ပုံစာ - မေလ ၅ ရက် က ပြုလုပ်ခဲ့သော အဋ္ဌမအကြိမ် နိုင်ငံတော်သံဃမဟာနာယကအဖွဲ့ ၄၇ ပါးစုံညီသော ဠသမအစည်းအဝေး ပထမနေ့ မြင်ကွင်း

သုတကျော် (NSS) - မတ် ၈

လစ်လပ်လျက်ရှိသော နိုင်ငံတော်ဗဟိုသံဃာ့ဝန်ဆောင်အဖွဲ့နှင့် နိုင်ငံတော်သံဃမဟာနာယက အဖွဲ့တို့၏ ပဉ္စမမြောက်ဥက္ကဋ္ဌနေရာကို မနက်ဖြန် (မတ်လ ၉ ရက်) တွင် ရွေးချယ်မည်ဖြစ်ကြောင်း ထွက်ပေါ်နေသော သတင်းများ အရ သိရသည်။

နိုင်ငံတော် သံဃမဟာနာယကအဖွဲ့ (မဟန) သည် သာသနာတော် သန့်ရှင်းတည်တံ့ပြန့်ပွားရေးအတွက် အဆင့် အမြင့်ဆုံး သံဃအဖွဲ့အစည်းဖြစ်ကာ ဥက္ကဋ္ဌဆရာတော်ကြီးဖြစ်သည့် ဒေါက်တာဘဒ္ဒန္တကုမာရာဘိဝံသ ဘဝနတ်ထံ ပျံလွန်တော်မူပြီးနောက် အဆိုပါရာထူးနေရာ လစ်လပ်နေခဲ့ခြင်းဖြစ်ကြောင်း သိရသည်။

“အစည်းအဝေးက ကမ္ဘာအေးမှာပဲ လုပ်မှာပါ။ အများဆုံးကတော့ လက်ရှိ အကျိုးတော်ဆောင်ပဲဖြစ်ဖို့ များမယ် ထင်တယ်။ ကျုပ်တို့ထင်တာလည်း အဲဒီလိုပဲ ထင်တာပဲပေါ့။ သန်လျင်ဆရာတော်ကြီးလေ။ သန်လျင်ဆရာတော် ကြီးဖြစ်ဖို့ များမယ်ထင်တယ်။ ဒါက ခန့်မှန်းတာပါ။ ရွေးပြီးတော့မှ သိရမှာပေါ့” ဟု ရန်ကုန်မြို့ရှိ ကျောင်းထိုင် ဆရာတော်တစ်ပါးက The Statesman ဂျာနယ်သို့ မိန့်ကြားသည်။

ဥက္ကဋ္ဌဆရာတော်ကို အစည်းအဝေးတွင် သံဃ ဆန္ဒဖြင့် ရွေးချယ်မည်ဖြစ်ကာ ဥက္ကဋ္ဌမှ သင့်တော်မည့် သံဃာတော် ကို အကျိုးဆောင်အဖြစ် ပြန်လည်ရွေးချယ်ပေးခြင်းဖြစ်ကြောင်းလည်း သိရသည်။

“အဓိက က ဥက္ကဋ္ဌ ဆရာတော်ကို ဗဟိုဝန်ဆောင် ဆရာတော်တွေကော သံဃမဟာနာယက ဆရာတော်တွေကော အကုန်လုံးက မဲပေးရွေးချယ်တာ။ ဥက္ကဌ ဆရာတော်ကမှ ဘယ်သူတော့ အကျိုးတော်ဆောင်ဖြစ်သင့်တယ်ဆိုတာ ရွေးမှာ။ နိုင်ငံတော်သံဃမဟာနယက အဖွဲ့ ၄၇ ပါး မှာ ဥက္ကဋ္ဌ ရယ် အကျိုးဆောင်ရယ် နှစ်ပါး ပြီးတော့ လေးဆယ့်ငါးပါး ကျန်တာကို ဆယ့်ငါးပါး တစ်ဖွဲ့စီ သုံးဖွဲ့ ဖွဲ့ပြီး ဒုတိယ ဥက္ကဋ္ဌ နှစ်ပါးစီ၊ နောက် တွဲဖက် အကျိုးတော် ဆောင် နှစ်ပါးစီ ဖွဲ့တာ။ တစ်ဖွဲ့ကို လေးလ ကမ္ဘာအေးကို လာရုံးထိုင်ရတာ” ဟု အထက်ပါဆရာတော်က မိန့်ကြား သည်။

ဗန်မော်ဆရာတော်ဘုရားကြီးသည် ယခင်ကပင် အနားယူရန်အတွက် ပြုလုပ်ခဲ့သော်လည်း လျှောက်ထား တောင်းပန်မှုများကြောင်း ပျံလွန်တော်မူသည်အထိ ဥက္ကဋ္ဌ ရာထူးကို ထမ်းဆောင်တော်မူခဲ့ခြင်းဖြစ်သည်။

“အခမ်းအနားနဲ့ လက်ခံတာမျိုးတော့ မဟုတ်ဘူး။ အစည်းအဝေးမှာ ရွေးပြီးပြီဆိုရင် တခါတည်းဖြစ်သွားတာပဲ။ ဥက္ကဋ္ဌ ဆရာတော်က နိုင်ငံတော်ဗဟိုသံဃာ့ဝန်ဆောင်အဖွဲ့မှာလည်း ဥက္ကဋ္ဌပဲ။ နိုင်ငံတော်သံဃမဟာနာယကအဖွဲ့ မှာလည်း ဥက္ကဋ္ဌပဲ။ ဗန်းမော်ဆရာတော်ကြီးတုန်းကလည်း ဒီအတိုင်းပါပဲ” ဟု ဆရာတော်က မိန့်ကြားသည်။