NP News - ဇွန် ၇

ကမ္ဘာအေးမြေငလျင်စခန်း အနောက်-အနောက်မြောက်ဘက် ၃၃ မိုင်ခန့်အကွာ၊ ညောင်တုန်းမြို့ တောင်-အရှေ့တောင်ဘက် ၅ မိုင်ခန့်အကွာ ၊ အနက် ၁ဝ ကီလိုမီတာကို ဗဟိုပြုပြီး၊ အင်အားရစ်ချ်တာစကေး (၄ ဒသမ ၈) အဆင့်ရှိ ငလျင်သည် ယနေ့ (ဇွန်လ ၇ ရက်)၊ ညနေ ၄ နာရီ ၊ ၂၃ မိနစ်၊ ၅၁ စက္ကန့်အချိန်တွင် လှုပ်ခတ်ခဲ့ကြောင်း မိုးဇလက ထုတ်ပြန်ထားသည်။

အဆိုပါ ငလျင်လှုပ်ခတ်မှုအား ညောင်တုန်းမြို့၊ မအူပင်မြို့ နှင့် ရန်ကုန်တိုင်းအတွင်းရှိ မြို့နယ်အများအပြားတွင် သိသိသာသာ ခံစားခဲ့ရကြောင်းလည်း သိရသည်။

"ငလျင်ဒါဏ်က သိသိသာသာခံစားရတယ်။ ဆိုင်ထဲမှာရှိတဲ့ပစ္စည်းတွေလဲအကုန်ပြန့်ကျဲကုန်တာပဲ။ မြို့ထဲမှာတော့ အဆောက်အအုံတွေပြိုကျပျက်စီးတာတွေရှိပါတယ်"ဟု မအူပင်ဒေသခံတစ်ဦးက NP News ကိုပြောသည်။

အဆိုပါ ငလျင်လှုပ်ခတ်မှုကြောင့် မအူပင်မြို့နယ်၊ ရွှေဘုန်းမြင့်စေတီမြတ်ကြီး ထီးတော်ယိုင်နဲ့မှုဖြစ်ပွားခဲ့ပြီး ရွှေဘုန်းမြင့်ဘုရားဘေးရှိ မိုးကုတ်ရိပ်သာတွင် ငလျင်ကြောင့် သီလရှင်တစ်ပါးနှင့် အမျိုးသမီးတစ်ဦး သေဆုံးခဲ့သည့်အပြင် မအူပင် တက္ကသိုလ်ရှိ အဆောက်အဦးအချို့လည်း ပျက်စီးမှုများရှိခဲ့ကြောင်း ဒေသခံများထံမှ စုံစမ်းသိရှိရသည်။

လူသေဆုံးခဲ့သည့်မိုးကုတ်တရားရိပ်သာနေရာသည် ရွှေဘုန်းမြင့်ဘုရားအနီးတွင်တည်ရှိပြီး ငလျင်ဒါဏ်ကြောင့် အဆောက်အဦးနံရံပြိုကျကာ အပြင်ဘက်တွင်ထိုင်နေသည့် သီလရှင်နှင့် အမျိုးသမီးအပေါ် ကွန်ကရစ်အပိုင်းအစများပိမိ၍ သေးဆုံးသွားရခြင်းဖြစ်ကြောင်း သိရသည်။

ယင်းနေရာကိုလက်ရှိအချိန်၌ ကယ်ဆယ်ရေးအသင်းများနှင့်သက်ဆိုင်ရာတာဝန်ရှိသူများက လာရောက်စစ်ဆေးနေကြောင်း ဒေသခံများထံမှ သိရသည်။

ငလျင်ဒါဏ်၏သက်ရောက်မှုကို ရန်ကုန်တိုင်းအတွင်းရှိမြို့နယ် အတော်များများကခံစားရသော်လည်း ထိခိုက်ဆုံးရှုံးမှု ပမာဏကို လတ်တလော၌ အတိအကျထုတ်ပြန်ခြင်းမျိုးမရှိသေးပေ။