Pika (NSS) - စက်တင်ဘာ ၂၉

တရုတ်နိုင်ငံ၏ နောက်ဆုံးပေါ် နျူကလီးယား စွမ်းအင်သုံး တိုက် ခိုက်ရေး ရေငုပ်သင်္ဘောတစ်စင်း သည် ယခုနှစ်အစောပိုင်းတွင် အကြောင်း တစ်စုံတစ်ရာကြောင့် နစ်မြုပ်သွားခဲ့ကြောင်း အမေရိကန်အကြီးတန်းကာကွယ်ရေးအရာရှိတစ်ဦးက စက်တင်ဘာ လ(၂၆)ရက်နေ့တွင် ထုတ်ဖော်ပြောဆိုခဲ့သည်။

အဆိုပါဖြစ်ရပ်သည် စစ်ရေးစွမ်းရည်များကို ချဲ့ထွင်ရန်ကြိုးပမ်းနေသည့် တရုတ်နိုင်ငံအတွက် အရှက်ရစရာကိစ္စတစ်ခုဖြစ်ကြောင်း အဆိုပါအရာရှိကထပ်မံပြောကြားခဲ့သည်။ သင်္ဘောအစင်းရေ (၃၇၀)ကျော်နှင့်အတူ တရုတ်သည် ကမ္ဘာပေါ်တွင် အကြီး မားဆုံးရေတပ်ရှိပြီး မျိုးဆက်သစ် နျူကလီး ယား စွမ်းအင်သုံး ရေငုပ်သင်္ဘောများကို စတင်ထုတ်လုပ် နေပြီလည်းဖြစ်သည်။ 

တရုတ်နိုင်ငံ၏ ပထမတန်းစားနျူကလီးယား စွမ်းအင်သုံး တိုက်ခိုက်ရေးရေငုပ်သင်္ဘောအသစ် သည် ပြီးခဲ့သည့်မေလမှဇွန်လအတွင်း အကြောင်း တစ်စုံတစ်ရာကြောင့် ဆိပ်ခံတံတားတစ်ခုအနီးတွင် နစ်မြုပ်သွားခဲ့ကြောင်း အမည်မဖော်လိုသည့် အမေရိကန်အကြီးတန်းကာကွယ်ရေးအရာရှိတစ်ဦးက ပြောကြားခဲ့သည်။ အဆိုပါအစီရင်ခံစာနှင့်ပတ်သက်ပြီး  ၎င်းတို့တွင်ပေးဆောင်ရန် သတင်းအချက် အလက်များမရှိကြောင်း အမေရိကန်ရှိ တရုတ်သံရုံးမှ ပြောရေးဆိုခွင့်ရှိသူတစ်ဦးက ပြောကြားခဲ့သည်။ 

တရုတ်သံရုံး ပြောရေးဆိုခွင့်ရှိသူက “ အဲဒီကိစ္စ တွေနဲ့ပတ်သက်တဲ့ အခြေအနေတွေကို ကျွန်တော်တို့ မသိရှိရသေးပါဘူး။ လက်ရှိအချိန်မှာ အဲဒီကိစ္စနဲ့ ပတ်သက်ပြီး ပေးဆောင်ဖို့ သတင်း အချက်အလက်တွေ ကျွန်တော်တို့မှာမရှိပါဘူး]ဟုပြောဆိုခဲ့သည်။ ထို့ပြင် အဆိုပါရေငုပ်သင်္ဘော နစ်မြုပ် ရသည့်အကြောင်းရင်းနှင့် နစ်မြုပ်ချိန်အတွင်း ရေငုပ်သင်္ဘော ပေါ်တွင် နျူကလီးယားလောင်စာများ ပါ/မပါ ဆိုသည့်အချက်ကို လက်ရှိအချိန်အထိ ရှင်းရှင်းလင်း လင်းမသိရှိရသေးကြောင်းအမေရိကန် အကြီးတန်း ကာကွယ်ရေးအရာရှိက ပြောကြားခဲ့သည်။

အမေရိကန်အကြီးတန်း ကာကွယ်ရေးအရာရှိက “ ဒီဖြစ်ရပ်ကြောင့် တရုတ်နိုင်ငံရဲ့ လေ့ကျင့်ရေး စံနှုန်းတွေနဲ့ စက်ပစ္စည်းကိရိယာအရည်အသွေး တွေအပေါ် သိသာထင်ရှားတဲ့မေးခွန်းတွေရှိလာပါပြီ။ ဒါ့ပြင် ဒီဖြစ်ရပ်ကြောင့် အကျင့်ပျက်ခြစားမှုတွေ ကာလရှည်ကြာရှိနေခဲ့တဲ့ တရုတ်နိုင်ငံရဲ့ ကာကွယ် ရေးစက်မှုလုပ်ငန်းတွေ၊တရုတ်စစ်တပ်ရဲ့ ကြီးကြပ် ကွပ်ကဲမှုတို့နဲ့ပတ်သက်ပြီး နက်နဲတဲ့မေးခွန်းတွေ ထွက်ပေါ်လာခဲ့ပါတယ်။ ဒါကြောင့် ဒီနစ်မြုပ်မှုကို တရုတ်စစ်တပ်က ဖုံးကွယ်ဖို့ကြိုးစားတာ အံ့ဩစရာ ကိစ္စတစ်ခုတော့မဟုတ်ပါဘူး” ဟု ပြောသည်။