Pearl (NSS) - ဒီဇင်ဘာ ၂

ပုဂံကမ္ဘာ့အမွေအနှစ် ဒေသရှိ ဘုရား (၁၁) ဆူတွင် မိုးကြိုးလွှဲတပ်ဆင်မည်ဖြစ်ကြောင်း  ပုဂံကမ္ဘာ့အမွေအနှစ်ဒေသရှိ ယဉ်ကျေးမှုအမွေအနှစ်များ ပြုပြင်ထိန်းသိမ်းရေးဦးစီးကော်မတီ ဥက္ကဋ္ဌ ဗိုလ်ချုပ်ကြီးတင်အောင်စန်းက ပြောသည်။ 

၎င်းက ယမန်နေ့ (ဒီဇင်ဘာလ ၁ ရက်)၊ နံနက်ပိုင်းတွင် နေပြည်တော်၌ ကျင်းပ‌သော ပုဂံကမ္ဘာ့အမွေအနှစ်ဒေသရှိ ယဉ်ကျေးမှုအမွေအနှစ်များ ပြုပြင်ထိန်းသိမ်းရေး ဦးစီးကော်မတီ (၂/၂၀၂၃) အစည်းအဝေး၌ ပြောကြားခဲ့ခြင်းဖြစ်သည်။

ပုဂံဒေသသည် ရှေးဟောင်းအဆောက်အအုံ စုစုပေါင်း ၃၈၃၇ ဆူကို တစ်နေရာတည်းတွင် တွေ့ရသည့် မြန်မာတစ်မျိုးသားလုံး တန်ဖိုးမဖြတ်နိုင်သော တစ်ခုတည်းသောဒေသဖြစ်သကဲ့သို့ ကမ္ဘာ့အမွေအနှစ်စာရင်းဝင်ဒေသအဖြစ် ထိုက်ထိုက်တန်တန် ရရှိထားသည့်ဒေသဖြစ်ပြီး နိုင်ငံတကာက အထူးစိတ်ဝင်စားသည့် ယဉ်ကျေးမှုအမွေအနှစ် နယ်မြေဖြစ်ကြောင်း  ဗိုလ်ချုပ်ကြီး တင်အောင်စန်းက ပြောသည်။  

၂၀၁၆ ခုနှစ် သြဂုတ်လ ၂၄ ရက်တွင်လှုပ်ခတ်ခဲ့သည့် မြေငလျင်ကြောင့် ပုဂံဒေသရှိ ရှေးဟောင်းအဆောက်အအုံ ၃၈၉ ဆူ ထိခိုက်ပျက်စီးခဲ့ပြီး  ၂၀၁၀ ပြည့်နှစ်မှ ၂၀၂၀ ပြည့်နှစ်အတွင်း ပုဂံနှင့်အနီးတစ်ဝိုက်လှုပ်ခတ်ခဲ့သည့် ငလျင်အကြိမ် စုစုပေါင်း ၂၂ ကြိမ်ရှိခဲ့ကြောင်း သိရသည်။ 

တရုတ်နိုင်ငံနှင့်ပူးပေါင်း၍ ပြုပြင်ထိန်းသိမ်းရေးစီမံဆောင်ရွက်နေသည့် သဗ္ဗညုဘုရားကြီး တစ်ဆူမှလွဲ၍ ကျန်သည့်ဘုရား ၃၈၈ ဆူကို ပထမအဆင့် ပြုပြင်ထိန်းသိမ်းပြီးဖြစ်ကြောင်း သိရသည်။ 

သဗ္ဗညုဘုရားကြီး၏ ကြံ့ခိုင်မှုအနေဖြင့် တရုတ်ပညာရှင်အဖွဲ့က ပြုပြင်ထိန်းသိမ်းထားသည့် အခြေအနေအတိုင်း ထပ်မံပြိုပျက်မှု၊ လှုပ်ရှားမှု၊ ထူးခြားမှုမရှိကြောင်းသိရပြီး ပထမအဆင့် အရေးပေါ် ထိန်းသိမ်းမှုသည်လည်း ဆောင်ရွက်ပြီးစီးပြီဖြစ်ကြောင်း သိရသည်။ 

အလားတူ ၂၀၁၆ ခုနှစ် ငလျင်ဒဏ်ခံ အထက်ပါ ရှေးဟောင်းအဆောက်အအုံများအပြင် ပြုပြင်ထိန်းသိမ်းရန်လိုအပ်သည့် ရှေးဟောင်းအဆောက်အအုံ ၁၁၀ ဆူ ၊ ထိခိုက်ပျက်စီးနိုင်သည့် ၄၁ ဆူ၊ ၂၀၂၁ ခုနှစ်တွင် မိုးသည်းထန်စွာရွာသွန်းမှုကြောင့် ထိခိုက်မှုရှိခဲ့သည့် အဆောက်အအုံ ၆၀ ဆူ၊ မိုခါမုန်တိုင်းအရှိန်ကြောင့် ထိခိုက်မှုရှိခဲ့သည့်  (၅၉)ဆူတို့ကိုလည်း  ပြုပြင်ထိန်းသိမ်းနိုင်ခဲ့ပြီး ရေဝပ်မှုဖြစ်ပေါ်ခဲ့သည့်  ၁၅ ဆူကိုလည်း ထပ်မံရေဝပ်ခြင်းများ မဖြစ်ရန်လိုအပ်သည့် ကာကွယ်ရေးလုပ်ငန်းများနှင့် ပြုပြင်ထိန်းသိမ်းရေးများ ဆောင်ရွက်လျက်ရှိကြောင်း ဗိုလ်ချုပ်ကြီး တင်အောင်စန်းက ပြောသည်။ 

ထို့ပြင် မိုးကြိုးလျှပ်စီးကြောင့် ဘုရားစေတီများ ထိခိုက်မှုမရှိစေရန်အတွက် ပုဂံကမ္ဘာ့အမွေ အနှစ် ဒေသရှိ ဘုရား ၁၁ ဆူတွင် မိုးကြိုးလွှဲတပ်ဆင်နိုင်ရန် စီစဉ်ဆောင်ရွက်ခြင်းကို ဆက်လက်အကောင်အထည်ဖော်ဆောင်ရွက်ရန်  ဗိုလ်ချုပ်ကြီးတင်အောင်စန်းက တိုက်တွန်းပြောကြားထားသည်။ 

နိုင်ငံတကာပူးပေါင်း ဆောင်ရွက်မှုအနေဖြင့် တရုတ်နိုင်ငံအစိုးရက သဗ္ဗညုဘုရားကြီး ပြုပြင်ထိန်းသိမ်းရေး လုပ်ငန်းဆောင်ရွက်နိုင်ရန် မြန်မာအစိုးရနှင့် MoU ရေးထိုးခဲ့၍ စီမံကိန်းကာလ ကိုးနှစ်လျာထား အကောင်အထည်ဖော် ဆောင်ရွက်လျက်ရှိကြောင်း သိရသည်။

ထို့အတူ အိန္ဒိယနိုင်ငံ AS အဖွဲ့အနေဖြင့်လည်း ၂၀၁၈ ခုနှစ်မှ ၂၀၂၈ ခုနှစ်အထိ ၁၀ နှစ် စီမံကိန်းဖြင့် ရှေးဟောင်း အဆောက်အအုံပေါင်း ၉၂ ဆူ ပြုပြင်ထိန်းသိမ်းရန် (MoU) ရေးထိုးဆောင်ရွက်လျက်ရှိကြောင်း သိရသည်။