ကျော်(NSS) - ဇန်နဝါရီ ၉

မကွေးတိုင်း၊ မင်းဘူးမြို့နယ်ရှိ လုပ်ငန်းခွင်၌ ထိခိုက်မိသည့်အလုပ်သမားတစ်ဦးအား အမြဲတမ်းမသန်စွမ်း မှုနှင့်ဆိုင်သော အကျိုးခံစားခွင့် ငွေကျပ်သိန်း ၄၀ နီးပါးအား မင်းဘူးမြို့နယ် လူမှုဖူလုံရေးရုံးမှ ယမန်နေ့ (ဇန်နဝါရီလ ၈ ရက်)ကပေးအပ်ခဲ့ကြောင်း သိရသည်။

အမြဲတမ်းမသန်စွမ်းမှုနှင့်ဆိုင်သော အကျိုးခံစားခွင့်ရရှိသူသည် မင်းဘူးမြို့ရှိ မြို့နယ်လူမှုဖူလုံရေးရုံး၌ အကျုံးဝင်မှတ်ပုံတင်ထားသော ထောက်ရှာပင်-ထန်းကိုင်း-ရေနံမရေနံမြေတွင် အလုပ်လုပ်ကိုင်နေသော အာမခံအလုပ်သမား ဦးဝေလင်းထွန်းဖြစ်ကြောင်း သိရသည်။

ဦးဝေလင်းထွန်းသည် ပြီးခဲ့သည့် ၂၀၂၃ ခုနှစ်၊ ဇူလိုင်လ ၂၅ ရက်၊ ည ၉ နာရီခန့်က ထောက်ရှာပင်- ထန်းကိုင်း-ရေနံမရေနံမြေရှိ ကမ်းနီဒေသ၏ တွင်းအမှတ်(၂၆၈)၌ Pumping Unit ခုတ်မောင်းရန် 400 V O/H Line Connection ပေးနေစဉ် ဒန်းကြိုးဖြင့်ရိုက်ခတ်မိခဲ့ခြင်းဖြစ်ကြောင်း သိရသည်။

"ဒန်းကြိုးနဲ့ရိုက်မိသွားတဲ့အတွက် ဦးဝေလင်းထွန်းရဲ့ ဘယ်ဘက်မျက်လုံးကိုထိခိုက်မိသွားတယ်။ ထိခိုက်မိတဲ့အရှိန်နဲ့ မျက်လုံးကွယ်သွားခဲ့ပါတယ်။ လုပ်အားဆုံးရှုံးမှုက ၃၃ ဒသမ ၃၃ ရာခိုင်နှုန်းပါ။ ဒါကြောင့် (၇)နှစ်စာ အမြဲတမ်းမသန်စွမ်းမှုနဲ့ဆိုင်တဲ့ ငွေလုံးငွေရင်းအကျိုးခံစားခွင့်ပေးအပ်ခဲ့တာပါ"ဟု မင်းဘူးမြို့နယ်လူမှုဖူလုံရေးရုံး၏ တာဝန်ရှိသူတစ်ဦးကပြောသည်။

ထို့ကြောင့် မကွေးတိုင်းဒေသကြီးလူမှုဖူလုံရေးရုံးမှ အမြဲတမ်းမသန်စွမ်းမှုနှင့် ဆိုင်သည့် ငွေလုံးငွေရင်းအကျိုးခံစားခွင့် ငွေကျပ် ၃၈ သိန်းကျော်အား ပေးအပ်ခဲ့ကြောင်း သိရသည်။