ယွန်း (NSS) - ဒီဇင်ဘာ ၁

သူနာပြု၊ သားဖွားများ၏ လုပ်ငန်းအရည်အသွေးနှင့်ပတ်သက်ပြီး မြှင့်တင်ထိန်းချုပ်နိုင်မည့် C.P.D(Continuing Professional Development) စနစ်ကို စတင်ဆောင်ရွက်သွားမည်ဖြစ်ကြောင်း သိရသည်။

အဆိုပါစနစ်ကို စတင်ဆောင်ရွက်ရန် အသိပေးတင်ပြခြင်း အခမ်းအနားကို နိုဝင်ဘာလ (၃၀)ရက်တွင် ကျန်းမာရေးဝန်ကြီးဌာန၊ အစည်းအဝေးခန်းမ၌ ကျင်းပခဲ့ကြောင်း သိရသည်။

မြန်မာနိုင်ငံ သူနာပြုနှင့်သားဖွားကောင်စီဥပဒေအရ အသုံးပြုရမည့် CPD (Continuing Professional Development)စနစ်သည် ကျန်းမာရေးဝန်ကြီးဌာန၏ ရည်မှန်းချက်ကိုပြည့်မီပြီး ကျန်းမာရေးစောင့်ရှောက်မှုစနစ်အား အထောက်အကူပြုနိုင်မည့် စနစ်ဖြစ် ကြောင်း သိရသည်။

အဆိုပါစနစ်သည် သူနာပြု၊ သားဖွားများ၏ လုပ်ငန်းအရည်အသွေးဆိုင်ရာ မြှင့်တင်ထိန်းချုပ်နိုင်သောစနစ်ဖြစ်ပြီး ပြည်သူလူထုကို ကျန်းမာရေးစောင့်ရှောက်မှုပေးရာတွင် အရည်အသွေးပြည့်ဝသော သူနာပြုစုစောင့်ရှောက်မှုကို ရရှိစေနိုင်ကြောင်း သိရသည်။

မြန်မာနိုင်ငံသူနာပြုနှင့်သားဖွားကောင်စီသည် ၂၀၁၉ ခုနှစ်မှစတင်၍ C.P.D (Continuing Professional Development) စနစ် ဖြစ်ပေါ်လာစေရန် ဆောင်ရွက်ခဲ့ရာ ၂၀၂၃ ခုနှစ်တွင် Draft Guidelines on CPD system for Nurses and Midwives in Myanmar ကို အပြီးဆောင်ရွက်နိုင်ခဲ့ခြင်းဖြစ်သည်။