ကျော် (NSS) - နိုဝင်ဘာ ၂

မြန်မာနိုင်ငံတွင် ပထမဆုံးဖွင့်လှစ်မည့် ကူးစက်ရောဂါများ ကာကွယ်ထိန်းချုပ်ရေးနှင့်လေ့ကျင့်ရေးဗဟိုဌာန (Myanmar CDC) တွင် နည်းပညာများပြန်လည်အသုံးချမည့် သင်တန်းအား တရုတ်နိုင်ငံ၊ နန်ကျင်းမြို့ရှိ ကျန်စုကူးစက်ရောဂါထိန်းချုပ်ရေးနှင့်ကာကွယ်ရေးဌာနတွင် ဖွင့်လှစ်ပို့ချလျက်ရှိကြောင်း သိရသည်။

သင်တန်းအား နိုဝင်ဘာလ ၂ ရက်မှ ဒီဇင်ဘာလ ၃၁ ရက်အထိ ဖွင့်လှစ်သင်ကြား‌ပေးသွားမည်ဖြစ်ရာ မြန်မာနိုင်ငံ၊ ကျန်းမာရေးဝန်ကြီးဌာနမှ အထူးကုဆရာဝန်(၄)ဦး၊ ဓာတ်ခွဲခန်းဆိုင်ရာကျွမ်းကျင်ပညာရှင်(၂၉)ဦး တက်ရောက်လျက်ရှိကြောင်း သိရသည်။

သင်တန်းတွင် ဓာတ်ခွဲခန်းနှင့်ပတ်သက်သော ကူးစက်ရောဂါများကာကွယ်ရေးနှင့်ထိန်းချုပ်ရေးဆိုင်ရာနည်းပညာရပ်များအား လေ့လာသင်ကြားနိုင်မည်ဖြစ်ကာ နိုင်ငံတကာမှပညာရှင်များနှင့်လည်း အတွေ့အကြုံကောင်းများဖလှယ်နိုင်ခြင်း၊ မြန်မာနိုင်ငံမှ ဓာတ်ခွဲခန်းဆိုင်ရာပညာရှင်များကို နည်းပညာများပြန်လည်မျှဝေပေးနိုင်ခြင်းများပြုလုပ်နိုင်မည်ဖြစ်ကြောင်း သိရသည်။

ထို့ပြင် မြန်မာနိုင်ငံ၌ ဖွင့်လှစ်မည့် ကူးစက်ရောဂါများကာကွယ်ထိန်းချုပ်ရေးနှင့်လေ့ကျင့်ရေးဗဟိုဌာနတွင် ဗဟိုကူးစက်ရောဂါတိုက်ဖျက်ရေးဌာနခွဲ၊ ရောဂါနှိမ်နင်းရေးဌာနခွဲ၊ ကပ်ပါးရောဂါဌာနခွဲ နှင့် ဓာတ်ခွဲဌာနခွဲများပါဝင်မည်ဖြစ်ကြောင်း သိရသည်။

အလားတူ တုပ်ကွေးရောဂါ၊ ဗိုင်းရပ်စ်ရောဂါ၊ ဘက်တီးရီးယားရောဂါ နှင့် ကပ်ပါးရောဂါများကို ဓာတ်ခွဲစစ်ဆေးခြင်း၊ အစားအသောက်ဘေးကင်းလုံခြုံရေးဆိုင်ရာ ဓာတ်ခွဲစစ်ဆေးခြင်း၊ လုပ်ငန်းခွင်နှင့် ဓာတုဗေဒအဆိပ်သင့်မှုဆိုင်ရာဓာတ်ခွဲစစ်ဆေးခြင်းများကိုလည်း ဆောင်ရွက်နိုင်မည်ဖြစ်ကြောင်းသိရသည်။

အဆိုပါ Myanmar CDC ကို နေပြည်တော်၊ ဒက္ခိဏသီရိမြို့နယ်တွင် တည်ဆောက်လျက်ရှိပြီး ယွမ်သန်း (၄ဝဝ)ခန့် တန်ဖိုးရှိသည့် နိုင်ငံတကာအဆင့်မီစီမံကိန်းတစ်ခုလည်းဖြစ်သည်။