Pearl (NSS) - ဒီဇင်ဘာ ၂၉

ရွှေတိဂုံစေတီတော်အား ဇန်နဝါရီလ(၁)ရက်မှစတင်၍ အချိန်တိုးမြှင့်ဖူးမြော်ခွင့်ပြုမည်ဖြစ်ကြောင်း ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့က ယမန်နေ့ (ဒီဇင်ဘာလ ၂၈ ရက်)က အသိပေးကြေညာထားသည်။ 

လာမည့် ၂၀၂၄ ခုနှစ်၊ ဇန်နဝါရီလ (၁)ရက်မှစတင်၍ ရွှေတိဂုံစေတီတော်မြတ်ကြီးအား ဘုရားဖူးအများပြည်သူများ စိတ်အေးချမ်းသာစွာဖူးမြော်ကြည်ညိုနိုင်ရန် နံနက် (၅) နာရီမှ၊ ည(၉)နာရီအထိ အချိန်တိုးမြှင့်ဖူးမြော်ခွင့်ပြုမည်ဖြစ်ကြောင်း သိရသည်။ 

လက်ရှိတွင် ရွှေတိဂုံစေတီတော်မြတ်ကြီးအား ဘုရားဖူးအများပြည်သူများအနေဖြင့် နံနက် ၅ နာရီမှ ည ၈ နာရီအထိသာ ‌ဖူးမြော်ခွင့်ရကြောင်းသိရသည်။

ယခင် COVID-19 ရောဂါမဖြစ်ပွားခင်အချိန်က ရွှေတိဂုံစေတီတော်မြတ်ကြီးကို နံနက် ၄ နာရီ မှ ည ၁၀ နာရီအထိ ဖွင့်လှစ်ကာ ဖူးမြော်ခွင့်ပြုခဲ့ကြောင်း သိရသည်။

လက်ရှိအချိန်၌ ရွှေတိဂုံစေတီတော်မြတ်ကြီးအား လာရောက်ဖူးမြော်သည့် နိုင်ငံခြားသားတစ်ဦးလျှင် ဧည့်ဝင်ကြေးအဖြစ် (၂ဝဝဝဝ) ကျပ်၊ သံရုံးများရှိ နိုင်ငံခြားသားများအတွက် ဧည့်ဝင်ကြေးအဖြစ် (၁ဝဝဝဝ) ကျပ် ကောက်ခံလျက်ရှိကြောင်း သိရသည်။