ယွန်း (NSS) - ဇူလိုင် ၉

မာရဝိဇယဗုဒ္ဓရုပ်ပွားတော်မြတ်ကြီး ဗုဒ္ဓါဘိသေက အနေကဇာတင်အခမ်းအနားကို သြဂုတ်လ(၁)ရက်တွင် ကျင်းပသွားမည်ဖြစ်ကြောင်း သာသနာရေးနှင့် ယဥ်ကျေးမှုဝန်ကြီးဌာနမှ သိရသည်။

နေပြည်တော်၊ ဒက္ခိဏသီရိမြို့နယ်တွင် တည်ထားကိုးကွယ်ရန် တည်ဆောက်နေသော ကမ္ဘာပေါ်ရှိ ထိုင်တော်မူကျောက်ဆစ်ရုပ်ပွားတော်များအနက် ဉာဏ်တော်အမြင့်ဆုံးဖြစ်လာမည့် မာရဝိဇယဗုဒ္ဓရုပ်ပွား‌တော်မြတ်ကြီးသည် လက်ရှိတွင် ရာနှုန်းပြည့်တည်ဆောက်ပြီးစီးပြီဖြစ်ကြောင်း သိရသည်။

“သြဂုတ်လ(၁)ရက် ဝါဆိုလပြည့်နေ့မှာ အနေကဇာတင်ပွဲ လုပ်မယ်ဆိုတာ မှန်ပါတယ်။ ဗုဒ္ဓဘာသာဓလေ့ထုံးတမ်းနဲ့အညီ ဆောင်ရွက်သွားမှာပါ။ အားလုံးပြီးသွားလို့ အနေကဇာတင်တာပါ” ဟု သာသနာရေးဝန်ကြီးဌာန ညွှန်ကြားရေးမှူး ဦးအောင်ဆန်းဝင်းက NP News ကိုပြောသည်။ 

“မာရဝိဇယ” ဗုဒ္ဓရုပ်ပွားတော်မြတ်ကြီးကို မြန်မာနိုင်ငံတွင် ထေရဝါဒဗုဒ္ဓသာသနာတော်ကြီး ခိုင်မာစွာထွန်းလင်းတောက်ပလျက်ရှိမှုအား ကမ္ဘာကိုပြသရန်၊ မြန်မာနိုင်ငံသည်ထေရဝါဒဗုဒ္ဓဘာသာကိုးကွယ်မှု၏ ဗဟိုချက်ဖြစ်စေရန်၊ တိုင်းပြည်အေးချမ်း သာယာမှုရှိစေရန်၊ ကမ္ဘာကြီးငြိမ်းချမ်းသာယာမှုဖြစ်စေရန် စသည့် ရည်ရွယ်ချက် (၄)ရပ်ဖြင့် တည်ထားကိုးကွယ်ရန် လုပ်ဆောင်ခဲ့ခြင်းဖြစ်ကြောင်း သိရသည်။

ထို့ကြောင့် လာမည့် ဒုတိယဝါဆိုလပြည့်နေ့(သြဂုတ်လ ၁ ရက်)တွင် မာရဝိဇယရုပ်ပွားတော်မြတ်ကြီး ဗုဒ္ဓါဘိသေကအနေကဇာတင် မင်္ဂလာအခမ်းအနားနှင့်အတူ ကျောက်စာရံစေတီတော်များ ရွှေထီးတော်တင်လှူခြင်းနှင့် ရေစက်ချအောင်ပွဲကို ကျင်းပသွားမည်ဖြစ်ကြောင်း သိရသည်။

မာရဝိဇယဗုဒ္ဓရုပ်ပွားတော်မြတ်ကြီးကို တည်ဆောက်ရန် ပန္နက်ရိုက်ခဲ့သည်မှ ရက်ပေါင်း ၁ဝဝဝ ကျော် ၊နှစ်ကာလအားဖြင့် သုံးနှစ် ကျော်ကာလသို့ရောက်ရှိခဲ့ပြီးဖြစ်ကြောင်း သိရသည်။

ဘုရားကြီးထုဆစ်ရန် ၂ဝ၁၈ ခုနှစ် အောက်တိုဘာလမှ စတင်ကာတူးဖော်ခဲ့ပြီး ၂ဝ၁၉ ခုနှစ် မတ်လ၌ အမြင့် ၆၅ ပေ၊ ရှေ့အလျား ၁၅၄ ပေ၊ ထု ပေ ၂ဝ ရှိ A အဆင့်ရှိသည့် စကျင်ကျောက်တော်ကြီးကို အကြမ်းထည်ပုံဖော်နိုင်ခဲ့ကြောင်းသိရသည်။

အဆိုပါ စကျင်ကျောက်တုံးကြီးကို နေပြည်တော်သို့လေးလကြာ ရေကြောင်းကုန်ကြောင်းတို့ဖြင့်သယ် ဆောင်ကာ ဆင်းတုတော်ကြီးကို အပိုင်းလိုက်ခွဲ၍ CNC စက်များဖြင့် အဆင့်ဆင့် ထွင်းထုခဲ့ခြင်းဖြစ် ကြောင်း သိရသည်။

ထို့နောက် ဗုဒ္ဓရုပ်ပွားတော်မြတ်ကြီး၏ ဆင်းတုတော်အပိုင်း (၁/၂/၃) တို့ကိုတွဲဆက်ထားသည့် ဆင်းတု တော်အစိတ်အပိုင်းကြီးကို ၂ဝ၂၃ ခုနှစ် ဇန်နဝါရီလ ၂၆ ရက်တွင် ရတနာပလ္လင်တော်ထက်သို့ စတင်ပင့်ဆောင်ခဲ့ကာ ဇန်နဝါရီလ ၃၁ ရက်တွင် ပလ္လင်တော်ထက်သို့ အောင်မြင်စွာပင့်ဆောင်ပူဇော်နိုင်ခဲ့ပြီး ဌာပနာသွင်းလှူပူဇော်ခြင်း မဟာမင်္ဂလာအခမ်းအနားများကို ဇန်နဝါရီလ ၂၇ ရက် နှင့် ဖေဖော်ဝါရီလ ၁ဝ ရက်တို့တွင်အောင်မြင်စွာ ပြုလုပ်ပြီးစီးခဲ့ပြီးဖြစ်သည်။

အလားတူ ဖေဖော်ဝါရီလ ၁၁ ရက်တွင် ဆင်းတုတော်အပိုင်း (၄)ကို ရတနာပလ္လင်တော်ထက်သို့ ပင့် ဆောင်ပူဇော်ခြင်း မဟာမင်္ဂလာအခမ်းအနားကို ကျင်းပပြုလုပ်ခဲ့ကြောင်း သိရသည်။