Pika (NSS) - ဇူလိုင် ၁၉ 

စာတိုများပေးပို့နိုင်သော တယ်လီဂရမ် Telegram အပ်ပ်သည် လစဉ်အသုံးပြုသူ သန်း(၈ဝဝ)ကျော်အထိ ရောက်ရှိ နေပြီဖြစ်ပြီး နေ့စဉ်အသုံးပြုသူမှာ တစ်ရက်လျှင် (၂ ဒသမ ၅) သန်း တိုးလာကြောင်း တည်ထောင်သူ ပါဗယ်လ်ဒူရော့ဗ် က ပြောကြားခဲ့သည်။

ပါဗယ်လ်ဒူရော့ဗ် က "တယ်လီဂရမ်အပ်ပ်ကို အသုံးပြုသူတွေ ပိုမိုများပြာလာနေပြီး သူတို့တွေအားလုံးကို ဝန်ဆောင်မှုပေးဖို့ ကုန်ကျစရိတ်တွေ ပိုမိုများပြားလာပေမယ့်လည်း ကျွန်တော်တို့ ပျော်ရွှင်မိပါတယ်။ တယ်လီဂရမ် အပ်ပ်ဟာ ကုန်ကျစရိတ်တွေနဲ့ပတ်သက်ရင် ထိရောက်တဲ့လုပ်ဆောင်မှုတွေရှိပြီး ပြီးခဲ့တဲ့နှစ်တည်းက ငွေရှာတာနဲ့ ပတ်သက်ပြီး အကောင်းဆုံး စတင်နိုင်ခဲ့ပါတယ်" ဟု ပြောခဲ့သည်။ 

တယ်လီဂရမ်သည် လက်ရှိအချိန်အထိ အမြတ်အစွန်းများ မရနိုင်သေးသော်လည်း တွစ်တာ နှင့် Snapchat တို့ထက် ပိုမိုကောင်းမွန်သော ရည်မှန်းချက်ပန်းတိုင်သို့ရောက်ရှိရန် နီးစပ်လာပြီဖြစ်ကြောင်း ပါဗယ်လ်ဒူရော့ဗ် က ပြောကြားခဲ့သည်။

၎င်းက "တစ်ချို့လူတွေက ကျွန်တော့်ကို အိမ် ဒါမှမဟုတ် ဂျက်လေယာဉ်ဝယ်သင့်တယ်လို့ အကြံပြုကြပါတယ်။ ဒါပေမယ့် အလုပ်ကိုပဲ အာရုံစိုက်နေရတာမျိုးကို ကျွန်တော်ပိုသဘောကျပါတယ်" ဟု ပြောသည်။

လူသန်းပေါင်းများစွာသည် အသုံးပြုသူများကိုဦးစားပေးသလို လွတ်လွတ်လပ်လပ်စာတိုပေးပို့နိုင်သည့် ပလက်ဖောင်းတစ်ခုကို လိုချင်ကြသောကြောင့် တယ်လီဂရမ်ကို အသုံးပြုကြခြင်းဖြစ်ကြောင်း ၎င်းက ပြောသည်။

တယ်လီဂရမ်အပ်ပ်ကို အသုံးပြုသူများ ပိုမိုများပြားလာအောင် လုပ်ဆောင်ရန်မှာ ၎င်း၏ တာဝန်တစ်ခုဖြစ်ကြောင်း ပါဗယ်လ်ဒူရော့ဗ် က ပြောကြားခဲ့သည်။ Forbes မဂ္ဂဇင်း၏ (၂ဝ၂၂) ခုနှစ် ဘီလျံနာများ စာရင်းတွင် ဖော်ပြချက်အရ ပါဗယ်လ်ဒူရော့ဗ်၏ အသားတင်ပိုင်ဆိုင်မှုမှာ အမေရိကန်ဒေါ်လာ(၁၁ ဒသမ ၅) ဘီလျံရှိကြောင်း သိရသည်။