NSS - နိုဝင်ဘာ ၁၄

လွိုင်ကော်တက္ကသိုလ်ရှိ ပညာရေးဝန်ထမ်း နှင့် ကျောင်းသားများကို ဖမ်းဆီးခေါ်ဆောင်ရန် ကြိုးပမ်းသော လက်နက်ကိုင်အဖွဲ့ နှင့် တပ်မတော်ကြားတိုက်ပွဲဖြစ်ပွားခဲ့ကြောင်း နစက၏သတင်းထုတ်ပြန်ချက်အရ သိရသည်။

ဖြစ်စဉ်မှာ KNPP နှင့် PDF အဖွဲ့များသည် ယမန်နေ့( နိုဝင်ဘာလ ၁၃ ရက်)၊ နံနက် (၈)နာရီဝန်းကျင်အချိန်တွင် စစ်ရေးနှင့် သက်ဆိုင်မှုမရှိသည့် လွိုင်ကော်တက္ကသိုလ်အား လက်နက်ကြီးလက်နက်ငယ်များဖြင့် လာရောက်ပစ်ခတ်တိုက်ခိုက်ခဲ့ကြောင်း သိရသည်။

ထို့သို့ ပစ်ခတ်တိုက်ခိုက်ခဲ့ပြီးနောက် တက္ကသိုလ်တွင် တာဝန်ထမ်းဆောင်နေသည့် ပညာရေးဆိုင်ရာ ဝန်ထမ်းများ နှင့် ပညာသင်ကြားနေသည့် ကျောင်းသား၊ ကျောင်းသူများအား အတင်းအဓမ္မ ဖမ်းဆီးခေါ်ဆောင်ရန် ကြိုးပမ်းလာခဲ့ကြောင်း သိရသည်။

ထို့ကြောင့် လုံခြုံရေးတပ်ဖွဲ့ဝင်များက လွိုင်ကော်တက္ကသိုလ်ရှိ ဆရာ၊ ဆရာမများနှင့် ကျောင်းသား၊ ကျောင်းသူများ ထိခိုက်ဒဏ်ရာရရှိမှုမရှိစေရေးနှင့် ဘေးကင်းလုံခြုံမှုရှိစေရေးအတွက် စီမံဆောင်ရွက်စဉ် လက်နက်ကိုင်အဖွဲ့များနှင့် အပြန်အလှန် ပစ်ခတ်မှုဖြစ်ပွားခဲ့သည်ဟု နစက ကပြောသည်။

“KNPP နဲ့ PDF အမည်ခံ အကြမ်းဖက်အဖွဲ့တွေအနေနဲ့ စစ်ရေးနဲ့မသက်ဆိုင်တဲ့ လွိုင်ကော်တက္ကသိုလ်ကို လက်နက်ကြီးလက်နက်ငယ်တွေနဲ့ လာရောက်ပစ်ခတ်တာရှိတယ်။ ပြီးရင်အထဲမှာရှိနေတဲ့ ပညာရေးဝန်ထမ်းတွေ၊ ကျောင်းသား၊ ကျောင်းသူတွေကို အတင်းအဓမ္မ ဖမ်းဆီးခေါ်ဆောင်ဖို့လုပ်ခဲ့တာရှိတယ်။ ဒါတွေကိုတော့ နယ်မြေခံလုံခြုံရေးတပ်ဖွဲ့ဝင်တွေက တက္ကသိုလ်ကျောင်းသား၊ ကျောင်းသူတွေ၊ ဆရာ ဆရာမတွေ ထိခိုက်မှုမရှိစေရေး ဘေးကင်းရာနေရာသို့ ပို့ဆောင်ရေးဆောင်ရွက်လျက်ရှိတယ်။ ဆောင် ရွက်လျက်ရှိတဲ့အခါမှာတော့ အပြန်အလှန်ထိတွေ့တိုက်ပွဲဖြစ်ပွားခဲ့တယ်။ စစ်ရေးနဲ့မသက်ဆိုင်တဲ့ကျောင်းကို ပစ်မှတ်ထားပြီး တိုက်ခိုက်လာတာ KNPP နဲ့အဲဒီမှာရှိတဲ့ PDF တွေရဲ့ ယုတ်မာရိုင်းစိုင်းမှုဖြစ်တယ်”ဟု နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

ထို့သို့ ဘေးကင်းရာသို့ ပို့ဆောင်ပေးစဉ် KNPP နှင့် PDF အဖွဲ့များနှင့် အပြန်အလှန် ထိတွေ့မှုများ ဖြစ်‌ပေါ်ခဲ့ပြီး တက္ကသိုလ်အတွင်းရှိ သင်ကြားမှု၊ အထောက်အကူပြုပစ္စည်းများနှင့် အဆောက်အဦးများ ထိခိုက်ပျက်စီးခဲ့ရကြောင်း သိရသည်။

၎င်းတို့၏  လုပ်ဆောင်မှုများကြောင့် အဝေးသင်စာမေးပွဲစတင်ဖြေဆိုမည့် တတိယအသုတ်စာမေးပွဲများကိုလည်း အကန့်အသတ်မရှိရွှေ့ဆိုင်းလိုက်ရကြောင်း သိရသည်။