ကျော် (NSS) - နိုဝင်ဘာ ၁၄

ရွှေတိဂုံစေတီတော် ရင်ပြင်တော် တနင်္ဂနွေထောင့်ရှိ နောင်တော်ကြီးစေတီတော်အား လုံးတော်ပြည့်ရွှေသင်္ကန်းကပ်လှူပူဇော်သွားမည်ဖြစ်ကြောင်း သိရသည်။

ထိုသို့ လုံးတော်ပြည့်ရွှေသင်္ကန်းကပ်လှူပူဇော်နိုင်ရန် ဆရာတော်ကြီးများထံမှ သြဝါဒခံယူပွဲအား နိုဝင်ဘာလ ၁၃ ရက်၊ နံနက် ၉ နာရီခွဲက ရွှေတိဂုံစေတီတော် ရင်ပြင်တောင်ဘက်မုခ်ရှိ ရှေးဟောင်းဗုဒ္ဓရုပ်ပွားတော်မြတ်များတန်ဆောင်း၌ ကျင်းပခဲ့သည်။

ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့၏ ဩဝါဒါစရိယဆရာတော်ကြီးများကြွရောက်တော်မူကာ သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးဦးတင်ဦးလွင်တက်ရောက်ခဲ့ကြောင်း သိရသည်။

ပြည်ထောင်စုဝန်ကြီးဦးတင်ဦးလွင်က နောင်တော်ကြီးစေတီသည် ရှေးဟောင်း သမိုင်းဝင်စေတီတစ်ဆူဖြစ်ကာ ရွှေတိဂုံစေတီတော်ကြီးပြီးပါက အကြီးဆုံးစေတီတော်ဖြစ်သည်ဟု လျှောက်ထားခဲ့သည်။

ထို့ပြင် နောင်တော်ကြီးစေတီတော်အား ၂၀၁၇- ၂၀၁၈ ခုနှစ်တွင် မျက်ပါးရွှေသင်္ကန်းတော်ကပ်လှူခဲ့ရာ သက်တမ်း ၆ နှစ်အတွင်းရောက်ရှိလာ၍ ရွှေရောင်များမှေးမှိန်ခြင်း၊ အောက်ခံသစ္စေးရောင်များပေါ်လာခြင်းတို့ကြောင့် မျက်ပါးရွှေသင်္ကန်း ပြန်လည်ကပ်လှူရခြင်းဖြစ်သည်ဟု ၎င်းကလျှောက်ထားသည်။

မကြာမီအချိန်တွင် ဩဝါဒါစရိယစရာတော်ကြီးများကိုပင့်လျှောက်၍ အန္တရာယ်ကင်းပရိတ်တ ရားတော်များကိုနာယူခြင်း၊ သီလခံယူဆောက်တည်ခြင်းများပြုလုပ်ပြီးနောက် ငြမ်းစေတီတည်ဆောက်၍ ရွှေဟောင်းများချွတ်ယူသိမ်းဆည်းခြင်း၊ ရွှေသင်္ကန်းကပ်လှူပြီးချိန်တွင် ဗုဒ္ဓဘိသေကအနေကဇာတင်ခြင်းတို့ကိုကျင်းပသွားမည်ဟု လျှောက်ထားခဲ့ကြောင်း သိရသည်။