ပြည့်ဖြိုး (NSS)  - စက်တင်ဘာ ၂၉

လက်ရှိတွင် အငြိမ်းစားဝန်ထမ်းများအနေဖြင့် Centralized e-Pension စနစ်ဖြင့် မြန်မာ့စီးပွားရေးဘဏ်၏ ခွင့်ပြုဘဏ်ခွဲပေါင်း (၁၄၉)ခုတွင် ပင်စင်လစာများ ထုတ်ယူနိုင်ပြီဖြစ်ကြောင်း  သိရသည်။

 အငြိမ်းစားများအနေဖြင့် Centralized e-Pension စနစ် ဆောင်ရွက်နေသည့် မည်သည့်ဘဏ်ခွဲတွင်မဆို e-Pension ကတ်များဖြင့် ဘဏ်တစ်ခုမှ အခြားဘဏ်တစ်ခုသို့ ပြောင်းရွှေ့ရန်မလိုဘဲ ဝန်ဆောင်ခအခမဲ့ဖြင့် ပင်စင်လစာများကို ထုတ်ယူနိုင်ပြီဖြစ်ကြောင်း သိရသည်။

 “Centralized e-Pension စနစ် ဆောင်ရွက်နေတဲ့ဘဏ်ခွဲတွေမှာ ထုတ်ယူနေတဲ့ ပင်စင်စားတွေအနေနဲ့ ဘဏ်ခွဲ(၂) ရန်ကုန်မှာ ပင်စင်ထုတ်ယူလိုတယ်၊ ဒါမှမဟုတ် အခြားဘဏ်တစ်ခုခုမှာ ပင်စင်ထုတ်ယူလိုတယ် ဆိုရင် e-Pension ကတ်ပြားကို တင်ပြပြီးတော့ ကိုယ်တိုင်သော်လည်းကောင်း၊ ကိုယ်စားလှယ်ဖြင့်သော်လည်းကောင်း ထုတ်ယူနိုင်ပါတယ်။ Centralized e-Pension စနစ်မှာ ကိုယ်စားလှယ်နဲ့ ထုတ်ယူလိုသူတွေဟာ ကိုယ်စားလှယ် (၃)ဦးအထိကို အမည်စာရင်းတင်သွင်းနိုင်ပါတယ်”ဟု မြန်မာ့စီးပွားရေးဘဏ်ခွဲ(၂)မှ တာဝန်ရှိသူတစ်ဦးက ပြောသည်။

ပင်စင်ထုတ်ယူမှုတွင် သက်ရှိပင်စင်စားဖြစ်ကြောင်း လူတွေ့စစ်ဆေးမှုကိုကိုယ်တိုင်ပင်စင်လစာ ထုတ်ယူနေသည့် ပင်စင်စားဖြစ်ပါက တစ်နှစ်လျှင် တစ်ကြိမ်၊  မိသားစုပင်စင်လစာခံစားနေသည့် ပင်စင်စားများအနေဖြင့် ၆ လတစ်ကြိမ်၊ စာရင်းပြောင်းနည်းလမ်းဖြင့် ပင်စင်လစာထုတ်ယူနေသည့် ပင်စင်စားဖြစ်ပါက ၆ လ တစ်ကြိမ် လူတွေ့စစ်ဆေးမှုများ ခံယူရမည်ဖြစ် ကြောင်းသိရသည်။ 

“အခုလိုစနစ်တွေပေါ်လာတော့ ရောက်တဲ့အရပ်က အနီးဆုံးဘဏ်မှာ ထုတ်လို့ရတော့ ပိုအဆင်ပြေတာပေါ့၊ အရင်ကဆို ကိုယ်က နယ်ရောက်နေတယ်၊ ရန်ကုန်မှာပဲထုတ်လို့ရတော့ ရန်ကုန်တစ်ခေါက်ပြန်လာနေရတယ်။ အခုကပိုအဆင်ပြေပါတယ်”ဟု  ပင်စင်စားဝန်ထမ်းတစ်ဦးက ပြောသည်။

Centralized e-Pension စနစ်အား ၂၀၂၃ ခုနှစ်၊ စက်တင်ဘာလမှ စတင်ဆောင်ရွက်ခဲ့ရာ လက်ရှိ ၂ဝ၂၄ ခုနှစ်၊ စက်တင်ဘာလအထိ ဘဏ်ခွဲပေါင်း ၁၄၉ ဘဏ်တွင် ဆောင်ရွက်ပေးနေပြီဖြစ်ကြောင်း၊ ကျန်ရှိနေသည့် ဘဏ်ခွဲများ၌ Centralized e-Pension စနစ်ကို အဆင့်လိုက် ဆက်လက်အ ကောင်အထည်ဖော်မည်ဖြစ်ကြောင်း သိရသည်။