ယွန်း (NSS) - စက်တင်ဘာ ၈

ဘင်္ဂလားဒေ့ရှ်နိုင်ငံမှထုတ်သည့် ဆေးနှင့် ဆေးပစ္စည်းများကို မြန်မာနိုင်ငံတွင် မှတ်ပုံတင်ရေး နှင့် အသုံးပြုနိုင်ရေးကို နှစ်နိုင်ငံဆွေးနွေးခဲ့ကြောင်း နစကမှ သိရသည်။

ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်းဝင်းက စက်တင်ဘာလ(၇)ရက်တွင် မြန်မာနိုင်ငံဆိုင်ရာ ဘင်္ဂလားဒေ့ရှ် သံအမတ် H.E.Dr.Md Monwar Hossain အား နေပြည်တော်ရှိ ပြည်ထောင်စုဝန်ကြီး၏ ဧည့်ခန်းမ၌ တွေ့ဆုံခဲ့ကြောင်း သိရသည်။

ထိုသို့တွေ့ဆုံစဥ် နှစ်နိုင်ငံကျန်းမာရေးကဏ္ဍ ပူးပေါင်းဆောင်ရွက်မှု မြှင့်တင်ရေးကိစ္စရပ်များကို ဆွေးနွေးခဲ့ကြောင်း သိရသည်။

ဘင်္ဂလားဒေ့ရှ်နိုင်ငံမှထုတ်လုပ်သည့် ဆေး နှင့် ဆေးပစ္စည်းများ မြန်မာနိုင်ငံတွင် မှတ်ပုံတင်နိုင်ရေးနှင့် ဖြန့်ဖြူးအသုံးပြုနိုင်‌ရေးများကိုလည်း နှစ်နိုင်ငံဆွေးနွေးခဲ့ကြောင်း နစကမှ အသိပေးထားသည်။

ကမ္ဘာလုံးဆိုင်ရာ ကျန်းမာရေးပြဿနာများဖြစ်သည့် ကပ်ရောဂါကာကွယ်တုံ့ပြန်ရေးလုပ်ငန်းများ နှင့် လူတိုင်းလက် လှမ်းမီလွှမ်းခြုံနိုင်သော ကျန်းမာရေးစောင့်ရှောက်မှုလုပ်ငန်းများကိုလည်း မြန်မာ- ဘင်္ဂလားဒေ့ရှ် နှစ်နိုင်ငံ ပူးပေါင်းနိုင်ရေး ဆွေးနွေးခဲ့ကြကြောင်း သိရသည်။

ထို့ပြင် နေရပ်စွန့်ခွာသူများ ပြန်လည်လက်ခံရာ၌ ကျန်းမာရေးစောင့်ရှောက်မှုလုပ်ငန်းများ ပြင်ဆင်ဆောင်ရွက်ထားသည့် ကိစ္စများကိုလည်း ဆွေးနွေးခဲ့ကြောင်း သိရသည်။