NSS - ဇွန် ၃ဝ

ကမ္ဘာပေါ်ရှိ ထိုင်တော်မူ ကျောက်ဆစ်ဗုဒ္ဓရုပ်ပွားတော်များအနက် ဉာဏ်တော်အမြင့်ဆုံးဖြစ်လာမည့် မာရဝိဇယ ဗုဒ္ဓရုပ်ပွားတော်မြတ်ကြီးအတွက် လုပ်ငန်းရှင်များက ငွေကျပ် (၁၆)ဘီလျံကျော်လှူဒါန်းခဲ့ကြောင်း သိရသည်။ 

အဆိုပါလုပ်ငန်းရှင်များက ဇွန်လ ၂၉ ရက်တွင် ကျင်းပခဲ့သည့် မာရဝိဇယ ဗုဒ္ဓရုပ်ပွားတော်မြတ်ကြီး တည် ဆောက်ပြီးစီးမှုအခြေအနေများ ရှင်းလင်းပြသခြင်းအခမ်းအနားတွင် ယခုကဲ့သို့ လှူဒါန်းခဲ့ခြင်းဖြစ်သည်။ 

လှူဒါန်းမှုတွင် စီးပွားရေးလုပ်ငန်းရှင်များအပါအဝင် အလှူရှင် (၁ဝ၁)ဦးတို့ပါဝင်ပြီး အလှူငွေစုစုပေါင်း ငွေကျပ် (၁၆ ဒသမ ၁၇၇)ဘီလျံကို လှူဒါန်းခဲ့ကြကြောင်းသိရသည်။

မာရဝိဇယဗုဒ္ဓရုပ်ပွားတော်မြတ်ကြီးကို တည်ဆောက်ရန် ပန္နက်ရိုက်ခဲ့သည်မှ ရက်ပေါင်း ၁ဝဝဝ ကျော် ၊နှစ်ကာလအားဖြင့် သုံးနှစ်စွန်းစွန်းသို့ရောက်ရှိလာပြီး ရာနှုန်းပြည့်ပြီးစီးရန် အနည်းငယ်သာ ကျန်ရှိကြောင်းသိရသည်။ 

ဘုရားကြီးထုဆစ်ရန် ၂ဝ၁၈ ခုနှစ် အောက်တိုဘာလမှ စတင်ကာတူးဖော်ခဲ့ပြီး ၂ဝ၁၉ ခုနှစ် မတ်လ၌ အမြင့် ၆၅ ပေ၊ ရှေ့အလျား ၁၅၄ ပေ၊ ထု ပေ ၂ဝ ရှိ A အဆင့်ရှိသည့် စကျင်ကျောက်တော်ကြီးကို အကြမ်းထည်ပုံဖော်နိုင်ခဲ့ကြောင်းသိရသည်။

ယင်းစကျင်ကျောက်တုံးကြီးကို နေပြည်တော်သို့လေးလကြာမျှ‌ ရေကြောင်းကုန်ကြောင်းတို့ဖြင့်သယ် ဆောင်ကာ ဆင်းတုတော်ကြီးကို အပိုင်းလိုက်ခွဲ၍ CNC စက်များဖြင့် အဆင့်ဆင့် ထွင်းထုခဲ့ခြင်းဖြစ် ကြောင်း သိရသည်။

အလှူငွေများကို သာသနာတော်ဘွဲ့တံဆိပ်ရရှိခဲ့သည့် ပုဂ္ဂိုလ်များနှင့် ဘဏ်လုပ်ငန်းရှင်များ၊ စီးပွားရေးဆိုင်ရာပုဂ္ဂိုလ်များက ထည့်ဝင်လှူဒါန်းခဲ့ခြင်းပြီး လှူဒါန်းခဲ့သည့် အလှူရှင်များ၏ အမည်များကိုလည်း ကျောက်ချပ်များပေါ်တွင် ရေးထိုး၍ ကမ္ပည်းမှတ်တမ်း ထားရှိပေးမည်ဖြစ်ကြောင်းသိရသည်။