Pika (NSS) - ဩဂုတ် ၂၆

မြောက်ကိုရီးယားအစိုးရဟာ အသေခံဒရုန်းအသစ်တွေကို ထုတ်ပြန်ပြသခဲ့ပြီး အသေခံဒရုန်းတွေရဲ့စွမ်းဆောင်ရည်စမ်းသပ်မှုကို မြောက်ကိုရီးယားခေါင်းဆောင်ကင်ဂျုံအန်းက ကိုယ်တိုင်ကြီးကြပ်ခဲ့တယ်လို့ နိုင်ငံပိုင်မီဒီယာ KCNA က ဩဂုတ်လ(၂၆)ရက်နေ့မှာ ရေးသားဖော်ပြခဲ့ပါတယ်။

အဲဒီအသေခံဒရုန်းအသစ်တွေဟာ ရုရှားဆီကနေ လာတာဖြစ်နိုင်တယ်လို့ ကျွမ်းကျင်သူတွေက သုံးသပ်ပြောကြားခဲ့ပါတယ်။ အသေခံဒရုန်းအသစ်တွေဟာ ပစ်မှတ်တွေကိုထိမှန်ပြီး ပေါက်ကွဲသွားတာကို ကင်ဂျုံအန်းက ကြည့်ရှုနေတဲ့ ဓါတ်ပုံတွေကို KCNA က ပြသခဲ့တယ်လို့လည်း သိရပါတယ်။ မဟာ ဗျူဟာ မြောက်ထောက်လှမ်းရေးဒရုန်းတွေနဲ့ ဘက်စုံသုံးတိုက်ခိုက်ရေဒရုန်းတွေအပြင် အသေခံဒရုန်းတွေကို ဖွံ့ဖြိုးတိုးတက်အောင် တီထွင်ဖန်တီးပြီး ပိုမိုထုတ်လုပ်ဖို့ လိုအပ်တယ်လို့ ကင်ဂျုံအန်းက ပြောကြားခဲ့ကြောင်း KCNA က ရေးသားဖော်ပြထားပါတယ်။ 

အသေခံဒရုန်းတွေဟာ ဖောက်ခွဲရေးပစ္စည်းတွေတင်ဆောင်လာတဲ့ ဒရုန်းတွေဖြစ်ပြီး ရန်သူတွေရဲ့ပစ်မှတ်တွေကို တိတိကျကျတိုက်ခိုက်နိုင်အောင် ဒီဇိုင်းထုတ်ထားပြီး ပဲ့ထိန်းဒုံးကျည်တွေလိုမျိုး လုပ်ဆောင်နိုင်စွမ်းရှိတယ်လို့လည်း သိရပါတယ်။ မြောက်ကိုရီးယားအစိုးရဟာ ၎င်းရဲ့ကြီးထွားလာနေတဲ့ ဒရုန်းတပ်ဖွဲ့တွေကို မြေပြင်နဲ့ပင်လယ်ပြင်မှာရှိတဲ့ ရန်သူတွေရဲ့ပစ်မှတ်တွေကို တိုက်ခိုက်ဖို့အတွက် မတူညီတဲ့တိုက်ခိုက်မှုအကွာအဝေးအတွင်းမှာ အသုံးပြုသွားမှာဖြစ်တယ်လို့လည်း KCNA ကရေးသားဖော်ပြထားပါတယ်။

ဩဂုတ်လ(၂၄)ရက်နေ့မှာ မြောက်ကိုရီးယားက စမ်းသပ်ခဲ့တဲ့ဒရုန်းတွေအားလုံးဟာ မတူညီတဲ့လမ်းကြောင်းတွေတစ်လျှောက် ပျံသန်းကာ သတ် မှတ်ထားတဲ့ပစ်မှတ်တွေကို မှန်မှန်ကန်ကန်ဖော်ထုတ်ပြီး ဖျက်ဆီးပစ်နိုင်ခဲ့တယ်လို့ KCNA ကဖော်ပြထားပါတယ်။ မြောက်ကိုရီးယားနိုင်ငံဟာ ဒရုန်းတွေဖွံ့ဖြိုးတိုးတက်ရေးအတွက် AI နည်းပညာကို မိတ်ဆက်ဖို့ ဆက်လက်လုပ်ဆောင်သွားမှာဖြစ်တယ်လို့လည်း ကင်ဂျုံအန်းက ပြောကြားခဲ့ပါတယ်။မြောက်ကိုရီးယားက ထုတ်ပြန်ပြသခဲ့တဲ့ ဒရုန်းတွေဟာ အစ္စရေးထုတ် “HAROP” အသေခံဒရုန်း၊ ရုရှားထုတ်“Lancet-3”အသေခံဒရုန်း၊ အစ္စရေးထုတ် HERO 30 အသေခံဒရုန်းတွေနဲ့ဆင်တူတယ်လို့ ကျွမ်းကျင်သူတွေက ပြောကြားခဲ့ပါတယ်။