ဂျန်ဇက် (NSS) - စက်တင်ဘာ ၂၉

အစ္စရေးနိုင်ငံသည် လက်ဘနွန်အခြေစိုက် ဟစ္စဘိုလာအဖွဲ့နှင့်ဖြစ်ပွားနေသည့် စစ်ပွဲကို ယာယီ ရပ်တန့်ရန် အမေရိကန်ဦးဆောင်သော မဟာမိတ် နိုင်ငံများ၏ တောင်းဆိုမှုများကို ငြင်းဆန်ပယ်ချလိုက်ကြောင်းသိရသည်။ 

အမေရိကန်ဦးဆောင်သော မဟာမိတ် နိုင်ငံများသည် အစ္စရေးနှင့် ဟစ္စဘိုလာအဖွဲ့ကြား ဖြစ်ပွား နေသည့် အပြန်အလှန်ပစ်ခတ်မှုများကိုအရှိန် လျှော့ချရန်အတွက်(၂၁)ရက်ကြာ အပစ်ခတ်ရပ်စဲရန် စက်တင်ဘာ(၂၆)ရက်နေ့တွင် တောင်းဆိုခဲ့ကြောင်း သိရသည်။ အစ္စရေးဝန်ကြီးချုပ် နေတန်ရာဟုသည် ဟစ္စဘိုလာ နှင့်ဖြစ်ပွားနေသည့်စစ်ပွဲကို (၂၁)ရက်ကြာ ရပ်တန့်ထားရန် တောင်းဆိုချက်ကို ငြင်းဆန်ပယ် ချ သကဲ့သို့ ဟစ္စဘိုလာအဖွဲ့ကို အလုံးစုံ အနိုင်ရချိန် အထိ ဆက်တိုက်သွားမည်ဖြစ်ကြောင်း ထုတ်ဖော် ပြောဆိုလိုက်သည်။ အစ္စရေးသည် ဂါဇာစစ်ပွဲနှင့် ဆက်နွှယ်ပြီး ဟားမတ်စ်အဖွဲ့နှင့် စစ်ပွဲဖြစ်လာခဲ့ရာ ဟစ္စဘိုလာ အဖွဲ့ကလည်း အစ္စရေးနိုင်ငံဘက်ခြမ်းကို တိုက်ခိုက်ခဲ့ကြောင်း သိရသည်။ 

ဟစ္စဘိုလာအဖွဲ့၏ပစ်ခတ်မှုများကြောင့် အစ္စရေးနှင့်ဟစ္စဘိုလာအဖွဲ့ကြား တင်းမာမှုများဖြစ် လာခဲ့ပြီး အစ္စရေးက ဗုံးကြဲတိုက်ခိုက်မှုများ အရှိန်မြင့် လုပ်ဆောင်ခဲ့ကြောင်းသိရသည်။ အစ္စရေးသည် လက်ဘနွန်နိုင်ငံအတွင်း ခြေကုပ်ယူထားသည့် ဟစ္စဘိုလာအဖွဲ့၏စစ်ရေးပစ်မှတ်များကို ယခုသီတင်း ပတ် အတွင်း ဗုံးကြဲတိုက်ခိုက်ခဲ့ရာ လူပေါင်း ရာချီသေဆုံး ခဲ့ပြီး ဟစ္စဘိုလာအဖွဲ့ကလည်း ရော့ကဒ်ဒုံး ကျည် အစင်းပေါင်းရာချီဖြင့် အစ္စရေးနိုင်ငံဘက်ခြမ်းကို ပြန် လည်တုံ့ပြန်ပစ်ခတ်ခဲ့ကြောင်းသိရသည်။

အစ္စရေးဝန်ကြီးချုပ်သည် ဟစ္စဘိုလာအဖွဲ့ နှင့်ယာယီအပစ်ခတ်ရပ်စဲရေး ကမ်းလှမ်းချက်များကို ငြင်းဆန်ပြီးနောက် ဟစ္စဘိုလာအဖွဲ့ကိုအင်အားသုံးတိုက်ခိုက်မှုများ ဆက်လက်လုပ်ဆောင်ရန် ညွှန်ကြား ခဲ့ကြောင်းသိရသည်။ အမေရိကန် အစိုးရက အစ္စရေး ဝန်ကြီးချုပ်၏ ငြင်းဆန်မှုများအပေါ် စိတ်ဆိုးဒေါသ ဖြစ်နေပြီး အပစ်အခတ်ရပ်စဲရေးကမ်းလှမ်းမှုများကို ဂရုစိုက်စေလိုကြောင်း တောင်းဆိုထားသည်။ ပြင် သစ် သမ္မတမက်ခရွန်ကလည်း အပစ်အခတ်ရပ်စဲရေး ကမ်းလှမ်းချက်များကို ငြင်းဆန်လိုက်သော အစ္စရေး ဝန်ကြီးချုပ်၏ ဆုံးဖြတ်ချက်မှားယွင်းပြီး ဒေသအတွင်းတင်းမာမှုအရှိန်မြင့်တက်လာမည်ဆိုလျှင် တာဝန်ယူရ မည်ဖြစ်ကြောင်း ထပ်မံပြောဆိုခဲ့သည်။ လက်ဘနွန် ကျန်းမာရေးဝန်ကြီးဌာနက အစ္စရေး၏ လေကြောင်းတိုက်ခိုက်မှုများကြောင့် စက်တင်ဘာ (၂၆)ရက် နေ့ အတွင်း လက်ဘနွန်နိုင်ငံအတွင်း လူပေါင်း (၉၂) ဦး သေဆုံးခဲ့ပြီး (၁၅၃)ဦး ဒဏ်ရာရခဲ့ကြောင်း ပြောသည်။ 

အစ္စရေးနှင့်ဟစ္စဘိုလာအဖွဲ့ကြား ရန်လိုမှု များစတင်ခဲ့သည့် ပြီးခဲ့သောနှစ်အောက်တိုဘာလ နောက်ပိုင်းတည်းက လူပေါင်း (၁၅၀ဝ)ကျော် သေဆုံးခဲ့ရကြောင်းသိရသည်။