ကျော် (NSS) - နိုဝင်ဘာ ၁၄

နေပြည်တော်၊ ဒက္ခိဏသီရိမြို့နယ်ရှိ မာရဝိဇယဗုဒ္ဓရုပ်ပွားတော်မြတ်ကြီးအား တန်ဆောင်တိုင်ကာလဖြစ်သည့် နိုဝင်ဘာလ ၂၅ ရက်မှစတင်၍ နေ့စဥ် ဆီမီး ၉၀၀၀ ဖြင့် ၃ ရက်တိုင်တိုင် ထွန်းညှိပူဇော်သွားမည်ဖြစ်ကြောင်း သိရသည်။

ထို့ပြင် တန်ဆောင်တိုင်မီးထွန်းပွဲတော်အား နိုဝင်ဘာလ ၂၅ ရက်၊ ၂၆ ရက် နှင့် ၂၇ ရက်တို့တွင်လည်း မာရဝိဇယဗုဒ္ဓရုပ်ပွားတော်မြတ်ကြီး ပရဝုဏ်အတွင်း၌ ကျင်းပသွားမည်ဖြစ်ကြောင်း သိရသည်။

တန်ဆောင်တိုင် မီးထွန်းပွဲတော်ကာလအတွင်း မာရဝိဇယဗုဒ္ဓရုပ်ပွားတော်မြတ်ကြီးအား ဆီမီး ၉၀၀၀ ကပ်လှူပူဇော်ခြင်း၊ အသံမစဲပဋ္ဌာန်းရွတ်ဖတ်ပူဇော်ခြင်း၊ ဝတ်အသင်းအဖွဲ့များမှ ဝတ်ရွတ်စဉ်များဖြင့်ပူဇော်ခြင်း၊ မီးရှူးမီးပန်းများပစ်လွှတ်ပူဇော်ခြင်း၊ အလှညမီးကြီးနှင့်စိန်နားပန်မီးပုံးပျံကြီးများလွှတ်တင်ပူဇော်ခြင်းများပြုလုပ်သွားမည်ဖြစ်သည်။

ထို့ပြင် မာရဝိဇယဗုဒ္ဓဥယျာဉ်ဝတ္ထုကံတော်အတွင်း၌လည်း LED မီးများဖြင့် အလှဆင်ပူဇော်မှုများပြုလုပ်သွားမည်ဖြစ်ကြောင်း သိရသည်။

ထို့အတူ အသေးစား၊ အငယ်စားနှင့်အလတ်စားစီးပွားရေး(MSME)လုပ်ငန်းများ၏ ဒေသထွက်ကုန်၊စားသောက်ကုန်၊ လူသုံးကုန်ပစ္စည်းအရောင်းဆိုင်ခန်းများ၊ ဒေသထွက်မြန်မာ့ရိုးရာမုန့်ဆိုင်များလည်း ခင်းကျင်းပြသရောင်းချသွားမည်ဖြစ်ကြောင်း သိရသည်။