Pika (NSS) - ဖေဖော်ဝါရီ ၁

ကမ္ဘာကျော်ဘီလျံနာအီလွန်မတ်က ၎င်း၏ ဇီဝနည်းပညာကုမ္ပဏီ Neuralink သည် ဦးနှောက်ချပ်စ်ပြားတစ်ခုကို ပထမဆုံးအကြိမ်အဖြစ် လူသားခန္ဓာကိုယ်ထဲသို့ အောင်မြင်စွာထည့်သွင်းနိုင်ခဲ့ကြောင်း ထုတ်ဖော်ပြောကြားခဲ့သည်။ 

ထို့အပြင် ဦးနှောက်ချပ်စ်ပြားထည့်သွင်းခံရသူသည် ခွဲစိတ်မှုများလုပ်ဆောင်ပြီးနောက် တည်ငြိမ်ကောင်းမွန်သည့် အခြေအနေတွင်ရှိနေကြောင်း အီလွန်မတ်က ပြောကြားခဲ့သည်။

Neuralink ကုမ္ပဏီသည် လူသားများအား ၎င်းတို့၏ ဦးနှောက်တစ်ခုတည်းကို အသုံးပြုကာ စက်ပစ္စည်းများအား ထိန်းချုပ်မှုများလုပ်ဆောင်နိုင်မည့် ကြားခံပေါင်းကူးနည်းစနစ်ကို တီထွင်ဖန်တီးနိုင်ရန် မျှော်လင့်ထားကြောင်း လည်း သိရသည်။ 

အီလွန်မတ်သည် အဆိုပါဖွံ့ဖြိုးတိုးတက်မှုကို ၎င်း၏ X (တွစ်တာ)ပေါ်တွင် ထုတ်ဖော်ပြသခဲ့ခြင်းဖြစ်ကြောင်းလည်း သိရသည်။ အဆိုပါပို့စ်တွင် "ဇီဝနည်းပညာကုမ္ပဏီ Neuralink ဟာ   ဦးနှောက်ချပ်စ်ပြားတစ်ခုကို ပထမဆုံးအကြိမ် အဖြစ် လူသားခန္ဓာကိုယ်တွင်းမှာ အောင်မြင်စွာ ထည့်သွင်းနိုင်ခဲ့ပါတယ်။ အဲဒီလူသားက ခွဲစိတ်မှုတွေ လုပ်ဆောင် ပြီးတော့ လက်ရှိအချိန်မှာ တည်ငြိမ်ကောင်းမွန်တဲ့အခြေအနေမှာရှိနေပါတယ်" ဟု ရေးသားထားသည်။ ထို့အပြင် လေဖြတ်သူများနှင့် အမျိုးမျိုးသော မသန်မစွမ်းဝေဒနာများကို ခံစားနေရသူများအတွက် ဆန်းသစ်သော ကုသမှု များကို လုပ်ဆောင်ပေးနိုင်မည့် ကြိုးမဲ့ဦးနှောက်-ကွန်ပျူတာကြားခံပေါင်းကူးနည်းစနစ်ကို တီထွင်ဖန်တီးနိုင်မည်ဟု Neuralink ကုမ္ပဏီက မျှော်လင့်နေကြောင်းလည်း သိရသည်။ 

ဦးနှောက်အစိတ်အပိုင်းတစ်ခုတွင် ချပ်စ်ပြားကို အောင်မြင်စွာ ခွဲစိတ်ထည့်သွင်းနိုင်ရန်အတွက် R1 စက်ရုပ်ကို အသုံးပြုသွားမည်ဖြစ်ကြောင်း Neuralink က ပြောကြားခဲ့သည်။ အဆိုပါလုပ်ဆောင်မှု၏ ရည်ရွယ်ချက်မှာ မှတ်တမ်းများ နှင့် ဦးနှောက်၏ အချက်ပြမှုများကို ကြိုးမဲ့စနစ်ဖြင့် အပ်ပ်တစ်ခုထံပေးပို့ကာ ယင်းအချက်ပြမှုများ၏ ရည်ရွယ်ချက်များကို အဓိပ္ပါယ်ပြန်ရန်အတွက်ဖြစ်ကြောင်း သိရသည်။ 

လူသားများတွင် ဦးနှောက်ချပ်စ်ပြားထည့်ရန် စမ်းသပ်မှုကို အမေရိကန်အစားအသောက် နှင့် ဆေးဝါးကွပ်ကဲရေး ဌာန (FDA) က ပြီးခဲ့သည့်နှစ် မေလတွင် ခွင့်ပြုချက်ပေးခဲ့ခြင်းဖြစ်ကြောင်း သိရသည်။ ထို့အပြင် Neuralink ကုမ္ပဏီသည် ၎င်း၏ အစောပိုင်းစမ်းသပ်မှုများကို တိရစ္ဆာန်များတွင် လုပ်ဆောင်ခဲ့ခြင်းဖြစ်ပြီး တိရစ္ဆာန်အခွင့်အရေးများကို ချိုးဖောက်ကြောင်း စွပ်စွဲပြောဆိုမှုများလည်း ရှိခဲ့သည်။