ဂျန်ဇက် (NSS) - ဇန်နဝါရီ ၆ 

ထူးဆန်းတဲ့ရောဂါကြောင့် ဆေးရုံတက်ကုသနေရတဲ့ အမေရိကန်ကာကွယ်ရေးဝန်ကြီးလွိုင်အော်စတင်ဟာ ဇန်နဝါရီ ၁၅ ရက်မှာ Walter Reed အမည်ရှိ စစ်ဆေးရုံက ပြန်ဆင်းလာခဲ့ကြောင်း သိရပါတယ်။ 

ကာကွယ်ရေးဝန်ကြီးလွိုင်အော်စတင်ဟာ ဆေးရုံတက်နေရတဲ့အကြောင်းကို လူသိရှင်ကြား သတင်းထုတ်ခြင်းမျိုး မရှိခဲ့ဘဲ လျှို့ဝှက်တက်ရောက်ခဲ့တာမျိုးဖြစ်ကာ လူမြင်ကွင်းမှာ ရက်အတန်ကြာပျောက်ကွယ်ခဲ့ပြီးနောက် ဆေးရုံ တက်ရောက်နေရတာကို သိခဲ့ရပါတယ်။

လွိုင်အော်စတင် ဆေးရုံတက်နေရခြင်းနဲ့ပတ်သက်ပြီး ရာထူးက ဖယ်ရှားဖို့ တောင်းဆိုတာတွေရှိခဲ့ပေမယ့် အမေရိကန်သမ္မတက ငြင်းဆန်ပယ်ချခဲ့ပါတယ်။ လွိုင်အော်စတင်က "ကျွန်တော်ကို Walter Reed ဆေးရုံက ဂရုစိုက်ပြီး ကြပ်မတ်ကုသပေးတဲ့အတွက် ကျေးဇူးတင်ပါတယ်။ ကျွန်တော်ကို အကောင်းဆုံးကုသပေးခဲ့တဲ့ ဆရာဝန်တွေနဲ့ သူနာပြုတွေကို ကျေးဇူးတင်ပါတယ်။ ကျွန်တော်ရဲ့အခြေအနေတွေဟာ သက်သာလာနေပြီး အလုပ်တွေကို အိမ်ကနေ လုပ်ဖို့ ရှိနေပါတယ်။ ကျွန်တော်ဟာ ကျန်းမာရေးကို အပြည့်အဝပြန်လည်သက်သာဖို့ စိတ်အားထက်သန်နေတယ်" လို့ ပြောပါတယ်။

အသက် ၇ဝ အရွယ်ရှိ အော်စတင်ဟာ ကင်ဆာရောဂါနဲ့ပတ်သက်ပြီး ဒီဇင်ဘာ ၂၂ ရက်မှာ အသေးစားခွဲစိတ်ကုသခဲ့ရပြီး လက်ရှိအချိန်မှာတော့ အိမ်ကို ပြန်လာခဲ့ပြီဖြစ်ကြောင်း သိရပါတယ်။ အော်စတင်ဟာ အမေရိကန် ကာကွယ်ရေးဝန်ကြီးသမိုင်းမှာ အာဖရိကန်-အမေရိကန်နွယ်ဖွား ပထမဆုံးကာကွယ်ရေးဝန်ကြီးဖြစ်လာသူဖြစ်ပြီး ဂျိုးဘိုင်ဒန် သမ္မတဖြစ်လာချိန်မှာ ကာကွယ်ရေးဝန်ကြီးအသစ်အဖြစ် ခန့်အပ်ခံရသူဖြစ်ကြောင်း သိရပါတယ်။ 

လွိုင်အော်စတင် ဆေးရုံတက်ရခြင်းဟာ သမ္မတဂျိုးဘိုင်ဒန်အတွက် ခေါင်းခဲစရာအခြေအနေမျိုးနဲ့ ရင်ဆိုင်ခဲ့ရကြောင်း သိရပါတယ်။