NSS - စက်တင်ဘာ ၁၈

မန္တလေးတိုင်းဒေသကြီး၊ မြစ်သားမြို့နယ်တွင် သံဃာတော်တစ်ပါးကို PDF အဖွဲ့က သေနတ်ဖြင့်ပစ်ခတ်သတ်ဖြတ်၍ ဆိုင်ကယ်၊ ဖုန်းနှင့် ငွေကြေးများ လုယက်ယူဆောင်သွားခဲ့ကြောင်း လုံခြုံရေးတပ်ဖွဲ့နှင့် နီးစပ်သူများထံမှ သိရသည်။

ဖြစ်စဉ်မှာ စက်တင်ဘာ ၁၆ ရက်၊ နံနက် ၁၀နာရီအချိန်ခန့်က မြစ်သားမြို့ နယ်၊ မယ်ဇယ်ပင်သာကျေးရွာ နှင့် ကဆွန်ကျေးရွာအကြား၊ ကူမဲ- ကင်းတာကားလမ်းပေါ်တွင် ဖြစ်ပွားခဲ့ခြင်းဖြစ်ကြောင်း သိရသည်။

ခရုတုတ်ကျေးရွာရှိ “စိန္ဒာမယာရာမ”ဘုန်းကြီးကျောင်းတွင် သီတင်းသုံးနေသော သက်တော်(၆၂)နှစ်၊ ဝါတော်(၃)ဝါရှိ ဆရာတော် ဥူးကော ဝိဒသည် တစ်ရွာတည်းနေ ဦးမင်းသိန်းနှင့်အတူ ခရုတုတ်ကျေးရွာမှ ကူမဲမြို့သို့ ဆိုင်ကယ်ဖြင့် ထွက်ခွာလာစဉ် အထက်ပါနေရာအရောက်၌ PDF အဖွဲ့ဝင် (၃)ဦး က ဆိုင်ကယ်(၂)စီးဖြင့် နောက်မှလိုက်ပါလာကာ သေနတ်ဖြင့် ပစ်ခတ်သတ်ဖြတ်ခဲ့ခြင်းဖြစ်ကြောင်း သိရသည်။

ထိုသို့ သေနတ်ဖြင့်ပစ်ခတ်ခံရမှုကြောင့် ဆရာတော်ဥူးကောဝိဒတွင် ကျည်ထိမှန်ဒဏ်ရာများရရှိကာ အခင်းဖြစ်နေရာတွင် ပျံလွန်တော်မူခဲ့ပြီး ဆိုင်ကယ်တစ်စီး၊ ဖုန်းတစ်လုံးနှင့်အတူ ငွေကျပ်(၁)သိန်းခွဲကိုလည်း လုယက်ယူဆောင်သွားခဲ့ကြောင်း သိရသည်။

ထို့ကြောင့် ပြစ်မှုကျူးလွန်သူများအား ဖော်ထုတ်ဖမ်းဆီးရမိရေးနှင့် ဥပဒေနှင့်အညီထိရောက်စွာအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းလျက်ရှိကြောင်း သိရသည်။

နိုင်ငံတစ်ဝန်းတွင် ၂၀၂၁ ခုနှစ်၊ ဖေဖော်ဝါရီလမှစတင်ကာ အကြမ်းဖက်သတ်ဖြတ်ခံရမှုကြောင့် သံဃာတော်အပါး (၁၀၀)ကျော်နှင့် သီလရှင် ဆရာကြီး(၃)ပါးအထိ ပျံလွန်တော်မူထားသည်။