NSS - သြဂုတ် ၁၁

အမှိုက်ပုံ၌တွေ့သော တရုတ်စာတမ်းပါ ဆေးလိပ်ဗူးအား သောက်ရာမှ မူးလဲကာအဆိပ်သင့်မှု တောင်ဒဂုံမြို့နယ်တွင် ဖြစ်ပွားခဲ့ကြောင်း သတင်းရရှိသည်။

ဖြစ်စဥ်မှာ သြဂုတ်လ(၁၀)ရက်၊ နေ့လည်(၁၂)နာရီခွဲအချိန်ခန့်တွင် တောင်ဒဂုံမြို့နယ်၊ အမှတ်(၂၄)ရပ် ကွက် နံ့သာမြိုင်လမ်းနှင့် နဝရက်(၁)လမ်းထောင့်တွင် ဖြစ်ပွားခဲ့ကြောင်း လုံခြုံရေးတပ်ဖွဲ့ဝင်များနှင့် နီးစပ်သည့် သတင်းအရင်းအမြစ်တစ်ဦးထံမှ သိရသည်။

အဆိုပါ လမ်းထောင့်ရှိ အမှိုက်ကန်တွင် အမှိုက်လာသယ်သည့် စည်ပင်အမှိုက်ကားမှ ကျော်ဇင်သော် (၂၃)နှစ် အပါအဝင် အမျိုးသား(၃)ဦးသည် အမှိုက်ပုံ၌ တရုတ်စာတမ်းပါဆေးလိပ်ဗူးကို တွေ့ရှိခဲ့ကြောင်း သိရသည်။

ထို့နောက် ၎င်းဆေးလိပ်အားသောက်ခဲ့ရာ နှာခေါင်းမှ သွေးများထွက်လာကာ မူးလဲသွားခဲ့ပြီး ဆေးလိပ်မီးခိုးရှူမိသူ (၂)ဦးမှာလဲ မူးလဲခဲ့ကြောင်း အထက်ပါ သတင်းအရင်းအမြစ်က ဆက်လက်ပြောကြားခဲ့သည်။

ထို့ကြောင့် ၎င်းတို့အား အမှတ်(၂၅)ရပ်ကွက် လူမှုကူညီရေးယာဉ်နှင့် ရှင်သန်ခွင့် လူမှုကူညီရေးယာဉ်တို့ဖြင့် မြောက်ဥက္ကလာပမြို့နယ်ရှိ ဝေဘာဂီဆေးရုံသို့ ပို့ဆောင်ပေးခဲ့ကြောင်း သိရသည်။