ယွန်း (NSS) - ဇန်နဝါရီ ၇

ပြီးခဲ့သည့် ၂၀၂၃ ခုနှစ်အတွင်း သွေးလွန်တုပ်ကွေးဖြစ်ပွားသူ(၁၆၀၀၀)ကျော်ရှိခဲ့ပြီး ရန်ကုန် အပါအဝင် တိုင်းနှင့်ပြည်နယ်(၅)ခုတွင် အများဆုံးဖြစ်ပွားခဲ့ ကြောင်း ကျန်းမာရေးဝန်ကြီးဌာန၏ အချက်အလက်များအရသိရသည်။

၂၀၂၃ ခုနှစ်အတွင်း ဇန်နဝါရီလ(၁)ရက်မှ ဒီဇင်ဘာလ(၉)ရက်အထိ သွေးလွန်တုပ်ကွေးရောဂါဖြစ်ပွားသူ (၁၆၁၃၀)ဦးရှိခဲ့ပြီး ရန်ကုန်၊ မွန်၊ ရခိုင်၊ ဧရာဝတီ နှင့် နေပြည်တော်တို့တွင် အများဆုံးဖြစ်ပွားခဲ့ကြောင်း သိရသည်။

သွေးလွန်တုပ်ကွေးရောဂါ ကာကွယ်နှိမ်နင်းရေးတွင် ပြည်သူလူထု၏ ပူး ပေါင်းပါဝင်မှုသည်လည်း အရေးကြီးသည့်အခန်းကဏ္ဍတွင် ပါဝင်ပြီး ကာကွယ်နှိမ်နင်းရေးလုပ်ငန်းများကို လိုက်နာကျင့်သုံးရန် လိုအပ်ကြောင်း သိရသည်။

ကမ္ဘာပေါ်တွင် တစ်နှစ်လျှင် လူဦးရေသန်း(၄ဝဝ)ခန့် သွေးလွန်တုပ်ကွေးရောဂါကူးစက်ဖြစ်ပွားနေပြီး မြန်မာနိုင်ငံအပါအဝင် ဒေသတွင်းနိုင်ငံများ ဖြစ်သည့် အိန္ဒိယ၊ အင်ဒိုနီးရှား၊ သီရိလင်္ကာ နှင့် ထိုင်းနိုင်ငံတို့တွင် အများဆုံးဖြစ်ပွားလျက်ရှိကြောင်း သိရသည်။

ထို့ပြင် မြန်မာနိုင်ငံတွင် ယခင်က သွေးလွန်တုပ်ကွေးရောဂါဖြစ်ပွားမှုသည် အသက်(၁၅)နှစ်အောက်သာ ဖြစ်ပွားမှုများပြားခဲ့သော်လည်း လွန်ခဲ့သည့် (၁ဝ)နှစ်ကျော်မှစ၍ အသက်(၁၅)နှစ်အထက် အသက်အရွယ်များတွင်လည်း ဖြစ်ပွားမှုများပြားလာခဲ့ကြောင်း သိရသည်။

မြန်မာနိုင်ငံတွင် သွေးလွန်တုပ်ကွေးရောဂါဖြစ်ပွားမှုသည် (၂ဝ၂ဝ)ပြည့်နှစ်တွင် ရောဂါဖြစ်ပွားသူ (၁၅၁၃၁)ဦး နှင့် သေဆုံးသူ(၆၈)ဦးရှိခဲ့ပြီး (၂ဝ၂၁)ခုနှစ်တွင် ရောဂါဖြစ်ပွားသူ (၅၄၄၆)ဦးနှင့် သေဆုံးသူ(၃၆)ဦး ရှိခဲ့ကြောင်း သိရသည်။

(၂ဝ၂၂)ခုနှစ်တွင် ရောဂါဖြစ်ပွားသူ (၂၄၉၇၁)ဦးနှင့် သေဆုံးသူ(၉၇)ဦးရှိခဲ့ပြီး နှစ်စဉ် ပျမ်းမျှသေဆုံးမှုသည် ဝ ဒသမ ၄ ရာခိုင်နှုန်းအထိ ရှိခဲ့ကြောင်း သိရသည်။

အလားတူ ၂၀၂၂ ခုနှစ်တွင် ငှက်ဖျားဖြစ်ပွားသူ စုစုပေါင်း(၁၅၈၀၀၄) ဦးရှိခဲ့ရာ ၂၀၂၃ ခုနှစ် ဇန်နဝါရီလမှ အောက်တိုဘာလအထိ ငှက်ဖျားဖြစ်ပွားသူ (၁၃၇၂၁၆) ဦး ရှိခဲ့ကြောင်း ကျန်းမာရေးဝန်ကြီးဌာနမှ သိရသည်။

ငှက်ဖျားရောဂါတိုက်ဖျက်ရေးစီမံချက်အနေဖြင့် လာမည့် ၂၀၂၆ ခုနှစ်တွင် မြန်မာနိုင်ငံအတွင်း Plasmodium falciparum ပိုးတွေ့သူ လုံးဝမရှိစေရေးနှင့် ၂၀၃၀ ခုနှစ်တွင် ငှက်ဖျားရောဂါကူးစက်မှု ပပျောက်စေရန် ရည်မှန်းချက်ထား ဆောင်ရွက်လျက်ရှိကြောင်း သိရသည်။