Pika (NSS) - ဩဂုတ် ၂၉

ယူကရိန်းနိုင်ငံဟာ ၎င်းရဲ့ပထမဆုံးပြည်တွင်းထုတ် ပဲ့ထိန်းဒုံးကျည်ကို အောင်မြင်စွာစမ်းသပ်ပစ်လွှတ်နိုင်ခဲ့တယ်လို့ သမ္မတဇီလန်စကီးက ထုတ်ဖော်ပြောဆိုခဲ့ပါတယ်။

ရုရှားနယ်မြေအတွင်းကို တိုက်ခိုက်ဖို့အတွက် အနောက်အုပ်စုထုတ်ဒုံးကျည်စနစ်တွေကို အသုံးပြုခွင့်ပေးဖို့ ၎င်း၏အနောက်အုပ်စုကျောထောက်နောက် ခံနိုင်ငံတွေကို ယူကရိန်းကတောင်းဆိုမှုတွေလုပ်ဆောင်နေချိန်မှာပဲ ယခုလိုစမ်းသပ်ပစ်လွှတ်မှုထွက်ပေါ်လာတာဖြစ်ပါတယ်။ ဇီလန်စကီးက 'ယူကရိန်းမှာ အခြားတိုးတက်မှုတွေရှိလားဆိုတဲ့မေးခွန်းကို ဖြေပေးဖို့စောသေးတယ်လို့ ထင်မိပါတယ်။ ဒါပေမဲ့လည်း ပထမဆုံးယူကရိန်းထုတ် ပဲ့ထိန်းဒုံးကျည်ကို အပြုသဘောဆောင်တဲ့ စမ်းသပ်ပစ်လွှတ်မှုတစ်ခုရှိခဲ့ပါတယ်။ ဒီအတွက် ကျွန်တော်တို့ရဲ့စစ်ဘက်ဆိုင်ရာ ထုတ်လုပ်မှုတွေကို ကျေးဇူးတင်ပါတယ်' လို့ပြောဆိုခဲ့ပါတယ်။

ဒါပေမဲ့လည်း အဲဒီပဲ့ထိန်းဒုံးကျည်နဲ့ပတ်သက်ပြီး နောက်ထပ်အသေးစိတ်အချက်အလက်တွေကိုပြောဆိုဖို့ ဇီလန်စကီးက ငြင်းပယ်ခဲ့တယ်လို့လည်း သိရပါတယ်။ ရုရှားပစ်မှတ်တွေကို ပစ်ခတ်တိုက်ခိုက်ဖို့အတွက် Palyanitsa ဒုံးကျည်ဒရုန်းကို အသုံးပြုခဲ့တယ်လို့ ထုတ်ပြန်ကြေညာပြီးနောက် ရက်ပိုင်းအကြာမှာ ယခုလိုစမ်းသပ်ပစ်လွှတ်မှု ထွက်ပေါ်လာတာဖြစ်ပါတယ်။ အဲဒီပဲ့ထိန်းဒုံးကျည်ဟာ မြေပြင်ကနေပစ်လွှတ်ရတာဖြစ်ပြီး အကွာအဝေး (၇၀၀) ကီလိုမီတာလောက်အထိ ရောက်ရှိနိုင်တယ်လို့ ယူကရိန်းအရာရှိတွေကပြောကြားခဲ့ပါတယ်။ ရုရှားနဲ့ဖြစ်ပွားနေတဲ့ စစ်ပွဲမှာ ယူကရိန်းဟာ အနောက် အုပ်စုက ထောက်ပံ့ပေးထားတဲ့ အမေရိကန်ထုတ် HIMARS နဲ့ ATACMS ဒုံးကျည်စနစ်တွေအပေါ်မှာ များစွာမှီခိုနေရတာလည်းဖြစ်ပါတယ်။ ဒါ့ပြင် ယူကရိန်းဘက်က အကြိမ်ကြိမ်တောင်းဆိုနေပေမယ့်လည်း အနောက်အုပ်စုနိုင်ငံတွေက ရုရှားနယ်မြေအတွင်းမှာရှိတဲ့ ပစ်မှတ်တွေကို တိုက်ခိုက်ဖို့အတွက် ၎င်းတို့ရဲ့စစ်လက်နက်ပစ္စည်းတွေအသုံးမပြုဖို့ တားမြစ်ပိတ်ပင်ထားဆဲဖြစ်တယ်လို့ သိရပါတယ်။