Pika (NSS) - ဖေဖော်ဝါရီ ၁  

နိုင်ငံအများအပြားသည် ဓါတ်ငွေ့ထုတ်လွှတ်မှု လျှော့ချရေးအစီအစဉ်၏ တစ်စိတ်တစ်ပိုင်းအဖြစ် နည်းပညာများကို ပိုမိုအသုံးပြုလာခြင်းကြောင့် ကမ္ဘာလုံးဆိုင်ရာနျူကလီးယားစွမ်းအင်ထုတ်လုပ်မှုသည် ၂ဝ၂၅ ခုနှစ်တွင် သမိုင်း တစ်လျှောက် အမြင့်ဆုံးသို့ရောက်ရှိလာနိုင်ဖွယ်ရှိနေကြောင်း နိုင်ငံတကာစွမ်းအင်အေဂျင်စီ(IEA) ၏ နောက်ဆုံး ခန့်မှန်းချက်များအရ သိရသည်။ 

နျူကလီးယားစွမ်းအင်ထုတ်လုပ်မှုများသည် ၂ဝ၂၆ ခုနှစ်နောက်ပိုင်းတွင် ပျမ်းမျှအားဖြင့် နှစ်စဉ်(၃)ရာခိုင်နှုန်းနီးပါး မြင့်တက်လာနိုင်ဖွယ်ရှိနေကြောင်း IEA က ခန့်မှန်းပြောခဲ့သည်။ အဆိုပါဖွံ့ဖြိုးတိုးတက်မှုများကြောင့် တောင်ကိုရီးယားနှင့် ဥရောပတို့တွင် နျူကလီးယားစက်ရုံအသစ်များကို မြင်တွေ့ရနိုင်ဖွယ်ရှိနေသော်လည်း အဓိကအားဖြင့် တရုတ် နှင့် အိန္ဒိယတို့တွင် နျူကလီးယားစက်ရုံသစ်များကို ပိုမိုမြင်တွေ့ရလာနိုင်ဖွယ်ရှိနေကြောင်း IEA က ပြောကြားခဲ့သည်။

ထို့အပြင် ဂျပန်နိုင်ငံသည် ၎င်း၏ နျူကလီးယားဓါတ်အားပေးစက်ရုံအချို့ကို ပြန်လည်စတင်ရန် စီစဉ်နေကြောင်း လည်း သိရသည်။ ပြင်သစ်နိုင်ငံသည်လည်း ၎င်း၏ နျူကလီးယားစက်ရုံများကို ပြုပြင်ထိန်းသိမ်းမှုများ လုပ်ဆောင် ခဲ့ပြီးနောက် နျူကလီးယားစွမ်းအင်များကို ပိုမိုတိုးမြှင့်ထုတ်လုပ်နိုင်ရန် ရည်မှန်းထားကြောင်းလည်း သိရသည်။

ဗြိတိန်၊ ဆွီဒင် နှင့် ဆွစ်ဇာလန်နိုင်ငံတို့သည်လည်း လက်ရှိနျူကလီးယားစက်ရုံများ၏ လည်ပတ်မှုသက်တမ်းကို တိုးမြှင့်ခြင်းအပြင် လျှပ်စစ်ဓါတ်အားလိုအပ်ချက်များ မြင့်တက်လာမှုနှင့်အတူ စွမ်းအင်လုံခြုံရေးကိုမြှင့်တင်နိုင်ရန် အတွက် စက်ရုံအသစ်များကို တည်ဆောက်ခြင်းဖြင့် ပြည်တွင်းနျူကလီးယားစွမ်းအင်ထုတ်လုပ်မှုကို အရှိန်မြှင့် လုပ်ဆောင်နေသည့် နိုင်ငံများထဲတွင် ပါဝင်ကြောင်းလည်း သိရသည်။

ပြန်လည်ပြည့်ဖြိုးမြဲစွမ်းအင်ကြီးထွားလာမှု နှင့် ကမ္ဘာလုံးဆိုင်ရာနျူကလီးယားလုပ်ငန်းများ ပြန်လည်ပေါ်ထွက် လာမှုတို့သည် လာမည့်သုံးနှစ်အတွင်း ဓါတ်ငွေ့ထုတ်လွှတ်မှုများကို ပိုမိုနည်းပါးလာစေမည်ဖြစ်ကြောင်း IEA က ပြောကြားခဲ့သည်။

"လက်ရှိကမ္ဘာ့စီးပွားရေးမှာ စွမ်းအင်ကဏ္ဍဟာ အခြားကဏ္ဍတွေထက် ကာဗွန်ဒိုင်အောက်ဆိုက်ဒ်တွေကို ပိုမို ထုတ်လွှတ်နေပါတယ်။ အဲဒါကြောင့်မလို့ ပြန်လည်ပြည့်ဖြိုးမြဲစွမ်းအင် ကြီးထွားလာမှုနဲ့ နျူကလီးယားစွမ်းအင်ကို ပိုမိုတိုးချဲ့လာတာဟာ လာမယ့်သုံးနှစ်အတွင်း ကမ္ဘာလုံးဆိုင်ရာလျှပ်စစ်ဓါတ်အား လိုအပ်ချက် တိုးမြင့်လာမှုတွေကို ဖြေရှင်းပေးနိုင်ပါလိမ့်မယ်" ဟု IEA အမှုဆောင်ဒါရိုက်တာ Fatih Birol က ပြောခဲ့သည်။