NSS - စက်တင်ဘာ ၁၂

မင်္ဂလာဒုံမြို့နယ်တွင် ကျောင်းထိုင်ဆရာတော်အား ဦးဇင်းတစ်ပါးက တူဖြင့်ထုသတ်မှုဖြစ်ပွားခဲ့ကြောင်း သတင်းရရှိသည်။

ဖြစ်စဥ်မှာ ယနေ့(စက်တင်ဘာလ ၁၂ ရက်)၊ နေ့လည်(၁၂)နာရီအချိန်ခန့်တွင် မင်္ဂလာဒုံမြို့နယ်၊ ထောက်ကြန့်မြို့၊ နွယ်ခွေကျေးရွာအုပ်စု ရွာသစ်‌ကျေးရွာရှိ ဇမ္ဗူရတနာကျောင်းတိုက်တွင် ဖြစ်ပွားခဲ့ကြောင်း ဒေသခံများထံမှ သိရသည်။

ဇမ္ဗူရတနာကျောင်းထိုင်ဆရာတော်သည် ကျောင်းအုတ်တံတိုင်းအသစ်ကာရံစဥ် ၎င်းကျောင်းတိုက်တွင်နေထိုင်သည့် ဦးဇင်းဥူးက္ကုန္ဒာစာရအား ဆဲဆိုကြိမ်းမောင်းမှုများ ပြုမူခဲ့ကြောင်း သိရသည်။

ထို့သို့ဆဲဆိုကြိမ်းမောင်းမှုအပေါ် မကျေနပ်သည့်အတွက် တူဖြင့်ထုသတ်ခဲ့ခြင်းဖြစ်ကြောင်း ဒေသခံများကပြောကြားထားသည်။

လက်ရှိတွင် တုဖြင့်ထုသတ်ခဲ့သည့် ဦးဇင်းအား သက်ဆိုင်ရာရဲစခန်းက လူဝတ်လဲကာ ဖမ်းဆီးထားကြောင်း သိရသည်။

အသတ်ခံခဲ့ရသည့် ကျောင်းထိုင်ဆရာတော်သည် ဒေါက်တာဘဒ္ဒန္တ ဦးသီရိန္ဒဖြစ်ပြီး ဓမ္မာစရိယဘွဲ့၊ M.A,Srilanka၊ Ph.D,Indian ဘွဲ့များကို ရရှိထားသည့် ဆရာတော်တစ်ပါး ဖြစ်ကြောင်းသိရသည်။ ဆရာတော်သည် သက်တော်(၅၄)နှစ်ရှိပြီး သိက္ခာတော်(၃၀)ရှိကြောင်း သိရသည်။