NSS - စက်တင်ဘာ ၂၁

ချင်းတွင်းမြစ်အတွင်း တိမ်းမှောက်ခဲ့သည့် ရေယာဥ်ပေါ်မှ အရပ်သား(၆)ဦး အပါအဝင် (၁၂)ဦး မျောပါပျောက်ဆုံးနေကြောင်း နစကမှ ထုတ်ပြန်ထားသည်။

နစကမှ စက်တင်ဘာလ(၂၀)ရက်၊ ညပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

တိမ်းမှောက်ခဲ့သည့် ကြယ်မင်း(၄)အမည်ရှိ ရေယာဉ်သည် စစ်ကိုင်းတိုင်း၊ ခန္တီးမြို့မှ ကုန်ပစ္စည်းများတင်ဆောင်ကာ ချင်းတွင်းမြစ်ကြောင်းအတိုင်း မောင်းနှင်လာသည့် ရေယာဥ်များအနက်မှ တစ်စင်းဖြစ်ကြောင်း နစကမှ အသိပေးထားသည်။

အဆိုပါရေယာဥ်သည် ပြီးခဲ့သည့် စက်တင်ဘာလ(၁၉)ရက် နံနက်(၉)နာရီ (၅၅)မိနစ်အချိန်ခန့်တွင် မင်းကင်းမြို့နယ်၊ ပန်းဆက်ကျေးရွာအနီးသို့ အရောက်တွင် ရေဝဲအတွင်းသို့ ရောက်ရှိကာ နစ်မြှုပ်သွားခဲ့ခြင်းဖြစ်‌ကြောင်း သိရသည်။

၎င်းဖြစ်စဥ်ကြောင့် ရေယာဥ်ပေါ်တွင် လိုက်ပါလာသည့် ကုမ္ပဏီဝန်ထမ်း သုံးဦးနှင့် အရပ်သား ခြောက်ဦး၊ လုံခြုံရေးလိုက်ပါလာသည့် လုံခြုံရေးတပ်ဖွဲ့ဝင် သုံးဦး စုစုပေါင်း(၁၂)ဦး မျောပါပျောက်ဆုံးခဲ့ကြောင်း နစကမှသိရသည်။

မျောပါပျောက်ဆုံးနေသူများအား သက်ဆိုင်ရာတာဝန်ရှိသူများနှင့် ကူညီကယ်ဆယ်ရေးအဖွဲ့များက ရှာဖွေကယ်ဆယ်ရေးလုပ်ငန်းများ ဆောင်ရွက်နေကြောင်း နစကမှ ထုတ်ပြန်ထားသည်။