Pika (NSS) - စက်တင်ဘာ ၁၉

မြောက်ကိုရီးယားအစိုးရဟာ အလွန်ကြီးမားတဲ့ထိပ်ဖူးတွေအသုံးပြုထားတဲ့ မဟာဗျူဟာမြောက်ပဲ့ထိန်းဒုံးကျည်အသစ်တွေနဲ့ ပြုပြင်မွမ်းမံထားတဲ့ခရုဇ်ဒုံးကျည်တွေကို စက်တင်ဘာလ(၁၈)ရက်နေ့မှာ စမ်းသပ်ခဲ့တယ်လို့ နိုင်ငံပိုင်မီဒီယာ KCNA က ရေးသားဖော်ပြခဲ့ပါတယ်။

မြောက်ကိုရီးယားနိုင်ငံရဲ့ စစ်လက်နက်ပစ္စည်းတွေ နဲ့ နျူကလီးယားစွမ်းရည်တွေကို ပိုမိုအားကောင်းအောင်လုပ်ဆောင်ဖို့ မြောက်ကိုရီးယားခေါင်းဆောင်ကင်ဂျုံအန်းက တောင်းဆိုမှုနဲ့အတူ ယခုလိုစမ်းသပ်မှုတွေထွက်ပေါ်လာတာဖြစ်ပါတယ်။ မြောက်ကိုရီးယားရဲ့လုံခြုံရေးကို ပြင်ပတပ်ဖွဲ့တွေရဲ့ ခြိမ်း ခြောက်မှုတွေက မြင့်မားလာနေတာမလို့ စစ်လက်နက်ပစ္စည်းတွေရဲ့စွမ်းရည်တွေ မြှင့်တင်ဖို့စမ်းသပ်မှုတွေက လိုအပ်တယ်လို့ စမ်းသပ်မှုကိုကြီးကြပ်ခဲ့တဲ့ ကင်ဂျုံအန်းက ပြောကြားခဲ့ပါတယ်။ 

မြောက်ကိုရီးယားဟာ စက်တင်ဘာလ(၁၈)ရက်နေ့ အစောပိုင်းမှာ တာတိုပစ်ပဲ့ထိန်းဒုံးကျည်အများအပြားကို စမ်းသပ်ပစ်လွှတ်ပြီးနောက် ယခုလိုစမ်းသပ်မှုတွေ ထပ်မံလုပ်ဆောင်ခဲ့တာဖြစ်တယ်လို့လည်း သိရပါတယ်။  မြောက်ကိုရီးယားဟာ ပြီးခဲ့တဲ့စက်တင်ဘာလ(၁၂)ရက်နေ့မှာ တာတိုပစ်ပဲ့ထိန်းဒုံးကျည်တွေကို စမ်းသပ်ပစ်လွှတ်ခဲ့ပြီး သီတင်းပတ်(၁)ပတ်မပြည့်ခင်မှာပဲ ယခုလိုထပ်မံစမ်းသပ်ပစ်လွှတ်ခဲ့တာ ဖြစ်တယ်လို့လည်း သိရပါတယ်။ဒါ့ပြင် မြောက်ကိုရီးယားအစိုးရဟာ ယူရေနီယမ်သန့်စင်တဲ့စက်ရုံရဲ့ ဓါတ်ပုံတွေကို ပြီးခဲ့တဲ့သီတင်းပတ်မှာ ပထမဆုံးအကြိမ်ထုတ်ပြန်ပြသခဲ့တယ်လို့လည်းသိရပါတယ်။

ကင်ဂျုံအန်းက "နျူကလီးယားစွမ်းရည်ကို ဆက်လက်မြှင့်တင်ပြီး အားအ ကောင်းဆုံးစစ်ဘက်ဆိုင်ရာ နည်းပညာစွမ်းရည်တွေနဲ့ အလွန်အားကောင်းတဲ့ထိုးစစ်ဆင်နိုင်စွမ်းတွေရှိဖို့ လိုအပ်ပါတယ်"လို့ ပြောဆိုခဲ့ပါတယ်။ စက် တင်ဘာလ(၁၈)ရက်နေ့က လုပ်ဆောင်ခဲ့တဲ့ စမ်းသပ်မှုအတွင်း မဟာဗျူဟာမြောက် Hwasongpho-11-Da-4.5 ပဲ့ထိန်းဒုံးကျည်အသစ်တွေလည်း ပါဝင်တယ်လို့ KCNA ကဖော်ပြခဲ့ပါတယ်။ ဒါ့ပြင် အဲဒီပဲ့ထိန်းဒုံးကျည်အသစ်မှာ အလေးချိန်(၄ ဒသမ ၅)တန်ရှိတဲ့ အလွန်ကြီးမားတဲ့ထိပ်ဖူးကို တပ်ဆင်ထားတယ်လို့လည်း KCNA ကဖော်ပြခဲ့ပါတယ်။