NSS - ဒီဇင်ဘာ ၂

ရန်ကုန်တိုင်း၊ ရန်ကင်းမြို့နယ်ရှိ ရန်ကင်းကလေးဆေးရုံရှေ့တွင် ဗုံးပေါက်ကွဲမှု(၂)ကြိမ်ဖြစ်ပွားခဲ့ကြောင်း လုံခြုံရေးတပ်ဖွဲ့နှင့်နီးစပ်သူများထံမှ သိရသည်။

ပေါက်ကွဲမှုသည် ယမန်နေ့(ဒီဇင်ဘာလ ၁ ရက်)၊ ည ၇နာရီခွဲအချိန်တွင် ရန်ကင်းမြို့နယ်၊ (၇)ရပ်ကွက်၊ ကံဘဲ့လမ်း၊ ရန်ကင်းကလေးဆေးရုံရှေ့တွင် ဖြစ်ပွားခဲ့ခြင်းဖြစ်ကြောင်း သိရသည်။

လုံခြုံရေးတပ်ဖွဲ့ဝင်များ၏ သွားရောက်စစ်ဆေးချက်အရ အဆိုပါကလေးဆေးရုံရှေ့သို့ (စိစစ်နေဆဲ)ကားတစ်စီးပေါ်မှ အမျိုးသားအချို့က အထုပ်တစ်ထုပ်ပစ်ချခဲ့ပြီးနောက် ယခုကဲ့သို့ ပေါက်ကွဲမှုဖြစ်ပွားခဲ့ခြင်းဖြစ်ကြောင်း လုံခြုံရေးတပ်ဖွဲ့နှင့်နီးစပ်သူက ပြောသည်။

“ပေါက်ကွဲသံက တော်တော်ကျယ်တယ်။ လူနဲ့အဆောက်အဦးတော့ ထိခိုက်တာမျိုးတော့မရှိခဲ့ပါဘူး။ ဒါပေမယ့် ကလေးဆေးရုံမှာ တက်နေတဲ့ ကလေးတွေကတော့ တော်တော်လေးလန့်ဖြန့်သွားတယ်”ဟု ၎င်းကဆက်လက်ပြောသည်။

အဆိုပါ ဗုံးခွဲတိုက်ခိုက်မှုဖြစ်စဉ်နှင့်ပတ်သက်၍ အနောက်ပိုင်းခရိုင်ပြည်သူ့ကာကွယ်ရေးတပ်ဖွဲ့(ပကဖ)နှင့် Yangon Army(YA) တို့က ပူးပေါင်းလုပ်ဆောင်ခြင်းဖြစ်ကြောင်း သတင်းထုတ်ပြန်ထားသည်ကို တွေ့ရသည်။

အလားတူ ယမန်နေ့ နံနက်အစောပိုင်းတွင်လည်း အမျိုးသားဒီမိုကရေစီပါတီသစ်(NNDP) ပါတီ ဥက္ကဋ္ဌ ဦးသန်းထွန်းသည် PDF အဖွဲ့၏ သေနတ်ဖြင့် ပစ်ခတ်လုပ်ကြံမှုကြောင့် သေဆုံးခဲ့သော ဖြစ်စဉ်ဖြစ်ပွားခဲ့သည်။