ယွန်း (NSS) - ဇူလိုင် ၁၈

မွန်ပြည်နယ်ရှိ မြို့နယ်နှစ်ခုတွင် မိုးသည်းထန်စွာရွာသွန်းမှုကြောင့် ရေကြီးရေလျှံမှုများ ဖြစ်ပေါ်နေကြောင်း သတင်းရရှိသည်။

ယမန်နေ့(ဇူလိုင် ၁၇ ရက်)မှ စတင်ကာ ယနေ့(ဇူလိုင် ၁၈ရက်)အထိ မွန်ပြည်နယ်ရှိ မုဒုံမြို့နယ်နှင့် သံဖြူဇရပ်မြို့နယ်တို့တွင် မိုးသည်းထန်စွာ ရွာသွန်းမှုကြောင့် ရေကြီးရေလျှံမှုများ ဖြစ်ပွားခဲ့ကြောင်း သိရသည်။

သံဖြူဇရပ်မြို့နယ်တွင် မိုးသည်းထန်စွာရွာသွန်းပြီး  တောင်ကျရေများစီးဆင်းမှုကြောင့် ပငကျေးရွာတွင် ရေကြီးရေလျှံမှုများ ဖြစ်ပွားခဲ့ကြောင်း ပင ပရဟိတလူငယ်အသင်းထံမှ သိရသည်။

“ပုံမှန်အတိုင်းပါပဲ ရေမကျသေးပါဘူး။ ရေကတော့နှစ်တိုင်းတက်နေကြပါ။  အိမ်ထောင်စု(၂၂)စုကိုတော့ ကြက်တညှင်ဘုန်းကြီး ကျောင်းကို ပို့ပေးထားပါတယ်။ မိုးကမနေ့ကတည်းက အဆက်မပြတ်ရွာနေတာကြောင့် ရေတက်လာတာပါ။ ရေကမနက်ဖြန်လောက်မှ ကျမယ်လို့တော့ထင်တယ်”ဟု ပင ပရဟိတလူငယ်အသင်းမှ NP News ကိုပြောသည်။

အဆိုပါ ရေကြီးရေလျှံမှုကြောင့် လက်ရှိတွင် အိမ်ထောင်စုပေါင်း(၂၂)စုကို ဒေသခံလူမှုကူညီရေးအသင်းများနှင့် သံဖြူဇရပ်မြို့နယ် မီးသတ်စခန်းမှ မီးသတ်တပ်ဖွဲ့ဝင်များက ကြက်တညှင်ဘုန်းတော်ကြီးကျောင်းသို့ ပြောင်းရွှေ့ပေးထားကြောင်း သိရသည်။

ထို့ပြင် ယနေ့(ဇူလိုင်လ ၁၈ ရက်)၊ နံနက်(၇)နာရီအချိန်ကလည်း မုဒုံမြို့တွင် မိုးသည်းထန်စွာရွာသွန်းမှုကြောင့် နှီးပဒေါကျေးရွာ၊ မော်လမြိုင် -သံဖြူဇရပ်ကားလမ်းမကြီး၊ မိုင်တိုင်အမှတ်(၃၄/၁) နှင့် (၃၅)ကြားတွင် လမ်းမပေါ်ရေကျော်မှုများရှိခဲ့ကြောင်း မီးသတ်ဌာနမှ သတင်းရရှိသည်။

အထက်ပါ ရေကြီးမှုဖြစ်စဥ်များနှင့်ပတ်သက်၍ သက်ဆိုင်ရာတာဝန်ရှိသူများက သွားရောက်ကြည့်ရှုနေကြောင်း မွန်ပြည်နယ်အစိုးရအဖွဲ့မှ ပြောရေးဆိုခွင့်ရှိသူ သယံဇာတရေးရာဝန်ကြီး ဒေါက်တာအောင်မြတ်ကျော်စိန်က NP News ကိုပြောသည်။