ကျော် (NSS) - နိုဝင်ဘာ ၁၅

နှလုံးကျန်းမာရေးမကောင်းသဖြင့် ဆေးကုသမှုခံယူရန် စင်ကာပူနိုင်ငံသို့ရောက်ရှိနေသည့် ဖားအောက်တောရဆရာတော်ကြီးသည် ယနေ့ (နိုဝင်ဘာလ ၁၅ ရက်) နေ့လည် ၁၂ နာရီ၌ နှလုံးအထူးကုသမှုခံယူလျက်ရှိကြောင်း သိရသည်။

ဖားအောက်တောရဆရာတော်ကြီးသည် ဆေးကုသမှုခံယူရန် စင်ကာပူနိုင်ငံသို့ နိုဝင်ဘာလ ၉ ရက်ကကြွရောက်သီတင်းသုံးတော်မူခဲ့ခြင်းဖြစ်သည်။

ထိုသို့ သီတင်းသုံးတော်မူရာမှ ယနေ့တွင် နှလုံးအထူးကုသမှုခံယူသွားမည်ဖြစ်၍ နံနက် ၁၁ နာရီ ၄၅ မိနစ်မှစတင်ကာ ဖားအောက်တောရစာသင်တိုက်အသီးသီးမှ ဆရာတော်၊ သံဃာတော်များက ဖားအောက်တောရဆရာတော်ကြီးအတွက် ဆုတောင်းမေတ္တာပို့သခြင်းများပြုလုပ်လျက်ရှိကြောင်း သိရသည်။

ထိုသို့ ပြုလုပ်ရာ၌ ဆရာတော်၊ သံဃာတော်များစုပေါင်း၍ ဖားအောက်တောရဆရာတော်ကြီးအတွက် ဆုတောင်းမေတ္တာပို့သခြင်း၊ ဆရာတော်ကြီးဘွဲ့အမည်ပါသည့် ဗောဇ္စျင်သုတ်တရားတော်ဖြင့်ပူဇော်ခြင်းတို့ကို ပြုလုပ်လျက်ရှိကြောင်း သိရသည်။