Pika (NSS) - နိုဝင်ဘာ ၂၅

အမေရိကန်နိုင်ငံအတွင်း တရားမဝင်ရွှေ့ပြောင်းနေထိုင်သူတွေတိုင်းကို နေရပ်ပြန်ပို့ဖို့အတွက် ရွေးကောက်ခံသမ္မတ ဒေါ်နယ်ထရမ့်ရဲ့ အဆိုပြုချက်ကို အမေရိကန်နိုင်ငံသား(၅၇)ရာခိုင်နှုန်းက ထောက်ခံကြတယ်လို့ CBS သတင်းစာရဲ့ စစ်တမ်းတစ်ခုအရ သိရပါတယ်။ 

ဒါပေမဲ့လည်း ဒီမိုကရက်တစ်ပါတီရဲ့မြို့တော်ဝန်တွေနဲ့ အုပ်ချုပ်ရေးမှူးတွေဟာ ရွေးကောက်ခံသမ္မတဒေါ်နယ်ထရမ့်ရဲ့ အစီအစဉ်တွေကို ဆန့်ကျင်ကြဖို့ ကတိပြုထားတယ်လို့လည်း သိရပါတယ်။ နိုဝင်ဘာလအစောပိုင်းက လုပ်ဆောင်ခဲ့တဲ့ ရွေးကောက်ပွဲအတွင်း ဒေါ်နယ်ထရမ့်က ဒီမိုကရက်တစ်သမ္မတလောင်း ကမ်မလာဟားရစ်ကို အနိုင်ယူနိုင်ခဲ့တာနဲ့ပတ်သက်ပြီး ဖြေဆိုသူတွေရဲ့ (၅၅)ရာခိုင်နှုန်းက စိတ်ကျေနပ်ကြောင်း ဖြေဆိုခဲ့ကြပြီး (၄၄)ရာခိုင်နှုန်းက စိတ်ကျေနပ်မှုမရှိဘူးလို့ ဖြေဆိုခဲ့ကြပါတယ်။ ဒါ့ပြင် တရားမဝင်ရွှေ့ပြောင်းနေထိုင်သူတွေတိုင်းကို နေရပ်ပြန်ပို့ဖို့အတွက် ဒေါ်နယ်ထရမ့်ရဲ့ အဆိုပြုချက်ကို ဖြေဆိုသူတွေရဲ့(၅၇)ရာခိုင်နှုန်းက ထောက်ခံခဲ့ကြပြီး (၄၃)ရာခိုင်နှုန်းက မထောက်ခံကြဘူးလို့လည်း သိရပါတယ်။

အမေရိကန်သမ္မတအဖြစ် ရွေးချယ်ခံခဲ့ရမယ်ဆိုရင် အမေရိကန်သမိုင်းတစ်လျှောက် အကြီးမားဆုံးနေရပ်ပြန်ပို့ရေး လုပ်ငန်းစဉ်ကို ဦးဆောင်လုပ်သွားမယ်လို့ ဒေါ်နယ်ထရမ့်က ပြီးခဲ့တဲ့နှစ်မှာ ကတိပြုပြောဆိုခဲ့ပါတယ်။ အမေရိကန်သမ္မတအဖြစ် စတင်တာဝန်ယူချိန်မှာ နိုင်ငံတွင်းတရားမဝင်ရွှေ့ပြောင်းနေထိုင်သူတွေကို နေရပ်ပြန်ပို့နိုင်ဖို့အတွက် အရေးပေါ်အခြေ အနေကြေညာပြီး စစ်တပ်အရင်းအမြစ်တွေကို အသုံးပြုသွားမယ်လို့ ဒေါ်နယ်ထရမ့်က ပြီးခဲ့တဲ့ရက်ပိုင်းမှာ ထုတ်ဖော်ပြောဆိုခဲ့ပါတယ်။ စစ်တမ်းအရ ဖြေဆိုသူတွေရဲ့ (၈၂)ရာခိုင်နှုန်းက ဒေါ်နယ်ထရမ့်ကို တရားမဝင်နေထိုင်သူတွေကို နေရပ်ပြန်ပို့နိုင်ဖို့အတွက် လူဝင်မှုကြီးကြပ်ရေးဌာနနဲ့ နယ်ခြားစောင့်တပ်ဖွဲ့တွေကို အသုံးပြုစေလိုနေပြီး ဖြေဆိုသူတွေရဲ့(၄၄)ရာခိုင်နှုန်းက အမေရိကန်စစ်တပ်ကို အသုံးပြုစေလိုနေတယ်လို့လည်း သိရပါတယ်။