Pearl (NSS) - ဒီဇင်ဘာ ၇

တရုတ်နိုင်ငံမှ ဗုဒ္ဓစွယ်တော်မြတ်အား မြန်မာနိုင်ငံသို့ ပဉ္စမအကြိမ်မြောက် ပင့်ဆောင်ရန် နှစ်နိုင်ငံဆွေးနွေးခဲ့ကြောင်း နိုင်ငံခြားရေးဝန်ကြီးဌာန၏ အချက်အလက်များအရ သိရသည်။ 

တရုတ်နိုင်ငံ၊ ပေကျင်းမြို့တွင် ကျင်းပသည့် (၈)ကြိမ်မြောက် မဲခေါင် - လန်ချန်း နိုင်ငံခြားရေးဝန်ကြီးများအဆင့် အစည်းအဝေးများကာလအတွင်း နိုင်ငံခြားရေးဝန်ကြီး ဦးသန်းဆွေ နှင့် တရုတ်နိုင်ငံ နိုင်ငံခြားရေးဝန်ကြီး မစ္စတာဝမ်ယိတို့ ယမန်နေ့ (ဒီဇင်ဘာလ ၆ ရက်)က သီးခြားတွေ့ဆုံရာ၌ ထည့်သွင်းဆွေးနွေးခဲ့ခြင်းဖြစ်သည်။

တွေ့ဆုံစဉ် နှစ်နိုင်ငံ ပြည်သူများအကြား ယုံကြည်မှု၊ နားလည်မှု နှင့် ချစ် ကြည်ရင်းနှီးမှု ပိုမိုမြှင့်တင်ရန် ရည်ရွယ်ချက်ဖြင့် တရုတ်နိုင်ငံမှ ဗုဒ္ဓစွယ် တော်မြတ်အား မြန်မာနိုင်ငံသို့ သင့်လျော်မည့်အချိန်တွင် ပဉ္စမအကြိမ်မြောက် ပင့်ဆောင်သွားနိုင်ရန်  နှစ်ဖက်ဆွေးနွေးခဲ့ကြကြောင်း သိရသည်။

မြန်မာနိုင်ငံအနေဖြင့် တရုတ်နိုင်ငံမှ ဗုဒ္ဓမြတ်စွယ်တော်ကို ၁၉၅၅ ခုနှစ်တွင် ပထမဆုံးအကြိမ်ပင့်ဆောင်ခဲ့ပြီး ၁၉၉၄ ခုနှစ်တွင် ဒုတိယအကြိမ်၊ ၁၉၉၆ ခုနှစ်တွင် တတိယအကြိမ်၊ ၂၀၁၁ ခုနှစ်တွင် စတုတ္ထအကြိမ် စုစုပေါင်း လေးကြိမ် ပင့်ဆောင်ခဲ့ဖူးကြောင်း သိရသည်။

ပထမဆုံးအကြိမ်တွင် ရန်ကုန်မြို့ ကမ္ဘာအေးကုန်းမြေ မဟာပါသာဏ လိုဏ်ဂူတော်ကြီး၌(၈)လကြာအပူဇော်ခံခဲ့ပြီး ဒုတိယအကြိမ်တွင် ရန်ကုန်၊ညောင်လေးပင် ၊ တောင်ငူ၊ ပျဉ်းမနား၊ မိတ္ထီလာ၊ မန္တလေးမြို့တို့တွင် (၁)လခွဲ နီးပါး အပူဇော်ခံခဲ့ကြောင်းသိရသည်။

ထို့ပြင် တတိယအကြိမ်၌ ရန်ကုန် နှင့် မန္တလေးမြို့တို့တွင် (၃)လနီးပါး အပူဇော်ခံခဲ့ပြီး စတုတ္ထအကြိမ်၌ နေပြည်တော် ၊ ရန်ကုန် နှင့် မန္တလေးမြို့တို့၌ အပူဇော်ခံခဲ့ကြောင်း သိရသည်။