ကျော် (NSS) - နိုဝင်ဘာ ၁၁

ရန်ကုန်တိုင်း၊ မင်္ဂလာဒုံမြို့နယ်ရှိ ၁၅ ပါးမြောက် တိပိဋကဓရကျောက်ပန်းတောင်းဆရာတော်၏ တိပိဋကမဟာသစ္စာအောင်မြေကျောင်းတိုက်တွင် သံဃာတော် (၁၁၁)ပါးအား ဗီယက်နမ်နိုင်ငံမှအလှူရှင်များက ပထမအကြိမ်အဖြစ် ယနေ့(နိုဝင်ဘာလ ၁၁ ရက်)က ကထိန်သင်္ကန်းဆက်ကပ်လှူဒါန်းခဲ့ကြသည်။

ဗီယက်နမ်နိုင်ငံမှ အလှူရှင်များက မင်္ဂလာဒုံမြို့ နယ်၊ ပုလဲမြို့သစ်၊ ဂန္ဓမာလမ်း၊ ပေါင်းကူဉာဏရပ်ကွက်ရှိ တိပိဋကမဟာသစ္စာအောင်မြေကျောင်းတိုက်၌ ဝါဆိုတော်မူခဲ့ကြပြီး ပုရိမဝါထတော်မူသည့် သံဃာတော် ၁၁၁ ပါးအား ယနေ့ နံနက် ၉ နာရီခွဲတွင် ကထိန်သင်္ကန်းဆက်ကပ်လှူဒါန်းခဲ့ကြခြင်းဖြစ်သည်။

"ဗီယက်နမ်နိုင်ငံက ဒါကာ၊ဒါကာမတွေဟာ တိပိဋကဓရ တိပိဋကကောဝိဒဆရာတော်တွေကို အထူးလေးစားကြည်ညိုကြပါတယ်။ သူတို့ရဲ့နိုင်ငံကိုလည်း ဆရာတော်တွေကိုမကြာမကြာ ပင့်ဖိတ်ပြီးမြို့အသီးသီးမှာ ဓမ္မဒေသနာတရားတော်တွေကို နာကြားလေ့ရှိကြပါတယ်။ ပြီးခဲ့တဲ့နှစ်က ဘုန်းဘုန်း ဗီယက်နမ်နိုင်ငံကို ၁၅ ရက်လောက် ဓမ္မခရီးကြွရင်း အကြောင်းအဆက်ဖြစ်ပြီး ဒီနှစ်ကထိန်ကို သူတို့ခင်းပါရစေလို့လျှောက်ထားတဲ့အတွက် ဘုန်းဘုန်းကခွင့်ပြုခဲ့တာကြောင့် ဒီနေ့ ကထိန်ခင်းခဲ့ကြတာပါ"ဟု ကျောက်ပန်းတောင်းဆရာတော်က မိန့်ကြားတော်မူခဲ့သည်။

ဗီယက်နမ်နိုင်ငံမှအလှူရှင်များက ကျောက်ပန်းတောင်းဆရာတော်နှင့်ကြွရောက်တော်မူလာကြသည့် ဆရာတော်သံဃာတော်များထံ ငွေကျပ်သိန်း ၁၅၀၀ ကျော်တန်ဖိုးရှိ ကထိန်သင်္ကန်းနှင့်လှူဖွယ်ဝတ္ထုပစ္စည်းများအား ဆက်ကပ်လှူဒါန်းခဲ့ကြသည်။

ထို့ပြင် တိပိဋကမဟာသစ္စာအောင်မြေကျောင်းတိုက်ရှိ သံဃာတော်များအသုံးပြုရန် ဗီယက်နမ်နိုင်ငံမှ ဒါယိကာ၊ ဒါယိကာမများကလည်း ငွေကျပ် ၆၉၀ သိန်းတန်ဖိုးရှိ Rosa Minibus ကိုဆက်ကပ်လှူဒါန်းခဲ့ကြသည်။

ဗီယက်နမ်နိုင်ငံသားများ၏ ၁၅ ပါးမြောက် တိပိဋကဓရ ကျောက်ပန်းတောင်းဆရာတော်ကျောင်း၌ ပြုလုပ်သည့် ကထိန်သင်္ကန်းဆက်ကပ်လှူဒါန်းပွဲတွင် ရွှေပြည်သာမြို့နယ်အခြေစိုက် လူမှုဘဝကူညီစောင့်ရှောက်ရေးအသင်းမှအသင်းဝင်များက ကျန်းမာရေးစောင့်ရှောက်မှုများပြုလုပ်ပေးခဲ့ကြသည်။