractor Plant ကုမ္ပဏီက တီထွင်ထားသော ထူးခြားသောပုံစံရှိသည့် Formula 1 ပြိုင်ကားသည် စိတ်ဝင်စားမှုအများအပြား ရရှိခဲ့ကြောင်းသိရသည်။

၎င်း Formula 1 ပြိုင်ကားတွင် ထွန်စက်ဘီးများ၊ ထွန်စက်၏ရှေ့မီးများနှင့် အပေါ်သို့ထောင်ထားသော အိတ်ဇောများ ပါရှိပြီး လူများ၏စိတ်ဝင်စားမှုကို ဆွဲဆောင်နိုင်ခဲ့သော ကားတစ်စီးဖြစ်ခဲ့ကြောင်းသိရသည်။

Innoprom ပြပွဲအတွင်း Formula 1 ပြိုင်ကားကို ရုရှားဝန်ကြီးချုပ် မစ်ရှုစတင်နှင့် ဘီလာရုစ်ဝန်ကြီးချုပ် Golovchenko တို့က သဘောကျခဲ့ပြီး စီးရန်အတွက် တောင်းဆိုခဲ့သော်လည်း အဆိုပါပြိုင်ကားမော်ဒယ်သည် အခြားကားများကဲ့သို့ပင် အလှပြသထားသည့် ကားတစ်စီးဖြစ်သည့်အတွက် စိတ်ပျက်မှုများရှိခဲ့ကြောင်းသိရသည်။

ထွန်စက်အစိတ်အပိုင်းများဖြင့် တည်ဆောက်ထားသော Formula 1 ပြိုင်ကားသည် အမှန်တကယ်မောင်းနှင်၍ ရ/မရဆိုသည့်အချက်ကို Minsk Tractor Plant ကုမ္ပဏီက ထုတ်ဖော်ပြောဆိုခဲ့ခြင်းမျိုးမရှိခဲ့ကြောင်းသိရသည်။

သို့သော်လည်း အဆိုပါပြိုင်ကားသည် အမှန်တကယ်မောင်းနှင်၍ရနိုင်သည့် အခြားမော်ဒယ်တစ်ခုရှိပြီး တစ်နာရီလျှင် (၃၂၀)ကီလိုမီတာအထိ ရောက်ရှိနိုင်ကြောင်း ဘီလာရုစ်နှင့် ပြည်ပတွင် ပြပွဲများကို ကျင်းပလေ့ရှိသော Belinterexpoကုမ္ပဏီ၏ ဒါရိုက်တာ Natalya Kurash က ပြောကြားခဲ့ကြောင်း အချို့မီဒီယာများက ဖော်ပြခဲ့ကြသည်။