ယွန်း (NSS) - ဇူလိုင် ၁၇

ကမ္ဘာ့ဉာဏ်တော်အမြင့်ဆုံးဖြစ်လာမည့် မာရဝိဇယဘုရား ပြီးစီးမှုအခြေအနေများကို ယာယီသမ္မတအပါအဝင် တာဝန်ရှိသူများအား တပ်ချုပ် ရှင်းလင်းပြသခဲ့ကြောင်း သတင်းရရှိသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဇူလိုင်လ(၁၆)ရက်တွင် မာရဝိဇယရုပ်ပွားတော်ကြီး တည်ဆောက်မှုပြီးစီးမှု အခြေအနေများကို ကြည့်ရှုပြီး ယာယီသမ္မတဦးမြင့်ဆွေ အပါအဝင် နိုင်ငံတော်သမ္မတ(ငြိမ်း) ဦးသိန်းစိန်နှင့် တာဝန်ရှိသူများကို ရှင်းလင်းပြသခဲ့ကြောင်း သိရသည်။

“မာရဝိဇယ” ဗုဒ္ဓရုပ်ပွားတော်မြတ်ကြီးကို မြန်မာနိုင်ငံတွင် ထေရဝါဒဗုဒ္ဓသာသနာတော်ကြီး ခိုင်မာစွာထွန်းလင်း တောက်ပလျက်ရှိမှုအား ကမ္ဘာကိုပြသရန်၊ မြန်မာနိုင်ငံသည်ထေရဝါဒဗုဒ္ဓဘာသာကိုးကွယ်မှု၏ ဗဟိုချက်ဖြစ်စေရန်၊ တိုင်းပြည်အေးချမ်းသာယာမှုရှိစေရန်၊ ကမ္ဘာကြီးငြိမ်းချမ်းသာယာမှုဖြစ်စေရန် စသည့် ရည်ရွယ်ချက်(၄)ရပ်ဖြင့် တည်ထားကိုးကွယ်ခဲ့ခြင်းဖြစ်ကြောင်း သိရသည်။

ရုပ်ပွားတော်ကြီးထုဆစ်ရန်အတွက် ကျောက်တုံးကြီးများတူးဖော်ခြင်းလုပ်ငန်းကို အဆင့်ဆင့်ဆောင်ရွက်ခဲ့ပြီး အဆိုပါကျောက်တုံးကြီးများကို ရတနာပုံခေတ်ဟန် ဘူမိဖဿမုဒြာ ဆင်းတုတော်ကြီးအဖြစ် တည်ထားကိုးကွယ်ရန် ဆောင်ရွက်ခဲ့ကြောင်း နစကဥက္ကဋ္ဌက ပြောကြားခဲ့သည်။

ထို့ပြင် ရုပ်ပွားတော်ထုဆစ်မည့် ဆင်းတုတော်အပိုင်းများနှင့် ပလ္လင်တော်အပိုင်းကျောက်တုံးကြီးများကို အပိုင်းလိုက်ခွဲ၍ ရေလမ်းကြောင်း၊ ကုန်းလမ်းကြောင်းများဖြင့် အဆင့်ဆင့်ပင့်ဆောင်ခဲ့ပြီး အဆိုပါသယ်ဆောင်မှုသည် ကမ္ဘာ့အလေးချိန်အများဆုံး ရေလမ်းခရီး နှင့် ကုန်လမ်းခရီးသယ်ဆောင်မှုဖြစ်ခဲ့ကြောင်း ၎င်းက ဆက်လက်ပြောကြားခဲ့သည်။

ပြီးခဲ့သည့် ၂၀၂၀ ခုနှစ်၊ ဇူလိုင်လ(၃)ရက်တွင် ကျောက်တုံးတော်ကြီးများ စတင်ပင့်ဆောင်ခြင်းကို ဆောင် ရွက်ခဲ့ပြီး ကျောက်တုံးတော်ကြီးများကို စုစုပေါင်း (၉)ကြိမ်ပင့်ဆောင်ခဲ့၍ တန်ချိန်အားဖြင့် (၈၁၅၈) တန်သယ်ဆောင်ခဲ့ရာ ရေလမ်းခရီးဖြင့် စကျင်ကျောက်တုံးကြီးကို သယ်ဆောင်ခြင်းသည် ကမ္ဘာပေါ်တွင်မှတ်တမ်းဝင်ခဲ့ကြောင်း သိရသည်။

အလားတူ ကျောက်တုံးတော်ကြီးများကို ကုန်းလမ်းခရီးဖြင့်သယ်ယူရာတွင် စုစုပေါင်း (၇) ခေါက်သယ်ယူခဲ့ရပြီး အလေးချိန်အနေဖြင့် (၇၆၃၂)တန်ရှိခဲ့ကြောင်း သိရသည်။

လက်ရှိတွင် မာရဝိဇယရုပ်ပွားတော်ကြီးအား ထုဆစ်မှုသည် ရာနှုန်းပြည့်နီးပါးပြီးစီးနေပြီဖြစ်၍ လာမည့် သြဂုတ်လ(၁)ရက်တွင် ဗုဒ္ဓါဘိသေကအနေကဇာတင် အခမ်းအနားကို ကျင်းပပြုလုပ်သွားမည်ဖြစ် ကြောင်း သိရသည်။

“မာရဝိဇယ” ဗုဒ္ဓရုပ်ပွားတော်မြတ်ကြီးသည် ကမ္ဘာပေါ်ရှိ ထိုင်တော်မူ ကျောက်ဆစ် ဗုဒ္ဓရုပ်ပွားတော်များတွင် ဉာဏ်တော်အမြင့်ဆုံးဖြစ်လာမည့် ရုပ်ပွားတော်တစ်ဆူဖြစ်ကြောင်း သိရသည်။

မာရဝိဇယဘုရားကြီးထုဆစ်ရန်အတွက် အဆိုပါ စကျင်ကျောက်တုံးကြီးကို ပြီးခဲ့သည့် ၂၀၁၇ ခုနှစ် နှောင်ပိုင်း၌ ယခင်နိုင်ငံတော် အကြီးအကဲ ဗိုလ်ချုပ်မှူးကြီး သန်းရွေက တပ်မတော်မှဦးဆောင်၍ ဘုရားတည်ထားကိုးကွယ်ရန် ဗိုလ်ချုပ်မှူးကြီးမင်းအောင်လှိုင်ထံ လွှဲအပ်လှူဒါန်းခဲ့ကြောင်း သိရသည်။