ယွန်း (NSS) - ဇူလိုင် ၂၄

မာရဝိဇယဘုရားကြီးရှေ့၌ တည်ထားသည့် အောင်မြေ၌ နိုင်ငံတစ်ဝန်းရှိ တန်ခိုးကြီးဘုရားများ၏ ‌အောင်မြေဌာန(၃၅)ခုကို တည့်သွင်းထားကြောင်း သိရသည်။

အဆိုပါ ဝိဇယဘူမိနိမ္မာနအောင်မြေတည်ထားခြင်း မဟာမင်္ဂလာအခမ်းအနားနှင့် သဒ္ဒါဓိပတိ ခေါင်း လောင်းတော်ကြီး ဖွင့်လှစ်ခြင်းအခမ်းအနားကို ဇူလိုင်လ(၂၃)ရက်၊ နံနက်ပိုင်းတွင် မာရဝိဇယရုပ်ပွားတော်ကြီးတည်ထားရာ ဒက္ခိဏသီရိမြို့နယ်၌ ကျင်းပခဲ့ကြောင်း နစကမှ ထုတ်ပြန်ထားသည်။

ဝိဇယဘူမိနိမ္မာနအောင်မြေကို မာရဝိဇယ ဗုဒ္ဓဥယျာဥ်ဝတ္ထုကံတော် မာရဝိဇယရုပ်ပွားတော်မြတ်ကြီး မျက်နှာတော်မူရာအရပ်တွင် တည်ထားခဲ့ကြောင်း သိရသည်။

အဆိုပါအောင်မြေတွင် မဇ္ဇျိမဒေသ ဗုဒ္ဓဂယာ သတ္တဌာန(၇)နေရာမှ အောင်မြေများ နှင့် နိုင်ငံတစ်ဝန်းလုံးရှိ တန်ခိုးကြီး စေတီဘုရားများရှိ အောင်မြေဌာန(၃၅)ဌာနတို့၏ အောင်မြေများကို ထည့်သွင်းတည်ထားကြောင်း နစကမှ ဆိုသည်။

ထို့ပြင် သဒ္ဒါဓိပတိ ခေါင်းလောင်းတော်ကြီးကိုလည်း တည်ထားခဲ့ပြီး မြန်မာနိုင်ငံတွင် ထေရဝါဒဗုဒ္ဓသာသနာတော်ကြီး ခိုင်မာစွာထွန်းလင်း တောက်ပမှုကို ကမ္ဘာကိုပြသရန်၊ မြန်မာနိုင်ငံသည် ထေရဝါဒဗုဒ္ဓဘာသာကိုးကွယ်မှု၏ ဗဟိုချက်ဖြစ်စေရန်၊ နိုင်ငံတော်ကြီးသာယာဝပြောမှု ရှိစေရန်နှင့် ကမ္ဘာကြီးငြိမ်းချမ်းသာယာမှုဖြစ်စေရန် ရည်ရွည်ကြောင်း သိရသည်။

ခေါင်းလောင်းကြီးသည် အမြင့်(၅)ပေ၊ ထိပ်ဝအကျယ်(၄)ပေ (၁)လက်မ၊ ကြေးပိဿာအလေးချိန် (၇၃၈) ပိဿာရှိကြောင်း သိရသည်။

မာရဝိဇယရုပ်ပွားတော်ကြီး၏ ဗုဒ္ဓါဘိသေကအနေကဇာတင် မင်္ဂလာအခမ်းအနားကို လာမည့် သြဂုတ်လ(၁)ရက် (ဒုတိယဝါဆိုလပြည့်) တွင် ကျင်းပသွားမည်ဖြစ်ကြောင်း သိရသည်။

ရုပ်ပွားတော်ကြီးအား လာရောက်ဖူးမြော်ကြမည့် ဘုရားဖူးပြည်သူများကို သြဂုတ်လ(၁၆)ရက်အထိ မည်သူမဆို လုံခြုံရေးအရ စစ်ဆေးမှုခံယူပြီး အခမဲ့ဝင်ရောက် ဖူးမြော်ကြည်ညိုခွင့်ပြုမည်ဖြစ်ကြောင်း သိရသည်။