Pearl (NSS) -  ဇန်နဝါရီ ၁၀

လက်နက်ကိုင်အဖွဲ့များသည် နယ်မြေလုလာသည့်အပြင် ဘာသာရေးကိုပါ စော်ကားလာသည့်အတွက် ပြန်လည်တွန်းလှန်သွားမည်ဟု နစကပြောခွင့်ရ ဗိုလ်ချုပ်ဇော်မင်းထွန်းက ယမန်နေ့ ဇန်နဝါရီလ ၉ ရက်တွင်  နိုင်ငံတွင်းဖြစ်ပေါ်နေသည့်အ‌ခြေအနေများနှင့်ပတ်သက်၍ ရှင်းလင်းပြောကြားရာတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

ကိုးကန့်လက်နက်ကိုင်အဖွဲ့ (MNDAA)သည် လောက်ကိုင်မြို့ကို ထိန်းချုပ်ခဲ့ပြီးနောက် ၎င်းတို့၏ တပ်ဖွဲ့ဝင်အချို့သည် လောက်ကိုင်မြို့၊ ဆီအောကျေးရွာ၏ မြောက်ဘက် ပွိုင့် ၂၂၀၂ တောင် ကုန်းပေါ်ရှိ စေတီတစ်ဆူကို သံတူဖြင့်ထုကာ ဖျက်ဆီးခဲ့သည့် အပြုအမူများလုပ်ဆောင်ခဲ့သည်။ 

အဆိုပါလုပ်ရပ်သည် ဗုဒ္ဓဘာသာဝင်မြန်မာလူမျိုးများအပေါ်တွင်  စော်ကားခြင်းဖြစ်ပြီး ဗုဒ္ဓဘာသာဝင် မြန်မာလူမျိုးများကြား သွေးကွဲနေမှုများကို သပ်လျှိုခြင်း၊ သွေးကွဲနေမှုများအပေါ်တွင် အခွင့်ကောင်းယူခြင်းဖြစ်သည်ဟု ဗိုလ်ချုပ်ဇော်မင်းထွန်းကပြောသည်။ 

"လက်နက်ကိုင်သောင်းကျန်းမှု၊ လက်နက်ကိုင်နယ်မြေလုမှုတွေကနေ လက်နက်ကိုင်ပြီး ဘာသာရေးကိုပါ စော်ကားတဲ့ တစ်မျိုးသားလုံး အမြတ်တနိုးထားတဲ့ ဘာသာရေးကိုပါ စော်ကားတဲ့အပြုအမူများနဲ့ သွေးတိုးစမ်းလာတာတွေသည် မြန်မာပြည်သူလူ ထုတစ်ရပ်လုံးအတွက် မြန်မာပြည်သူတစ်ရပ်လုံးကို စော်ကားခြင်း၊ မြန်မာပြည်သူလူထုတစ်ရပ်လုံးအတွက် များစွာသော စိတ်ထိခိုက်မှုဖြစ်ရပါတယ်။ ဒါတွေကို ကျွန်တော်တို့အနေနဲ့ ပြန် လည်ပြီး တွန်းလှန်သွားရမယ်။ ပြန်လည်ပြီး သွေးစည်းသွားရမယ်။ ပြန်လည်ပြီး ညီညွတ်သွားရမှာဖြစ်ပါတယ်" ဟု ၎င်းကပြောသည်။

ပြီးခဲ့သော ဒီဇင်ဘာလတွင်လည်း မူဆယ်မြို့အဝင် လွယ်တိန်ခမ်းတောင်ပေါ်ရှိ ရပ်တော်မူဘုရားကျောင်းဝင်း၊ ဘုန်းကြီး ကျောင်းဝင်းကို အကြမ်းဖက်သမားများက Drop Bomb များဖြင့်  ပစ်ချတိုက်ခိုက်မှုကြောင့် ဘုရားဝန်းအတွင်းရှိ သာသနိကအ ဆောက်အဦးအချို့ ထိခိုက်ပျက်စီးသည့် ဖြစ်စဉ်ဖြစ်ပွားဖူးသည်။ 

ထို့ပြင် အခြားသော လက်နက်ကိုင်များအနေဖြင့်လည်း ဘုရားစေတီများအပေါ်တွင် အကာအကွယ်ယူ၍  ပစ်ခတ်မှုများနှင့် ခံစစ်စခန်းပြုလုပ်မှုများ လုပ်ဆောင်လျက်ရှိကြောင်း  ဗိုလ်ချုပ်ဇော်မင်းထွန်းကပြောသည်။

ပွိုင့် ၂၂၀၂ တောင်ကုန်းပေါ်ရှိ စေတီတစ်ဆူကို သံတူဖြင့်ထုကာ ဖျက်ဆီးခဲ့သည့် အပြုအမူနှင့်ပတ်သက်၍လည်း သံဃာတော်များဦးဆောင်ကာ လူပုဂ္ဂိုလ်များပူးပေါင်း၍ အင်အား (၇၀၀)ခန့်ဖြင့် လမ်းလျှောက်ဆန္ဒဖော်ထုတ်ကန့်ကွက်ခြင်းအား မန္တလေးမြို့၌ ယမန်နေ့ (ဇန်နဝါရီလ ၉ ရက်)တွင် ပြုလုပ်ခဲ့ကြသည်။  

MNDAA အဖွဲ့အနေဖြင့်လည်း လက်အောက်ငယ်သား၏ တပ်စည်းမျဉ်းစည်းကမ်းညံ့ဖျင်းမှုနှင့် အရည်အချင်းမရှိသော လုပ် ဆောင်မှုအတွက်လည်း လွန်စွာတောင်းပန်အပ်ပါကြောင်းလည်း ထုတ်ပြန်ထားသည်။