ဂျန်ဇက် (NSS) - စက်တင်ဘာ ၂၉

အစ္စရေးစစ်တပ်ဟာ ဟစ်ဘိုလာအဖွဲ့ဝင်များကို ပြီးခဲ့တဲ့ရက်ပိုင်းအတွင်း လေကြောင်းက ထိုးစစ်ဆင်တိုက်ခိုက်ခဲ့ပြီးနောက် မကြာမီ လက်ဘနွန်နိုင်ငံတောင်ပိုင်းကို ကျူးကျော်ဝင်ရောက်တိုက်ခိုက်ဖွယ်ရှိနေကြောင်း သိရပါတယ်။  

အစ္စရေးနိုင်ငံမြောက်ပိုင်းမှာ တပ်ဖွဲ့ဝင်များဖြန့်ကြက်ချထားရေးအစီအစဉ်များကိုဆွေးနွေးနေပြီး မကြာခင် လက်ဘနွန်နိုင်ငံအတွင်းရှိ ဟစ်ဘိုလာအဖွဲ့ဝင်များကို မြေပြင်ထိုးစစ်ဆင်နွဲ့သွားဖွယ်ရှိနေကြောင်း၊ လက်ဘနွန်နိုင်ငံရှိ ဟစ်ဘိုလာအဖွဲ့ဝင်များကို ယခုသီတင်းပတ်အတွင်း လေကြောင်းကနေ  ပစ် မှတ်ထားတိုက်ခိုက်ခဲ့ခြင်းဟာ မြေပြင်ထိုးစစ်ဆင်နွဲဖို့ ပြင်ဆင်ခြင်းဖြစ် ကြောင်း အစ္စရေးကာကွယ်ရေးဦးစီးချုပ်ဖြစ်သော ဗိုလ်ချုပ်ကြီး ဟာဇီဟာလီဗီကထပ်မံပြောဆိုခဲ့ပါတယ်။

ဗိုလ်ချုပ်ကြီး ဟာလီဗီက "မြေပြင်ထိုးစစ်ဆင်နွဲဖို့ ပြင်ဆင်နေတယ်။မြေပြင်ထိုးစစ်ဆင်နွဲပြီး ရန်သူတွေကိုဖျက်ဆီးသွားမှာဖြစ်သလို ရန်သူတွေရဲ့အခြေခံအဆောက်အဦးတွေကိုလည်း ဖျက်ဆီးသွားမယ်။ မြေအောက်မှာရှိနေတဲ့ ရန်သူတွေရဲ့စစ်ရေးအခြေခံအဆောက်အအုံကိုလည်း ဖျက်ဆီးမယ်။ ကျွန် တော်တို့နိုင်ငံပိုင်နက်တွေကို ပစ်ခတ်နေတဲ့ ရန်သူတွေရဲ့နေရာတွေကိုလည်းဖျက်ဆီးမယ်"လို့ပြောပါတယ်။ အစ္စရေးနဲ့ဟားမတ်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက်ပိုင်း ဟစ်ဘိုလာအဖွဲ့ဟာ အစ္စရေးနိုင်ငံဘက်ခြမ်းကို ရော့ကဒ်ဒုံးကျည်များ၊ ဒရုန်းများနဲ့တိုက်ခိုက်ခဲ့ရာတင်းမာမှုအရှိန် မြင့်တက်လာခဲ့ကြောင်းသိရပါတယ်။

ပြီးခဲ့တဲ့ရက်ပိုင်းမှာ အစ္စရေးကလေကြောင်းတိုက်ခိုက်ခဲ့သလို ဟစ်ဘိုလာကလည်း ရော့ကဒ်ဒုံးကျည်များနဲ့အစ္စရေးနိုင်ငံဘက်ခြမ်းကိုပစ်ခတ်ခဲ့ရာတင်းမာမှုများပိုမိုဖြစ်လာခဲ့ပါတယ်။ အစ္စရေးရဲ့ လေကြောင်းတိုက်ခိုက်မှုတွေကြောင့် ဟစ်ဘိုလာအဖွဲ့ခေါင်းဆောင်သေဆုံးခဲ့ခြင်းဟာနှစ်ဖက်ကြားတင်းမာမှုပိုမိုဖြစ်လာစေခဲ့ကြောင်းသိရပါတယ်။