ဂျန်ဇက် (NSS) - နိုဝင်ဘာ ၂၅ 

ယူကရိန်းစစ်ပွဲနဲ့ပတ်သက်ပြီး စစ်ရေးတင်းမာမှုအရှိန်မြင့်တက်နေချိန်မှာပဲ ပြင်သစ်အစိုးရဟာ ယူကရိန်းကို ပြင်သစ်နိုင်ငံထုတ် တာဝေးပစ်လက်နက်တွေအသုံးပြုပြီး ရုရှားနိုင်ငံပိုင်နက်အတွင်းပိုင်းကို တိုက်ခိုက်ဖို့ ခွင့်ပြုပေးလိုက်ကြောင်း သိရပါတယ်။ 

ယူကရိန်းဟာ အမေရိကန်သမ္မတ ဂျိုးဘိုင်ဒန်ရဲ့ခွင့်ပြုချက်ကို ရရှိခဲ့ပြီးနောက် ရုရှားပိုင်နက်အဖြစ် နိုင်ငံတကာက အသိမှတ်ပြုထားတဲ့ ပိုင်နက်တွေကို အမေရိကန်ထုတ် တာဝေးပစ်ဒုံးကျည်၊ ဗြိတိန်နိုင်ငံထုတ် တာဝေးပစ်ဒုံးကျည်တွေနဲ့ ပြီးခဲ့တဲ့ရက်ပိုင်းမှာ ပစ်ခတ်ခဲ့ပြီးနောက် လက်ရှိအချိန်မှာ ပြင်သစ်နိုင်ငံကလည်း ယူကရိန်းကို ထပ်မံခွင့်ပြုပေးခဲ့တာဖြစ်ပါတယ်။ ပြင်သစ်နိုင်ငံခြားရေးဝန်ကြီး ဘာရော့ကပြင်သစ်အစိုးရဟာ ယူကရိန်းကို ရုရှားပိုင်နက်အဖြစ် နိုင်ငံတကာက အသိမှတ်ပြုထားတဲ့နေရာတွေကို ပစ်ခတ်တိုက်ခိုက်ဖို့ ခွင့်ပြုလိုက်တယ်လို့ပြောပါတယ်။ 

ပြင်သစ်အစိုးရဟာ ယူကရိန်းကို SCALP-EG  အမျိုးအစားခရုဇ် ဒုံးကျည်တွေ ထောက်ပံ့ပေးထားပြီး အဲဒီဒုံးကျည်တွေဟာ အကွာအဝေး မိုင်ပေါင်း(၃၉၀)ကို ရောက်ရှိပစ်ခတ်နိုင်စွမ်းရှိကာ စစ်လေယာဉ်တွေအပေါ်ကနေ ပစ်ခတ်လို့ရတဲ့ ဒုံးကျည်ဖြစ်ပါတယ်။ ပြင်သစ်သမ္မတ မက်ခရွန်က ၎င်းတို့ဟာ ယူကရိန်းကို SCALP-EG အသုံးပြုဖို့ခွင့်ပြုပေးဖို့ စဉ်းစားမယ်လို့ ပြီးခဲ့တဲ့မေလအတွင်း ထုတ်ဖော်ပြောဆိုခဲ့ဖူးပါတယ်။ လက်ရှိအချိန်မှာတော့ ပြင်သစ်နိုင်ငံခြားရေးဝန်ကြီးက လူသိရှင်ကြားထုတ်ဖော်ပြောဆိုလာခဲ့တာဖြစ်ပြီး ရုရှားပိုင်နက်တွေကို ပြင်သစ်နိုင်ငံထုတ် တာဝေးပစ်ဒုံးကျည်တွေနဲ့ ပစ်ခတ်ဖို့ ခွင့်ပြုပေးလိုက်တယ်လို့ အတည်ပြုခဲ့တာဖြစ်ပါတယ်။ 

ရုရှားဟာ ယူကရိန်းနိုင်ငံက ဗြိတိန် နဲ့ အမေရိကန်ထုတ် ဒုံးကျည်တွေ နဲ့ ပစ်ခတ်မှုကို လက်တုံ့ပြန်မှုအဖြစ် အသံထက်မြန်တဲ့ ဒုံးကျည်တွေနဲ့ ပစ်ခတ်လက်တုံ့ပြန်ခဲ့ဖူးပါတယ်။ရုရှားသမ္မတပူတင်က အမေရိကန် နဲ့ နေတိုးမဟာမိတ်အဖွဲ့ဟာ စစ်ပွဲကို အရှိန်ပိုမိုမြင့်လာလာအောင် လုပ်ဆောင်နေတယ်လို့ စွပ်စွဲပြောဆိုခဲ့ဖူးပါတယ်။ ယူကရိန်းက အနောက် အုပ်စုနိုင်ငံတွေရဲ့ လက်နက်တွေအသုံးပြုပြီး တိုက်ခိုက်ခြင်းကို ရုရှားက လက်တုံ့ပြန်သွားမှာဖြစ်ပြီး တုံ့ပြန်ဖို့လည်း အမြဲတမ်းအဆင့်သင့်ရှိတယ်လို့ပြောပါတယ်။ ယူကရိန်းနဲ့ ရုရှားနိုင်ငံတို့ကြားဖြစ်ပွားနေတဲ့စစ်ပွဲဟာ (၃)နှစ်နီးပါးရှိလာခဲ့ပေမယ့် အပစ်ခတ်ရပ်စဲရေးရယူနိုင်ခြင်းမရှိဘဲ တိုက်ပွဲတွေဖြစ်ပွားနေရာ ထိခိုက်ပျက်စီးမှုတွေများပြားနေကြောင်း သိရပါတယ်။