Htay Oung (NSS) - စက်တင်ဘာ ၂၆

အိန္ဒိယနိုင်ငံဟာ ယခု စမ်းသပ်ပစ်လွှတ်နေတဲ့ သူ့ရဲ့ ဒုံးကျည်အတွက် သတိပေးချက်ကို ပြန်လည်ပြင်ဆင်ခဲ့ကြောင်း တွေ့ရှိရပါတယ်။ ယခင်သတ်မှတ်ထားတဲ့ အန္တရာယ်ဇုန်ကို တိုးချဲ့ထားခြင်းကြောင့် ယခုစမ်းသပ်နေ တဲ့ ဒုံးကျည်ဟာ ပိုမို အင်အားပြင်းလက်နက်ဖြစ်ဖွယ်ရှိကြောင်း နယူးဒေလီထောက်လှမ်းရေးရဲ့ လက်ခွဲတစ်ခုဖြစ်တဲ့ “အိန္ဒိယကာကွယ်ရေးသုတေသနဌာန”က စက်တင်ဘာလ ၂၄ ရက်မှာရေးသားပါတယ်။

စက်တင်ဘာ ၂၃ ရက်နေ့တုန်းက ထုတ်ပြန်ခဲ့တဲ့ မူလ “ရေကြောင်းသွားလာသူများအတွက် သတိပေးချက် များ” အရ သီရိလင်္ကာနိုင်ငံနဲ့ (အင်ဒိုနီးရှား) စူမားးတြားကျွန်းတို့အကြား အန္တရာယ်ကျရောက်ဖွယ်ရှိတဲ့ ဧရိယာ ဟာ ဒေါင်လိုက် မိုင်ပေါင်း ၁၀၇၀ မျှ ရှည်လျှားခဲ့ကြောင်း တွေ့ရှိရပါတယ်။ ယခု ပြန်လည်ပြင်ဆင်ချက်အရ အန္တရာယ်ကျရောက်ဖွယ်ရှိတဲ့ ဧရိယာဟာ မူလအကျယ်အဝန်းအပြင် ဘင်္ဂလားဒေ့ရှ်နိုင်ငံ အပါအဝင် မြန်မာ့ကမ်းရိုးတန်း အနောက်ဖက်တစ်ခွင်လုံးနဲ့ အိန္ဒိယတိုက်ငယ် အရှေ့ဖက်ကမ်းရိုးတန်းတစ်လျှောက် ပင်လယ်ပြင်ကို ခြုံငုံထားကြောင်း တွေ့ရှိရပါတယ်။ ဒီအတွက် စမ်းသပ်ပစ်လွှတ်မယ့် ဒုံးကျည်ဟာ ပိုမိုအင်အားပြင်းထန်ဖွယ်ရှိတယ်လို့ အရိပ်အမြွက်ဖော်ပြထားလို ရှိနေပါတယ်။

သက္ကတဘာသာ “ရန်ပုံခွင်း” လို့ အဓိပ္ပါယ်ရတဲ့ “အက်ဂနီး-ဝမ်း-ပီ” ဒုံးကျည်ဟာ နျူကလီယာ ထိပ်ဖူးသယ် ဆောင်နိုင်ပြီး အဆင့် ၂-ဆင့်ပါ မြေပြင်မှ မြေပြင်သို့ ပစ်ခတ်တဲ့ တိုက်ချင်းပစ် ပဲ့ထိန်းအမျိုးအစားဖြစ်ပါတယ်။ တာလတ်ပစ်မှ ကမ္ဘာပတ်လမ်းကြောင်း အတွင်း ဝင်ရောက်ပြီး ကမ္ဘာ့တိုက်ကြီးတစ်တိုက်မှ အခြားတစ်တိုက်သို့ ပစ်လွှတ်နိုင်စွမ်းရှိပါတယ်။ ယခုစမ်းသပ်မယ့် ဒုံးကျည်ကတော့ ပျံသန်းရာလမ်းကြောင်း၊ တင်ဆောင်ရွေ့လျားပုံ၊ လောင်စာဖြည့်တင်းထားပုံတို့အရ တာလတ်ပစ်ဖြစ်လိမ့်မယ်လို့ ခန့်မှန်းရပါတယ်။ ဒါပေမယ့် ဘယ်လိုအမျိုးအ စားဖြစ်တယ်ဆိုတာကိုတော့ စမ်းသပ် ပစ်လွှတ်တဲ့အခါရောက်မှသာ အတိအကျသိရှိနိုင်ပါလိမ့်မယ်။

ယခုဒုံးကျည်စမ်းသပ်မှုကို ၂၀၂၄ ခုနှစ် စက်တင်ဘာ ၂၅ ရက်နေ့မှ ၃၀ ရက်နေ့အထိ ပြုလုပ်ရန် စီစဉ်ထား တယ်လို့ ဆိုပါတယ်။ “ရေကြောင်းသွားလာသူများအတွက် သတိပေးချက်များ” အရ အိန္ဒိယအနေနဲ့ သူ့ရဲ့ မဟာဗျူဟာမြောက် စစ်စွမ်းရည်ကို မြှင့်တင်ရန်နဲ့ ခိုင်မာတဲ့ ကာကွယ်ရေးအနေအထားကို ထိန်းသိမ်းရန် ဆုံးဖြတ်ထားကြောင်း သိသာနိုင်တယ်လို့ နယူးဒေလီထောက်လှမ်းရေးဌာနက ဖော်ပြထားပါတယ်။

(India Defence Research Wing., 24 September 2024,”India revises NOTAM for upcoming” ကို ဆီလျော်အောင် ဘာသာပြန်ဆိုသည်။)