မြူနစ် (NSS) - စက်တင်ဘာ ၁၈

မကွေးတိုင်း၊ ရေစကြိုမြို့နယ်၊ ကိုင်းမကြီးရွာ၌ သက်တော်(၇၃)နှစ်အရွယ် သံဃာတစ်ပါးသည် PDF အဖွဲ့၏ လုပ်ကြံသတ်ဖြတ်ခြင်းကို ခံခဲ့ရကြောင်း သတင်းရရှိသည်။

ယမန်နေ့(စက်တင်ဘာလ ၁၇ ရက်)၊ ည ၁၁ နာရီအချိန်ခန့်တွင် PDF အဖွဲ့ဝင်များသည် ကိုင်းမကြီးရွာ၊ ရွာဦးဘုန်းကြီးကျောင်းသို့ လာရောက်ကာ ကျောင်းထိုင်ဆရာတော် ဦးကုမာရအား ဖမ်းဆီးခေါ်ဆောင်သွားခဲ့ကြောင်း လုံခြုံရေးအဖွဲ့နှင့်နီးစပ်သူများက ပြောသည်။

ထိုသို့ ဆရာတော်ဦးကုမာရအား ဖမ်းဆီးခေါ်ဆောင်သွားပြီးနောက် ကိုင်းမကြီးရွာ ပတ်ဝန်းကျင်ရှိ ဆင်ချောင်းဆည်အနီး၌ PDF အဖွဲ့ဝင်များက ဓါးနှင့်သေနတ်များကို အသုံးပြုကာ သတ်ဖြတ်သွားခဲ့ကြောင်း သိရသည်။

“PDF တွေက ဖမ်းဆီးခေါ်ဆောင်ပြီးတော့မှ ဆရာတော်က အသတ်ခံရတာ။ လည်ပင်းမှာတော့ ပြတ်ရှဒဏ်ရာတွေ ရှိ တယ်။ လည်ပင်းတစ်ခုလုံးတော့ ပြတ်သွားတာမျိုးတော့ မဟုတ်ဘူး။ လုပ်ကြံသတ်ဖြတ်ခံရတာတော့ မှန်ပါတယ်” ဟု လုံခြုံရေးအဖွဲ့နှင့်နီးစပ်သူက ပြောသည်။

ယင်းကဲ့သို့ လုပ်ကြံသတ်ဖြတ်ခံရမှုကြောင့် ဆရာတော်ဦးကုမာရသည် ပျံလွန်တော်မူသွားပြီဖြစ်ကြောင်း သိရသည်။

ကိုင်းမကြီးရွာဦးကျောင်းဆရာတော် ဦးကုမာရသည် ပျံလွန်တော်မူချိန်၌ အသက်တော်သည် (၇၃)နှစ်ရှိပြီဖြစ်ကာ ဝါတော်မှာ (၅၃)ဝါ ရှိကြောင်း သိရသည်။

“အဲဒီဘက်မှာရှိတဲ့ PDF တွေရဲ့နောက်မှာ KIA လက်နက်ကိုင်အဖွဲ့ ကြိုးကိုင်ချယ်လှယ်နေတယ်လို့တော့ ဦးဇင်းထင်ပါ တယ်။ KIA ရဲ့ မှိုင်းတွေမိနေလို့ ဒီလောက်အထိ ရက်ရက်စက်စက်ဖြစ်နေတာ။ စစ်ကိုင်း၊ မကွေးဘက်မှာပဲ ဒီလိုဖြစ်စဉ် တွေ အများဆုံးဖြစ်နေတာ။ နောက် စစ်တပ်က လာရောက်တည်းခိုတဲ့ ဘုန်းကြီးကျောင်းတွေဆိုရင် ဒလန်ဘုန်းကြီး ကျောင်းဆိုပြီး စွပ်စွဲခံရတာတွေရှိတယ်။ တစ်ချို့ဘုန်းကြီးတွေလည်း ကျောင်းမှာတောင် သီတင်းမသုံးရဲဖြစ်နေတယ်” ဟု မကွေးတိုင်းအတွင်းရှိ သံဃာတော်တစ်ပါးက NP News ကို မိန့်ကြားသည်။

မကွေးတိုင်းအတွင်း၌ တပ်မတော်သားများ လာရောက်တည်းခိုသည့် ဘုန်းကြီးကျောင်းများကို ဒလန်ဘုန်းကြီး ကျောင်းဟု PDF အဖွဲ့က စွပ်စွဲကာ ခြိမ်းခြောက်ခံရမှုများရှိနေသည့်အတွက် အချို့သော ကျောင်းထိုင်ဆရာတော်များသည် ၎င်းတို့၏ကျောင်းများ၌ သီတင်းမသုံးရဲဘဲ တိမ်းရှောင်နေရသည့်ဖြစ်စဉ်များ ရှိနေကြောင်း သိရသည်။

လက်ရှိ နစကအစိုးရလက်ထက် (၂)နှစ်ခွဲကျော်ကာလအတွင်း၌ PDF အပါအဝင် လက်နက်ကိုင်အဖွဲ့များ၏ အကြမ်း ဖက် သတ်ဖြတ်မှုကြောင့် ပျံလွန်တော်မူခဲ့ရသည့် ရဟန်းသံဃာတော်သည် (၈၄)ပါးအထိ ရှိလာပြီဖြစ်ကြောင်း နစက၏ အချက်အလက်များအရ သိရသည်။

ဗုဒ္ဓဘာသာကို အများဆုံးကိုးကွယ်သည့် မြန်မာနိုင်ငံ၌ ဗုဒ္ဓဘာသာရဟန်းသံဃာတော်များ အကြမ်းဖက်သတ်ဖြတ်ခံနေရသည့်ဖြစ်စဉ်များသည် မဖြစ်သင့်ကြောင်းနှင့် ယင်းကဲ့သို့ လုပ်ရပ်များအား ရပ်တန့်ပေးစေလိုကြောင်း မေတ္တာရပ်ခံမှုများရှိနေသည်။

ယင်းကဲ့သို့ ရဟန်းသံဃာတော်များ အကြမ်းဖက်သတ်ဖြတ်ခံရမှုများအပေါ် နိုင်ငံတော် တာဝန်ရယူထားသည့် နစကအစိုးရအနေဖြင့် ထိထိရောက်ရောက် အကာအကွယ်ပေးနိုင်ခြင်း မရှိသကဲ့သို့ အကြမ်းဖက်အဖွဲ့များကလည်း သတ် ဖြတ်နေမှုများကို ဆက်လက်ကျူးလွန်လျက်ရှိကြောင်း တွေ့ရှိရသည်။