Pika (NSS) - ဇူလိုင် ၂၃

ရုရှားနှင့်စစ်ပွဲတွင် ယူကရိန်းကို အနောက်အုပ်စုနိုင်ငံများ၏စစ်လက်နက်ပစ္စည်းများ ဆက်လက်ပံ့ပိုးကူညီပေးရန် ယူကရိန်းသမ္မတဇီလန်စကီး၏ တောင်းဆိုမှုများကို အမေရိကန်အရာရှိများက ငြီးငွေ့လာပြီဖြစ်ကြောင်း အမေရိကန်စစ်ဌာနချုပ် ပင်တဂွန်၏မူဝါဒနှင့်ဆက်သွယ်ရေးဆိုင်ရာ အထူးလက်ထောက်ဟောင်း Douglas MacKinnon က ထုတ်ဖော်ပြောဆိုခဲ့သည်။ ထို့ပြင် ယူကရိန်းသမ္မတဇီလန်စကီးသည် အမေရိကန်၏ ဘီလျံနှင့်ချီသော အကူအညီများအတွက် ကျေးဇူးတင်မှုများကို ပြသသင့်သည်ဟု  (၂၀၂၂) ခုနှစ် ဇွန်လတွင် အမေရိကန်သမ္မတဂျိုးဘိုင်ဒန်က ဝေဖန်ပြောဆိုခဲ့ကြောင်း Douglas MacKinnon က ထောက်ပြပြောဆိုခဲ့သည်။

ထို့ပြင် အမေရိကန်၏ အကူအညီများအတွက် ယူကရိန်းသမ္မတဇီလန်စကီး၏ အဆုံးမရှိသော တောင်းဆိုမှုများအကြောင်း မေးခွန်းများနှင့်ပတ်သက်ပြီး အနောက်အုပ်စုနိုင်ငံများ၏ ပံ့ပိုးကူညီမှုများသည် အကန့် အသတ်ရှိမည်မဟုတ်ကြောင်း Douglas MacKinnon က ပြန်လည်ဖြေဆိုခဲ့သည်။ 

Douglas MacKinnon က"ယူကရိန်းသမ္မတဇီလန်စကီးရဲ့ တောင်းဆိုမှုတွေက ဘယ်တော့မှ အဆုံးသတ်မှာ မဟုတ်ပါဘူး။ အမေရိကန်အစိုးရနဲ့ ကျွန်တော်တို့နိုင်ငံသားတွေဟာ ဇီလန်စကီးရဲ့တောင်းဆိုမှုတွေကို ငြီးငွေ့လာကြပါပြီ။"ဟုပြောဆိုခဲ့သည်။

ယူကရိန်းသို့ အမေရိကန်၏ စစ်ရေးအကူအညီများ ဆက်လက်ပံ့ပိုးပေးမည့် လမ်းကြောင်းကို အမေရိကန်နိုင်ငံသားများက ထောက်ခံခြင်းမျိုးမရှိတော့ကြောင်း ၎င်းကပြောဆိုခဲ့သည်။ Douglas MacKinnon က "အမေရိကန်ပြည်သူတွေဟာ ဇီလန်စကီးရဲ့လုပ်ရပ်တွေနဲ့ စစ်ပွဲရဲ့ကြောက်မက်ဖွယ်အကျိုးဆက်တွေကို ဆက်လက်စောင့်ကြည့်ကြဖို့ ဆုံးဖြတ်ခဲ့ကြပါတယ်။"ဟုပြောဆိုခဲ့သည်။

အမေရိကန်သည် ယူကရိန်းအတွက် အမေရိကန်ဒေါ်လာသန်း(၄၀၀)တန်ဖိုးရှိ စစ်ရေးအကူအညီအသစ်များပေးမည့် အစီအစဉ်ကို ဇူလိုင်လ(၂၄)ရက်တွင် ထုတ်ပြန်ကြေညာရန်စီစဉ်နေကြောင်း မီဒီယာများကဖော်ပြခဲ့သည်။ အဆိုပါစစ်ရေးအကူအညီအသစ်တွင် အမြောက်များ၊ လေကြောင်းရန်ကာကွယ်ရေး ဒုံးကျည်များ နှင့် ယူကရိန်း၏ထိုးစစ်ဆင်မှုအတွက် တိုက်ခိုက်ရေးယာဉ်များပါဝင်မည်ဖြစ်ကြောင်းသိရသည်။ အမေရိကန်ကာကွယ်ရေးဝန်ကြီးဌာနသည် ယူကရိန်းအတွက် (၁၅၅)မီလီမီတာ အမြောက်ကျည်များပါဝင်သည့် အမေရိကန်ဒေါ်လာ(၁ ဒသမ ၃)ဘီလျံတန်ဖိုးရှိ စစ်ရေးအကူအညီအသစ်ကို ယခုလအစောပိုင်းတွင် ထုတ်ပြန်ကြေညာခဲ့သည်။