Pika (NSS) - စက်တင်ဘာ ၂၉ 

ဂျပန်နိုင်ငံသည် ဖူကူရှီးမားနျူကလီးယားဓါတ်အားပေးစက်ရုံမှ  ရေဒီယိုသတ္တိကြွရေဆိုးများအား ပင်လယ်ထဲသို့ ဒုတိယအကြိမ်မြောက်စွန့်ပစ်မှုကို လာမည့်သီတင်းပတ်တွင် စတင်လုပ်ဆောင်မည်ဖြစ်ကြောင်း ၎င်း၏ အော်ပရေတာက ပြောကြားခဲ့သည်။

ဂျပန်အစိုးရသည် ရေဒီယိုသတ္တိကြွရေဆိုးစွန့်ပစ်မှုကို ပြီးခဲ့သည့်ဩဂုတ်လတွင် စတင်လုပ်ဆောင်ခဲ့ပြီး တရုတ် နှင့် အခြားနိုင်ငံများက စိတ်ဆိုးဒေါသဖြစ်ခဲ့ကြောင်းလည်း သိရသည်။ ဩဂုတ်လ(၂၄)ရက်တွင် ဂျပန်နိုင်ငံသည် ဖူကူရှီးမားနျူကလီးယားဓါတ်အားပေးစက်ရုံမှ ရေဒီယိုသတ္တိကြွရေဆိုး တန်ချိန်ပေါင်း(၁ ဒသမ ၃၄) သန်းကို ပင်လယ်ထဲသို့ စတင်စွန့်ပစ်ခဲ့ခြင်းဖြစ်ကြောင်း သိရသည်။

TEPCO ကုမ္ပဏီ က "ပထမဆုံးအကြိမ် စွန့်ပစ်မှုတွေလုပ်ပြီးနောက် စစ်ဆေးမှုတွေကိုလည်း လုပ်ဆောင်ပြီးပါပြီ။ ဒုတိယအကြိမ်မြောက်စွန့်ပစ်မှုကို အောက်တိုဘာလ(၅)ရက်မှာ စတင်လုပ်ဆောင်မှာပါ" ဟု ပြောခဲ့သည်။

ဂျပန်အစိုးရက ရေဒီယိုသတ္တိကြွရေဆိုးများကို ပထမဆုံးစွန့်ပစ်ခဲ့ပြီးနောက် တရုတ်နိုင်ငံသည် ဂျပန်ထံမှ ပင်လယ်စာ တင်သွင်းမှုအားလုံးကို ပိတ်ပင်ခဲ့သည်။ ဂျပန်၏ ရေဒီယိုသတ္တိကြွရေဆိုးပထမဆုံးစွန့်ပစ်မှုမှာ စက်တင်ဘာလ(၁၁)ရက်တွင် ပြီးဆုံးသွားခဲ့ကြောင်း သိရသည်။

ထို့အပြင် ဂျပန်နှင့်ဆက်ဆံရေး အေးခဲနေသော ရုရှားနိုင်ငံကလည်း ပင်လယ်စာတင်သွင်းမှုကို ပိတ်ပင်ရန် စဉ်းစား နေကြောင်း သိရသည်။ ပင်လယ်ထဲသို့ ရေဒီယိုသတ္တိကြွရေဆိုးစွန့်ပစ်မှုမှာ ဘေးကင်းကြောင်း TEPCO က ပြောဆိုခဲ့ပြီး အဆိုပါပြောဆိုချက်ကို ကုလသမဂ္ဂအဏုမြူအေဂျင်စီကလည်း ထောက်ခံခဲ့သည်။

တရုတ်နိုင်ငံသည် ဂျပန်မှ ပင်လယ်စာတင်သွင်းမှုများကို ပိတ်ပင်ထားသော်လည်း  ဂျပန်ကမ်းလွန်ပင်လယ်ပြင်တွင် ငါးဖမ်းမှုများကို ဆက်လက်လုပ်ဆောင်နေကြောင်းလည်း သိရသည်။ ပြီးခဲ့သည့်စက်တင်ဘာလ(၁၅)ရက်တွင် တရုတ်ငါးဖမ်းသင်္ဘောဟု ယူဆရသည့် ငါးဖမ်းသင်္ဘောများ ဂျပန်ကမ်းလွန်ပင်လယ်ပြင်တွင် ငါးဖမ်းနေသည့် ဓါတ်ပုံများကို ဂျပန်နိုင်ငံဆိုင်ရာအမေရိကန်သံအမတ်ကြီး Rahm Emanuelက အွန်လိုင်းတွင် တင်ခဲ့ကြောင်း သိရသည်။

၎င်းက "စက်တင်ဘာလ(၁၅)ရက်မှာ တရုတ်ငါးဖမ်းသင်္ဘောတွေဟာ ဂျပန်ကမ်းလွန်ပင်လယ်ပြင်မှာ ငါးဖမ်းနေတာကို တွေ့ခဲ့ရပါတယ်။ တရုတ်က ပိတ်ပင်ထားတဲ့ ဂျပန်ရဲ့ပင်လယ်စာတွေကလည်း အဲဒီကမ်းလွန်ပင်လယ်ပြင်ကနေပဲ ရရှိတာပါ" ဟု ပြောခဲ့သည်။