ပုံစာ - ဆန်တစ်ပြည်လျှင် ငွေ(၁ဝဝ)ကျပ်ဖြင့် ၂ဝ၂၂ ခုနှစ် စက်တင်ဘာလအတွင်းက ရောင်းချပေးခဲ့စဉ်

ယွန်း(NSS) - သြဂုတ် ၂၆

ဆန်တစ်ပြည်လျှင် ငွေကျပ်(၁၀၀)နှုန်းဖြင့် ဆန်ပြည်ပေါင်း(၃၅၀)ကို Aladdin Men Fashion shop က မနက်ဖြန်(သြဂုတ်လ ၂၆ ရက်)တွင် ရောင်းချပေးမည်ဖြစ်ကြောင်း သိရသည်။

Aladdin Men Fashion shop က ၎င်းတို့၏ လူမှုကွန်ရက်စာမျက်နှာတွင် သြဂုတ်လ(၂၅)ရက်က အထက်ပါကဲ့သို့ ကြေညာထားခြင်းဖြစ်သည်။

ဆန်တစ်ပြည်လျှင်(၁၀၀)ကျပ် အပြင် ကြက်ဥ (၁၀)လုံးတစ်ကဒ်ကိုလည်း (၁၀၀)ကျပ်ဖြင့် သြဂုတ်လ(၂၆)ရက်၊ နံနက်(၁၁)နာရီမှ စတင်ရောင်းချပေးသွားမည်ဖြစ်ကြောင်း သိရသည်။

"အခုရောင်းတာက တတိယအကြိမ်ပါ။ (၃)ကြိမ်ရှိပါပြီ။ လက်ရှိမှာက ကုန်ဈေးနှုန်းတွေကလည်း ဈေးမြင့်နေတော့ ဒီအချိန်မှာကိုယ့်ထက်ခက်ခဲတဲ့သူတွေကို ကူညီချင်တဲ့သဘောလောက်ပါပဲ။ တခြားရည်ရွယ် ချက်ကတော့ မရှိပါဘူး" ဟု Aladdin Men Fashion shop မှ တာဝန်ရှိသူတစ်ဦးက NSS ကိုပြောသည်။

၎င်းတို့အနေဖြင့် ဆန်ပြည်ပေါင်း(၃၅၀)နှင့် ကြက်ဥအလုံး(၂၀၀၀)တို့ကို ရောင်းချပေးသွားမည်ဖြစ်ပြီး စနစ်တကျတန်းစီ၍ ဝယ်ယူပေးရန်လည်း ထည့်သွင်းကြေညာထားသည်။

ထိုသို့ ရောင်းချပေးရာတွင် လူတစ်ဦးလျှင် ဆန်နှင့် ကြက်ဥနှစ်မျိုးအနက်မှ မိမိကြိုက်နှစ်သက်ရာတစ်မျိုးကို ငွေ(၁၀၀)ကျပ်ဖြင့် ဝယ်ယူနိုင်ကြောင်း ကြေညာချက်တွင်ပါရှိသည်။

အဆိုပါရောင်းချမှုကို သင်္ဃန်းကျွန်းမြို့နယ်၊ ဘဝမြင့်မှတ်တိုင်အနီး၊ တိုက် ၁ အမှတ် ၀၀၃ မြေညီထပ် လေးထောင့်ကန်လမ်းမကြီး၊ CB ဘဏ် မျက်စောင်းထိုးတွင် လုပ်ဆောင်သွားမည်ဖြစ်ကြောင်း သိရသည်။