ဂျန်ဇက် (NSS) - သြဂုတ် ၄

ထိုင်းနိုင်ငံ Wang Ka မြို့ရှိ ဈေးထဲမှာ ရေခဲပို့တဲ့အလုပ်ကို ၁၅ နှစ်ကျော်ကြာလုပ်ကိုင်ခဲ့တဲ့ မြန်မာနိုင်ငံသား ကရင် လူမျိုးတစ်ဦးဟာ ပြီးခဲ့တဲ့ရက်ပိုင်းက ဖွင့်လှစ်ခဲ့တဲ့ ထိုင်းအစိုးရထီဖွင့်ပွဲမှာ အမြင့်ဆုံးဆုကြေးကို ရယူပိုင်ဆိုင်နိုင်မယ့် ထီ ပထမဆုကို ပေါက်သွားခဲ့တယ်လို့ သိရပါတယ်။

ဇူလိုင် ၃၁ ရက်က ဖွင့်လှစ်ခဲ့တဲ့ ထိုင်းအစိုးရထီဖွင့်ပွဲမှာ အသက် ၃၆နှစ်အရွယ်ရှိ ဖိုးထူးဟာ ဘတ်  ၆ သန်းရရှိစေမယ့် ထီ ပထမဆုကိုပေါက်သွားခဲ့ကြောင်းသိရပါတယ်။ဖိုးထူးဟာ ထိုင်းနိုင်ငံရဲ့အမြင့်ဆုံးထီဆု ပေါက်သွားတဲ့အတွက်  Wang Ka မြို့ ဈေးပတ်ဝန်းကျင်မှာ လူသိများလာခဲ့ပြီး ၎င်းနဲ့အတူ ဓါတ်ပုံရိုက်ကူးဖို့လာရောက်သူတွေလည်း များပြားနေကြောင်း သိရပါတယ်။

ထိုင်းရဲတပ်ဖွဲ့က တာဝန်ရှိသူများဟာလည်း ဖိုးထူးဆီ လာရောက်ပြီးစစ်ဆေးမှုတွေ လုပ်ဆောင်ခဲ့ကြောင်း သိရပါတယ်။ ဖိုးထူးဟာ လူပျိုကြီးဖြစ်ပေမယ့် ထီဆုကြေးငွေများကို မိသားစုကို အိမ်ဆောက်ပေးနိုင်ဖို့ မြေယာများ ဝယ်သွားဖို့ စီစဉ်ထားကြောင်း သိရပါတယ်။ ဖိုးထူးဟာ ထိုင်းနိုင်ငံရဲ့အမြင့်ဆုံးဆုကြေးမျိုး ရရှိတဲ့ ထီပေါက်ခဲ့ပေမယ့် ၎င်းပုံမှန်လုပ်ကိုင်နေတဲ့အလုပ်ကို စွန့်လွှတ်မှာမဟုတ်ဘဲ ရေခဲပို့တဲ့လုပ်ငန်းကို ဆက်လက်လုပ်ကိုင်မယ်လို့ ပြောပါတယ်။

ဖိုးထူးဟာ နံပတ် ၂၆ဝ၄၅၃ ပါတဲ့ ထီလက်မှတ်ကို Wang Ka  မြို့ဈေးထဲက ဝယ်ယူခဲ့တာဖြစ်ပြီး ထီပေါက်တဲ့အတွက် ဝမ်းသာပျော်ရွင်မိကြောင်း ပြောပါတယ်။ ပြီးခဲ့တဲ့သီတင်းပတ်နှစ်ပတ်ကျော်ကလည်း Sisaket ပြည်နယ်ရှိ အမျိုးသမီးတစ်ဦးဟာ ထိုင်းဘတ် ၁၂ သန်းရရှိစေမယ့် lottery jackpot ထီဆုပေါက်ခဲ့ပြီး အဆိုပါအမျိုးသမီးဟာ ထီလက်မှတ်ကို အွန်လိုင်းက ဝယ်ယူခဲ့ကာ အဘွားဖြစ်သူ ဈာပနာအခမ်းနားနဲ့ပတ်သက်ပြီး အမှတ်တရဖြစ်စေတဲ့ ဂဏန်းတွေကိုမှတ်ပြီး ထိုးယူခဲ့တာဖြစ်ကြောင်း သိရပါတယ်။