ယွန်း (NSS) - ဇူလိုင် ၇

ကမ္ဘာ့အမွေအနှစ်စာရင်းဝင်ဖြစ်သည့် ပုဂံဒေသရှိ ရှေးဟောင်းအဆောက်အအုံများအား ပြုပြင်ထိန်းသိမ်းရေးဆောင်ရွက်ရာ၌ နိုင်ငံတကာ စံချိန်စံညွှန်းများနှင့်အညီ ဆောင်ရွက်ရန် ပြည်ထောင်စုဝန်ကြီးက တိုက်တွန်းပြောကြားခဲ့သည်။

ကာကွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးက နေပြည်တော်ရှိ သာသနာရေးနှင့် ယဥ်ကျေးမှုဝန်ကြီးဌာန၊ အမျိုးသားစာကြည့်တိုက် ဝန်ဇင်းမင်းရာဇာခန်းမတွင် ဇူလိုင်လ(၆)ရက်က ကျင်းပခဲ့သော အစည်းအဝေး၌ အထက်ပါကဲ့ ပြောကြားခဲ့ခြင်းဖြစ် သည်။

ပုဂံဒေသသည် ကမ္ဘာ့အမွေအနှစ်စာရင်းဝင်ဒေသအဖြစ် ထိုက်တန်စွာရရှိထားသော ဒေသဖြစ်ပြီး နိုင်ငံတကာက အထူးစိတ်ဝင်စားသော ယဥ်ကျေးမှုနယ်မြေဖြစ်ကြောင်း ဗိုလ်ချုပ်ကြီးမြထွန်းဦးက ပြောကြားခဲ့သည်။

ထို့ကြောင့် ရှေးဟောင်းအဆောက်အအုံများ ပြုပြင်ထိန်းသိမ်းရေး ဆောင်ရွက်ရာတွင် နိုင်ငံတကာလက်ခံအသုံးပြုနေသည့် ထိန်းသိမ်းရေးဆိုင်ရာ လိုက်နာရမည့် စည်းမျဥ်းများနှင့် နိုင်ငံတကာ စံချိန်စံညွှန်းများနှင့်အညီ ဆောင်ရွက်သွားရန် လိုအပ်ကြောင်း ပြည်ထောင်စုဝန်ကြီးက တိုက်တွန်းပြောကြားခဲ့သည်။  

ထို့ပြင် ပြည်တွင်း၊ ပြည်ပရှိ ပညာရှင်များနှင့် ဖွဲ့စည်းထားသော နိုင်ငံတကာ ပူးပေါင်းဆောင် ရွက်ရေး ကော်မတီ၏အကြံပြုချက်များကိုလည်း လိုက်နာသင့်ကြောင်း ၎င်းက ဆက်လက်ပြောကြားခဲ့သည်။

ပြီးခဲ့သည့် ၂ဝ၁၆ ခုနှစ်၊ သြဂုတ်လ(၂၄)ရက်က လှုတ်ခတ်ခဲ့သည့် ငလျင်ကြောင့် ပုဂံဒေသရှိ စေတီပုထိုးများအနက် (၃၈၉)ဆူ ထိခိုက်ပျက်စီးခဲ့ကြောင်း သိရသည်။

အဆိုပါ ပျက်စီးခဲ့သည့် စေတီပုထိုးများအား ပြုပြင်ထိန်းသိမ်းရေးများ ဆောင်ရွက်ခဲ့ရာ စေတီပုထိုး(၃၈၉)ဆူအနက် တရုတ်နိုင်ငံနှင့် ပူးပေါင်း၍ (၉)နှစ်စီမံကိန်းဖြင့် ပြင်ဆင်ရန် စီမံနေသည့် သဗ္ဗညုဘုရားကြီးမှလွဲ၍ ကျန်ဘုရားအားလုံးကို ပထမအဆင့် ပြုပြင်ထိန်းသိမ်းမှုများ ဆောင်ရွက်ပြီးဖြစ်ရာ ရာနှုန်းပြည့်နီးပါးပြီးစီးပြီးဖြစ်ကြောင်း ပြည်ထောင်စုဝန်ကြီးမှ ပြောကြားခဲ့သည်။

ထို့ပြင် စီမံကိန်းဆောင်ရွက်ခဲ့သည့် လေးနှစ်တာကာလအတွင်း ငလျင်ကြောင့်ထိခိုက်ခဲ့သည့် ဘုရားစေတီပုထိုးများသာမက သဘာဝဘေးကြောင့် ပြုပြင်ရန်လိုအပ်နေသည့် နောက်ထပ်ဘုရားအဆူ(၁၁ဝ)ကိုလည်း ဆောင်ရွက်ပြီးစီးခဲ့ကြောင်း သိရသည်။

သို့ဖြစ်၍ စုစုပေါင်း ဘုရား(၄၉၉)ဆူ ထိန်းသိမ်းပြုပြင်ပြီးဖြစ်ကြောင်း သိရသည်။

ထို့ပြင် ပြီးခဲ့သည့် မေလက တိုက်ခတ်ခဲ့သည့် မိုခါမုန်တိုင်းကြောင့် ပုဂံဒေသရှိ ရှေးဟောင်းစေတီပုထိုး (၄၅)ဆူ အနည်းငယ်ထိခိုက်ပျက်စီးခဲ့ပြီး သုံးဆူပြုပြင်ပြီးစီးခဲ့ပြီဖြစ်ကြောင်း သိရသည်။ 

ထိုသို့‌ဆောင်ရွက်ရာ၌ ထပ်မံဖြစ်ပေါ်လာနိုင်သည့် သဘာဝဘေးအန္တရာယ်များအတွက်ပါ ကြိုတင်မျှော်မှန်းပြီး နှစ်အလိုက် အဆင့်ဆင့် ကြိုတင်ကာကွယ်ထိန်းသိမ်းသွားရန် ပြည် တွင်း၊ ပြည်ပမှပညာရှင်များ၏ နည်းပညာအကူအညီများနှင့် အကြံဉာဏ်များကို ရယူခဲ့ကြောင်း ပြည်ထောင်စုဝန်ကြီးက ပြောကြားခဲ့သည်။